¹ Kan vubnai ti Ku darang an dok ti Ku shaklo parilau, sherebi in waru ta duwai, in waru ka kulinji ye shinui limyoo. ² Shinui in wa we shiila ye nummaan fok duwai gbumlaa won. ³ Shinui in ri ta duwai, pene a wa kumano Fo-mina Yeeshom. ⁴ Tidang shinui ti ku nyimmo we te, kpantidi, shwiji shin Palau in Peren ti jelejui ti ta Lanna yen maljo. ⁵ Kaa ye shereb shurme kenngeju ka shewo in tuumo kuuju in ti gee buk, me an shuranno Yamma in tewon ti sherebi ya, ''Longku wen ma ti Ku gassho bi mo kan dwei ti shakki me kumai? ⁶ A doo shim, pene illaani! Ma nyimmo ye shii teka ma koddi shii tida ka shaayi kan ma ti Galiili ya, ⁷ ta min La Niyo ti ta kira shwiji me an shek kan ta loo shii, pene ti Ku shaklo an tat ta illoni.'' ⁸ Sherebi in nyimmo wee teka ta shii. ⁹ Bara ye shinui meenan ti ku duwai, shinui in sheero pi we ding ti me an yiu shubet kpumu gee-dok kan peddi ding. ¹⁰ Wende Maryamu Magadaaliya kan Jowanna kan Maryamu nonno Yaakubu kan peddi sherebi gbe me teka wee yuwaaro ti me an kaawi. ¹¹ Pene shinui a kum pi wee sherebi tekam, Longku paarojui ti ta geyanju a doo kwim. ¹² Biiturush in illina ka yoba in war ku duwai, in tuumoni tuumii, shii in we ku jal galan lannai, nang shii in kooni in ti ya nyimmo ti kuuni ka wee yuwaaro. ¹³ Kpantidi, palau ti shakki me an yiu shubetni ti ku mere war meno-mina Imaawush shakkii pelle mere shuwa darang dok kan Urshaliima. ¹⁴ Shinui in ti deppina ti shakkiju ti ku wee ding yuwaaro. ¹⁵ Kaa ye shinui sheeraa paaroi kan ye shinui deppaan we te, Yeesho po kuuni in amru in yiu ya mere kan shinui. ¹⁶ Pene in beelo a doojui jemlo shii. ¹⁷ Yeesho in tewon ti shinui ya, "Ma ti ku deppo wen ka shaayi ti ku mere mai? Shinui in shereju ka tira poshaari. ¹⁸ Dok ti shakkijui ya shommonii Kiloobash, in tel shii ya, "Ke dokko ye kei bino ti Urshaliima yei peno wee yuunaro ti po teere ti ta darang me maa?" ¹⁹ Yeesho in tel shinui ya, "Wo wen?" Shinui lignon ti shii ya, "Ti kuuno Yeesho niyo Naajeret, shii yei an-pigra, kan bang ti ta ya paaro kan yaani ti toomno Yamma kan memme ding. ²⁰ Pene men gbidina me ankpaa kan me a gubmu in min shii mo minin kelmo muro, nang in shemo ter shii ti shik gbong-biro. ²¹ Pene min liyaa shaari kan shii ta waraa for memme Ishereila ti ta shilibi. Nang wo wen, booyi, bi sho wee yuwaaro booi kan shaklo tai. ²² Pene in tokko shaarii, peddi sherebmu in liimu ya maam. Kaa ye shinui waraa ta duwai kan vubnai. ²³ Koddi shinui a wa kuma lo-shikniim, Shinui in meeru in wa teumu ya shin weena shik jirim me an shuranno Yamma, ye tennaju ya shii kan dooni. ²⁴ Nang peddi men shwiji ti shakkimu in war ta duwai in wa we kaa ye sherebi teka, pene shinui a wa shiim." ²⁵ Yeesho in tewon ti shinui ya, "Ai, ma me dili kan tira poshaari, yuwaaro shilib ti shik ma man kum pi wee me an-pigra balilaa ti ta paarono Yamma! ²⁶ Yikka ti gbare-do Kiriti in taa shilib we te in tang reeni po sha gbeni maa? ²⁷ Shii twaalaan dwei ti shinui wee teka