¹ Nang galoi ding in illina in warin Yeesho toomno Bilaatush. ² Shinui in yiu ya gunnii ya, "Min weena niyo ye ti ku shuulo memme, mo kuroju me an gub, shii a kum po anngo kine buk ti Keesharum, kan in ti tewi ya shi po kuunii Kiriti, kan Gub." ³ Bilaatush in tel Yeesho ya, "Kei Gub Yawudaawa ya?" Yeesho in lignon ti shii ya, "Oo, kaa ye ke teka." ⁴ Nang Bilaatush in tewi ti mongba ankpaa kan jima memmei ya, "Nei wa la-moo ye kan kelnyom." ⁵ Pene shinui in tinnoju, in ti tewi ya, "Shii ti yeeru bobak, in ti shuppo memme me ti Yawuudiya ding, we liina guni ti Galiili ar we foottu po te." ⁶ Nang kaa te Bilaatush in yaaro we te, shii in ya telyo koo niyo tei niyo Galiili. ⁷ Koddi ye shii penaa ya Yeesho ti ta bukno Iriidush Antipa, shii in shemo shur gunnii ti Iriidush, ye shii ti Urshaliima ti ta koddi teere. ⁸ Koddi ye Iriidush weyaa shikno Yeesho, in shemo ya beere kping, longku sharaa joori koddi ta gee ku we shiknii. longku wee shii yaaraan ti kuunii, shii in li shaarini ka wee shii yuwaa we maam. ⁹ Iriidush in tenglo Yeesho ka telyo gbe, pene Yeesho a lignonum. ¹⁰ Mon gba me ankpaa kan me an shubet shoro shengrii ti po teere, shinui in ti ya gunnii ti ku wee a kpangum. ¹¹ Nang Iriidush kan me an bee deetni, in min duulan-shik ti Yeesho, in shiwan shii we shuro-shuroju. Nang shinui in showin lanna ya-gub yen fo ti shiknii, shinui in shur gunnii birang ti shikno Bilaatush. ¹² Ti ta darang teere ma Iriidush kan Bilaatush in yooju me an jeere shaayi, ye milam shinui me an gei shaayi. ¹³ Nang Bilaatush in yeeru men gbidina ankpaa kan me an-toom memme, ¹⁴ kan in tewon ti shinui ya, "Ma wannano ka la-moo ye maa shii dok mo ti li memme mo yu bang-kumo. Ne tenglaa shii ti dooma nang nei wa la-moo ye kan daklaa wee ma gbunngan ti kuuniim. ¹⁵ Iriidush po kuuni, shii shunna gunnii birang ti shikmu kama, kaa ye ne ma ti we shiki, shii a yu wee daklani ye po li shii in murin. ¹⁶ Longku kaa te, ne ta yuun kelmo ti shii nen foran kira ka shii." ¹⁷ [Wende Bilaatush, waarii shuklaa shii ta fora kira ka niyo kaa ye Yawudaawa ti ya koddi Peewe Teelani.] ¹⁸ Pene shinui ka eleju foki dok in yallina ta shinui ya, "Tuk la-moo ye! Ken formu kira ka Barabash!" ¹⁹ Shoka Barabash ti ta mina muruk longku ye shii ti shakki me an yeeru nee ti tarang mina kan ti shakki me tuka manni niyoi ti Urshaliima. ²⁰ Bilaatush leka for kira ka Yeesho, shii in beng shinui. ²¹ Pene shinui in shooju toomka bobak in ti tewi ya, "Ter shii ka we-jooro ti shik gbong-biro! Ter shii ka we-jooro ti shik gbong-biro!" ²² Bilaatush in yuun paaro an-tat ti shinui ya, "Wo piire wen ye la-moo ye yuwaai? Nei wa shii kan daklan wee po li shii war mina murom. Kaa te, ne ta yuun kelmo ti shii, nen foran kira ka shii." ²³ Pene shinui in isshaju ka ele yen bang, shinui leka in loo shii. Elejui in yiu nyimmono Bilaatush. ²⁴ Longkuuno te Bilaatush in kuma in yuun wee shinui leka. ²⁵ Shii in foran kira ti shinui ka mo shoka ti mina muruk ka longku shabbi kan tuk niyo. Pene shii in sheewo Yeesho ti bi lewanjui. ²⁶ Kaa ye shinui kookan ka shii, shinui in Rollo niyo ye yaa Shimon niyo Shiraayi, wanna ti po shaloni ti ta buki, kan shinui in liin gbong Biro look ti kwi, in yiwin biino Yeesho. ²⁷ Gbong jima memme, kan shereb me ti Ku bau-kenni ka longkuunii, me yinna biinii. ²⁸ Pene Yeesho in showa dooni ti shikjui in tewi ya, ''Shibo shereb Urshaliima, ma wessho ya kwii ka