¹ Kpantidi in yooro ka bi ye Yeesho yikka merko tarang gok-mina kan meno-mina, in ti kaawo paaro, in ti sheero pi paaro shinnyi Gubno Yamma. Shin kama kpumu gee- palawi ka shaayi kan shii, ² birang kan peddi shereb me weyaa bang shikju ti piree kan ti kira piire shoom kan dogi pira ta diiju: Ka Maryamu, (ye yaa Magdaaliya ) ye foraan shaabug parilau ti shiki. ³ Kan Jowanna manna kuja, an gee ku minano Iriidush, Shujaana, kan peddi gbe, shereb me ti deewo gunjui ka wee kan te ta shinui. ⁴ Bara ye jima gbe maa ti gallu, kan memme in ti waru shikno Yeesho gok-mina gok-mina, nang shii in tewon temyan te ya, ⁵ "An shirau waraai kaawo peenni. Kaa ye shii kaawaa, peddi in shugno ti jele koko, in tamyo kwi, nang adeewe ku-dang in yokkina. ⁶ peddi in shugno ti ku karinkasshi, kaa ye kpantidi in kudan kpiru, in isshaju, longku adoo yennam. ⁷ Peddi peeni in shugno ti ta arat, in kpiri ka shaayi, arat in kpakro shiki. ⁸ Birang peddi peeni in shugno ti ku bukin kpang, in Shemo peru in kpiri, in ya ari, maari shig-shig in yek ye kaawai." Ka bi ye Yeesho wiilaa we te, nang in tewi ka ele yen bang ya, "Mo ding kan kumo yaarani, shero mo shii yaaro." ⁹ An yiu shubetnii in tel shii wee temyani te ta shuklani. ¹⁰ Nang shii in tewi ya, "Kaa ma, kunnga man pen lattan wee ti ku Gubno Yamma, pene, kaa she peddi, Ne ta sheeron ti shinui ka temyan, longku, kaa te geyani, shinui a ta weyanim, kan yaarani shinui a ta penanim. ¹¹ Seyyei wee temyani ta shuklani, peen teerei paarono Yamma. ¹² Me ti jele kokoi me yaaraa paaroi, nang shuuro in waru in lauwon paaroi ti poshaarijui, longku shinui a ta kumani kan in kauro shinuim. ¹³ Me ti ku karinkasshii teerei me yikka paaroi ka beere koddi ye yaaraa. Pene shinui a kan shoorinum, in kumi po koddi la-wiiu, kan ti ta koddi nawo, in shugno ta shinui. ¹⁴ Pene me shugna ta arat, teerei memme me yaaraa paaroi, pene kaa ye shinui ti ku mereju, turmo we ku bukin berero poshaarii. Birma kan sha tomon kerang te in kpakro shikjui. ¹⁵ Pene peen me shugyaa ti ku bukin kpang, shurmei me kan poshaari yen kpang, me yaaraa paaroi, in li ti poshaarijui, nang in ya ween kpang ka yiu poshaari kan shasshani. ¹⁶ "Adoo mo ti wul deet ta kele in nummo kwi ka paawim, koo in dayi ti gun gburamum, kan ye in ya kaa teere, ta dayani ti ku dangla, longku ma me riina ta minai ta we shik aroi. ¹⁷ Longku adoo wee lattani, yei ta peru kudamum, birang adoo numman ku wee a ta penoro kan peru peewem. ¹⁸ Longku kaa te ma jooro kpang kan ke kumo ye ke ti ya, Mo kan te, ta minin gbe, moi kan tem, ye nyimmaa kan tei ta lauwon ti kirai." ¹⁹ Nang nonno Yeesho kan ma molonni in waru shiknii, pene a wa koko nem shikim longku jimai. ²⁰ Manni niyoi in tewon ti shii ya, "Nongko kan ma molonko, shengrii won ti peewe leka we shikko." ²¹ Pene Yeesho in lignon ti shinui ya, "Nonno kan ma molonnoi ma meyye me ti yaaro paarono Yamma in ti yuun shuran." ²² Darang nan dok shii in riini ta gong-doo kan me an yiu-shubetni in tewon shinui ya, "kama teelemu jele shakya nan dok." Nang in reeju ta gong in kooju. ²³ Pene kaa ye shinui ti ku ya mere ti ku dooi, shaklo in shar shii. Pirit doo in illiru ti ku shakyai, gong-dooi in yiu shaaro gun dooi, kan shinui ti ta shilibi. ²⁴ Nang me an yiu-shubetno Yeesho in waru shiknii in pigro shii ya, "Fo-mina! Fo-mina! Kama nennga muttani!" Shii in illina in pekro piriti kan dooi ye sherii, pirit dooi in ya maj-maj nang in ya lubaj foki dok. ²⁵ Nang shii in tel shinui ya, "Duma lishaari mai ti tong?" Pene shinui yuwaa shewo kan maam, kan shinui in yiu tenglo shaayi ya, "Duma we tei nong ye ti pekro pirit kan dooi, kan shinui in ti murin-ku ti shii?" ²⁶ Shinui in kooju ti ku doo in warju kpakan fok-buk Garashinaawa ye maa teelaa awo shakyai kan Galiili. ²⁷ Koddi ye Yeesho maa ti shaaru buki, in kpomi kan manni niyoi ye piire shoom sharaa ta kwi ti tarang minai. Diyoo bak muyei a ti shou lanna ti shiknim kan a ti kuttina ti ta minam, pene ti deeni ti ku duwo. ²⁸ Koddi ye shii weyaa shikno Yeesho, in yallina in juunoni ti toomnii, ti ya yallo ka ele yen bang ya, "Ke lekai