ti ta paaro Yamma ti kuunii, wee tangna ti shorono Muuja kan balilan we me an-pigra ding. ²⁸ Kaa ye shinui nennga tarang meno-mina ye shinui ta waranii, Yeesho in ya kaa pelle shii ta kooni toom. ²⁹ Pene shinui in dimmo shii, in ti tewi ta shnui ya, "Deeko ka shaayi kan minu, longku kiryippa nennga yooro kan darang nennga shuworo." Nang Yeesho in ri ka we deeni kan shinui. ³⁰ Kaayeshii tiku dangla sha gwaang kan shinui, shii in shar we-ta-kele, in pammina ti Yamma, in beblo tai in minin ti shinui. ³¹ Nang a doojui in awi ye shinui in jemlo shii, nang in shekenin ti jelejui. ³² Nang shinui in yiu tenglo shaayi ya, "A poshaarimu kama ta ya beere ti ta diimu kama ye shii ti ku yuumu kama paaro ti ku koko in twaalomu kama do paarono Yamma maa?" ³³ Shinui in illina in meeju Urshaliima ti ta koddi teere. Ti po teere shinui in wa we me an yiu-shubet shin kpumu gee-dok kan peddi galii ka shaayi ³⁴ in ti sheera ya, "Fo-mina illaani kulli, kan in shuk dooni ti Biiturush." ³⁵ Nang men palawi in sheero pi wee yuunaro ti ku koko, kaa ye shinui jemlaan Yeesho ti ta koddi ye shii beblaan ta we-ta-kelei. ³⁶ Kaa ye shinui ti ku sheero pi we te, Yeesho po kuuni on perin ti shakkijui, kan in tewon ti shinui ya, "Kuttan shaari mo deero ti kuuma." ³⁷ Pene shewo kan gbob-gbob in yiu shinui, kan shinui in nyimmina ya shin weenai shik sha-duwa. ³⁸ Nang Yeesho in tewon ti shinui ya, "Longku wen ma turmaa mai? Longku wen man ti yuyyo teliyo ti poshaari ma? ³⁹ Ma gee ta kirano kan shoono, ye tenei ne ka shikno. Ma nau shikno man geena. Longku an sha-duwoa kan lo kan wiyakum, kaa ye ma weyaa ne kan te." ⁴⁰ Bara ye shii teka we te, shii in shukin shik kirani kan shooni ti shinui. ⁴¹ Nang kaa ye tida shinui kumum longku beere kan maam, shii in tel shinui ya, "Ma kan we po shaani ti po te ya?" ⁴² Shinui in minin buk-buk shuuran shirim, ⁴³ nang shii in shari in sha ti a doojui. ⁴⁴ Shii in tewon ti shinui ya, "Tenei wee ne teka ma ye tida ne ka ne kan ma, wei ding ta kemero ye ballii ti kuuno ti ta Shorono Muuja kan Balila me an-pigra kan Lakarda Jabuura." ⁴⁵ Nang shii in au poshaarijui, ye shinui in pen wee ballii ti ta paaro Yamma. ⁴⁶ Shii in tewon ti shinui ya, "Tei wee ballaa, Kiriti ta sha shilibi, in illoni ti ku shaklo an tat. ⁴⁷ Nang min kelaa kan fur-fok ya shasshalau ta ya kaawi ti ta shommoni ti ku-buk ding, ma liiru guni ti Urshaliima. ⁴⁸ Mai me an jimro ween shurme te. ⁴⁹ Gee, Ne ta waraa shurma gun wee Fono kunnga ma piri yau. Pene ma deen man ti po te ti tarang gok-minai, we war koddi ye kumenno Yamma ta kauma kuuma ti ku-dang." ⁵⁰ Nang Yeesho in peron ka shinui peewe we war koddi ye shinui yuuna nimmi kan Betani. Shii in kirani ti ku-dang in liin kpang ti kuujui. ⁵¹ Bara ye shii ti ku liin kpang ti kuujui, shii in wessho shinui in shar shii we ammo ku-dang. ⁵² Nang shinui in wau shii in meeju Urshaliima ka beere yen gbe. ⁵³ Nang shinui in yiu deeju ti ta Mina Yamma, in ti wau Yamma.