longkuunoi, pene ma you kwii ka longkuuma kan shibo ma. ²⁹ Ka koddi ye ta waru yema tewani maa, 'Kpangi ti ku shereb me jemra, fok kpangju a ti sher shiyaam, wiriju a nau shummanim.' ³⁰ Nang shinui ta yiu tewani ti sheela ya, "Buuttu ti kuumu!" Kan in ti tewi ti gungum ya, "Kaumu kuumu!" ' ³¹ Ma memme maa yuwaa we te ti shik biroi ye tidai duulani, ta yooroi ka yee ye ma biroi maa isshaaroi?" ³² Ka manni shwiji shin palau ku jal me piire, in peron ka shinui longku waraa sheewo shinui sheeju. ³³ Bara ye shinui foonna piree ye yaa, "Gunglung-ku," ti po teerei shinui in sheewon shii kan me piirei, dok ti ku kira temme,kan dok ti ku kira jiyau. ³⁴ Nang Yeesho in tewi ya, "Fono, fuddo shinui, longku shinui a peno wee shin ti ku yaanim. Nang shinui in bwairo ta lannanii ka ving kaari ti shakkiju. ³⁵ Memmei in shereju in ti geena, pene me an-toom Yawudaawa in duulo shiknii, in ti tewi ya, "Maraa ku peddi, memmei, shero mo mar kuuni ka shikni, ye ma shii maa Kiritino Yamma yei dok shakan weeni." ³⁶ Me an bee deet sheeju in nwinnyo foknii in ³⁷ ti tewi ta shinui ya, "Ke maa Gub Yawudaawa, mar kuuko," ³⁸ Ka yaan balla ye shinui tannaan ti ta kuunii ye ti maarra ya, "SHEYYEI GUB YAWUDAAWA." ³⁹ Dok ti shakki me piirei sheewii ti po teerei, in teu piire paaro ti shikno Yeesho ya, "Kei Kiritim ya? Mar kuuko kan minu!" ⁴⁰ Pene yen dok an piirei ye sheewii ti po teerei in pekro mondoki, in tewon ya, "Ke ti shi Yammam ya, kaa ye minaa mu kama kelmo muro ka shaayi kan shii? ⁴¹ Kelmomu ka ke dob-dob longku ka ke ti ku yiwanii wee shuranmu ka ke gasshaa. Pene la-moo ye a yu wee daklanim." ⁴² Nang shii in tewi ya, "Yeesho, nyimmo kan ne ye ke maa wanna ti ta Gubko." ⁴³ Yeesho in lignon ti shii ya, "Ne ta teuko yen kulli, booi ke ti ku-dang ka shaayi kan ne." ⁴⁴ Koddi te darang sheraa sherii, pene dil in nummo ta piri we kettan darang. ⁴⁵ Birang darang a ti aanam. Nang lanna kawo ta mina Yamma in jaaro taaro palau. ⁴⁶ Ka ele yen bang, Yeesho in tewi ya, "Fono, ti ta kirako ye ne wesshaa shoomno." Bara ye teka kaa te, in tol shuno nuroni. ⁴⁷ Bara ye mongba me an bee deet Rooma ye weyaa shik wee yuwaaro, in kum pinno Yamma ya, "Kulli, la-moo ye kan kpang poshaari." ⁴⁸ Bara ye memme ding galaa ti po teere ka longku in we wee ta yooro ka dooju, shinui in tudira ku biikiju longku poshaariju yuwaa ding, in kooju. ⁴⁹ Pene me ding me jemlaa shii, kan shereb me yinna biinii ti Galiili, shinui in shereju la tali, shinui in ti geen wee ti po teere. ⁵⁰ Wende ka niyo ye shommoni yaa Yushubu, dok ti shakki men gbidina ti ta mina deewo-paaro Yawudaawa. Shii niyo an kpang poshaari kan ya wee dob-dob. ⁵¹ La-moo ye a kum kan sheran-ku paaro ye yuwaa kan wee yuunam. Shii wanna ti Armatiya, gok-mina ye ti Yawuudiya nang shii in ti dangku Gubno Yamma. ⁵² La-moo ye in war shikno Bilaatush, in tel shii ka kumano Yeesho. ⁵³ Shii in duru kumai, in dau shiki ka lanna yen yelek-yelek, nang in li ti ta duwo ye yemmaa ti shik shiila-gaddi, piree tidai nau liin kuma niyo ti taim. ⁵⁴ Koddi ker po-waari kan Darang Nessho Yawudaawa nennga yooro. ⁵⁵ Shereb me wanna ka shaayi kan Yeesho ti Galiili in yiu biino Yushubu, shinui in we shik yemman duwo shiilai kan liyan kumai ye liyaan ti tai. ⁵⁶ Nang shinui in koona in meeju mina ti Urshaliima, nang in limyo kulinji kan turaali. Pene Darang Nessho Yawudaawa, in nesshina ta shinui longku in shor shiire ye Muuja teka ya mo yu.