wen ti piree kan nei, Yeesho, Laano Yamma Mo ti ku dang bak? Ne ta bengko mo ko minno shilibim." ²⁹ Longku Yeesho fuwaa pi pekro piire shoom mo pereni ti shik niyo teere, memme in ti jooro kwi in dabyo kirai kan shoi ka wee eem, pene ti bebro tai, piire shoom in ti shar shii ti warin ta shwee. ³⁰ Nang Yeesho in tel shii ya, "Shommokoi nong?" Shii in tewi ya, "Shommonoi Gbe," longku piire shoomi shin gbe riyaa shiknii. ³¹ Nang in beng shii ta shinui ti kwi ti kwi mo wessho vingju ti ta jwal ye kpurungtungi. ³² Wende ti po teere ka an-pali an-nyanshaari-mina ti ku sha-fok ti jele gungum. Piire shoomi in beng shii mo kumju shinui in reeju shikjui, kan nang shii in kumin piri ti shinui. ³³ Longku kaa te, piire shoomi in pereju ti shik niyoi in reeju shik an-nyanshaari-minai, kan an-palii in shar yoba ti gbaarii in shaaju ta shakya nang doo in dello shinui. ³⁴ Koddi ye me an-tii an-nyanshaarii weyaa shik we yuwaaro, shinui in juwaju yoba in waraa sheero pi wee yuwaaro ti tarang gok-minai kan kpakan-fok gok-minai ding. ³⁵ Longku kaa te memme in peri ka longku wee yuwaaro, kan shinui in war shikno Yeesho kan niyo ye piire shoom peraan ti shiki. Shii deeni ti toomno Yeesho, shoppii kan lanna shikni, birang ti ta nyimmoni yen dob, kan shinui yuwaaro shewo. ³⁶ Nang me weyaa shiki, in tewon ti shinui dangan-pi niyo ye Milam shanngau sharaa kwii tasshaani. ³⁷ Nang memme me ti ta buk Garashinaawai ding in tewi ti Yeesho mo wesshoju, longku shinui kenngeju ka shewo. Longku kaa te, shii in reeni ta gong-doo longku shinui in meeju. ³⁸ Niyo ye peraan ti shiknii, in being shii mo shii kumu shii in koona ka shaayi kan shii, pene Yeesho in shur shii mo kooni ya, ³⁹ meeko minako ken sheero pi wee Yamma yuwaako.'' Niyoi in kooni, in kpaalo pirii ti ta kpakan-fok buki wee Yeesho yuuna ka longkuuni. ⁴⁰ Wende koddi ye Yeesho meena, jimai in minin wanniya ti shii, longku shin ding ti ku dang shii. ⁴¹ Kpantidi, Manni niyoi shommonii Yaayirush, mo dok ti shakki men gbidina ta Mina fur-fok, in juunoni ti toomno Yeesho, kan shii in beng shii mo shii waru minani ⁴² longku dok laini, la-geje pelle shenoro kpumu gee-palau, ti Ku muroro. Kaa ye Yeesho ti Ku mereni, jima memmei in yiu pessho jele gongonii. ⁴³ Wende ka paamuni ti po teere ye Dom ti Ku peron ti shikro po sheno kpumu gee-palau kan tei tuka kinero ding, kan a wa koo niyo ye ta tassho teim. ⁴⁴ Tei in maaloro ti Kudo ta biinii in tau shii geran lannanii, kan kpantidi pere domi in sherero. ⁴⁵ Yeesho in tewi ya, ''Wo nongee ye taka shiknii?'' Koddi ye shin ding yuwaa jiram, Biiturush in tewi ya, ''Fo-mina, jima memme ti koo tong ti kpomlii kan me kan shinui in ti ramyo shaayi nimmi kan me.'' ⁴⁶ Pene Yeesho in tewi ya, ''Ka mondok taka shiknii, longku ne penaa kumen peraa ti shikno.'' ⁴⁷ Koddi ye paamuni penaa ta dum jemloro, tei in waru in juunaro ti toomnii shikroi in ti tari. Ti adoono koo nong tei in teu wee liyaa tei tau shik gerang lannanii kan dangan piri ye kpantidi ye tei tasshaan ten. ⁴⁸ Nang shii in tewon ti tei ya, "Lai, lishaariji liyaaji shin yooji bang. Kooji ka kuttan-shaari." ⁴⁹ Koddi ye tida shii ti ku ya paaroi, manni niyoi in waru ti ta mina Yaayirush an-toom ta mina fura-fok in tewi ya, "Laiko muraaro. Wessho turmo an-shubet birangi." ⁵⁰ Pene koddi ye Yeesho yaaraan we te, shii in liginna ti Yaayirush ya, "Wessho ya shewoi; bara kumu ti poshaariko waani, pene tei ta we bang shikro." ⁵¹ Koddi ye shii foonna minai, shii in foddo-fok riyaani ti biini ti koo nong, kaananii ma Biiturush, Yuwaana, Yaakubu kan fowi lai kan nonto. ⁵² Wende shin ding ti ku bau kenni kan kwii ka longkuuroi, pene Yeesho in tewon ti shinui ya, "Ma wessho kwii; tei a murum pene ti ku yaanii shaklo." ⁵³ Pene shinui in ya shuronii, ye shinui penaa tei fuwaa po muroro. ⁵⁴ Pene Yeesho in yiwin tei ti kirai in ye tei ya, "Lai, illo po sheri!" ⁵⁵ Shoomro in meeriro, kan tei kpantidi in illo shikro. Shii in tewon ti shinui mo gasshon we po shaani ti tei. ⁵⁶ Me an-pariroi in ya maam, pene shii in pekro shinui mo wessho tewani ti koo niyo dok wee yuwaaroi.