¹ Ka bi ye Yeesho fuwaa po sheero koo wen ye shii ti ku sheerani ti ta kumo memme, shii in wanni Kapanaawum. ² Wende ka manni mongba an bee deet Rooma ye kan shookni ye shii leka kping, shikii a bangum kan nennga muroni. ³ Koddi ye mongba an-bee-deeti yaaraa pinno Yeesho, shii in shurin men gbidina Yawudaawa ti shiknii, mo bengo shii mo waru in wa tassho shookni. ⁴ Koddi ye shinui wanna shikno Yeesho in tewi ta shinui ya, "Shii nennaa ken yuun we te ti shii, ⁵ longku shii leka bukmu, kan shii mo dok mo diga mina po fura-fok ti minu." ⁶ Nang Yeesho in koona ka shaayi kan shinui. Pene bara ye nennga fooro minai, mongba shurme in shur peddi me an jeereni mo tewon ti shii ya, "Fo-mina, wessho turmo kuukei longku nei fooro ken waru minanom. ⁷ Longkuuno te, nei nyimmo ne foora nen war jelekom, pene yu paaro waani, shookno in ya bang. ⁸ Ne penaa ne ta gun me ti toomno men gbidina, ka me an bee deet me ta gunno. Ma nei teka ti moo, 'Kooko", in kooni, manni nen tewon, "Waru", in waru, nen tewi ti shookno, 'Yu kaa lee, in ya." ⁹ Koddi ye Yeesho yaaraa kaa te, in ya maam ta shii, in shiwo dooni ti shik memme me ti biini ya, "Ne ta teuma, ti shakki Ishereila nei wa lishaari yen kpang ka tem". ¹⁰ Me an shurani maa ti me mina wa we shooki shiki bang. ¹¹ Kpantidi ti ta shaklo teere, Yeesho in wanni gok-mina ye ti ye yaa Naayin, me an yiu shubetni kan jima memme gbe in ti yiu biinii. ¹² Kaa ye shii nennga ri podang tarang minai, nang gee memme in ti peru ka kuma manni la-kparini, ye shii dok laano nonni, (tei paamun kolo ta tei), kan Jima memme gbe ti biirei. ¹³ Koddi ye Fo-mina weyaa shik paamuni, shii in kunngo tei nang in tewon ti tei ya, "Wessho ya kwii." ¹⁴ Nang shii in wanna in tau shik we shar kumai, nang me an sharii in shereju. Yeesho in tewi ya, "La kparin, Ne ta teuko, illo." ¹⁵ Nang kuma Lai in illo posheri in yiu ya paaro, Yeesho in maan ka shii ti nonni. ¹⁶ Nang shewo kping in yiu shinui shin ding, kan shinui in beero kuuno Yamma, in ti tewi ya, "Mongba an-pigra illa ti shakkimu kama," kan "Yamma wannai shau memme". ¹⁷ Sheer wee Yeesho yuuna darang teere foki in war piri ding ta buk Yawuudiya kan me ti jelero ding. ¹⁸ An yiu shubetno Yuwaana an ya yulma in tewon wei ding ti shii. ¹⁹ Nang Yuwaana in ye palau ti shakki me an yiu-shubetni, in shur shinui ti shikno Fo-mina mo telo, "Kei mo ta warui ya, nang min yiu gee ku manni niyoi dokro ya?" ²⁰ Koddi ye foonna shikno Yeesho, shwiji shurme in tewi ya, "Yuwaana an ya yulma shunnamu ti shikko mo min telko, "Kei mo ta warui ya, nang min gee ku manni niyoi dokro ya?' " ²¹ Ta koddi teere Yeesho in min bang shik ti memme gbe kan pira peeni-peeni, bau shik kan piire shoom, kan me an-fugum gbe in yiu we ta piri. ²² Nang Yeesho in liginna in tewi ti me an shurani ya, "Ma ma shikno Yuwaana man tewon wee ma weyaa shiki man yaaraa. An-fugum ti we ta piri, me kuuloni ta shwei ti ya mere, me an-baluk in ti we bang shikju, gballa ti yaaro paaro, in ti pigro me muttaaju, in ti sheero kpang paaro ti an kenni. ²³ Niyo yei dai-fok lishaari ti shikno ka longku wee ne ti yam, shii mo kan kpang ti kuuni." ²⁴ Ka bi me n shuranno Yuwaana kookoju, Yeesho in yiu sheero paaro ti jimai ka longkuuno kuuno Yuwaana ya, "Ma waraa gee shik wen ti ta shweei? Ma waraai gejiyo shik alau shwee ye pirit ti ku midiro shiki ya? ²⁵ Pene ma peraai gee shik wen? Manni niyoi ye shoppii kan lanna men kpattirin ya? Onngoo me an shoppo lanna me kan kine in ti sha tomonju, dii ta shinui ti ta mina me an-gub. ²⁶ Pene ma peraai gee wen? An-pigra ya? Oo, ne ta teuma, shii yeka an-pigra gba. ²⁷ Tenei mo yuwaa balla ti kwi ya, 'Gee, Ne ta shur an shuranno ti toomko, mo ye ta limmako do koko ken tang waru.' ²⁸ Ne ta teuma, ti shakki me shereb patiraa a doo mo yeka Yuwaana gbam. Pene mo kattani ding ti ta gubno Yamma yeka shii gba." ²⁹ (Koddi ye memme yaaraa we te ding, gale kan me an yiu kine-buki, shinui in kumi ya Yammai mo dob, longku yuwaan yulma ti shinui ka yulmano Yuwaana. ³⁰ Pene Parishaawa kan me penaa-we kping ti ta shorono Muuja, in kuroju limmano Yamma yei ka longkuuju, longku Yuwaana a yuun yulma ti shinuim.) ³¹ Ne ta temyo memme ku-kira tei ka wen kergumii? Shinui kaa wen? ³² Shinui kaa shiba ti ku ya yarang ti kudam po piplo-we, me deeju in ti yeyyo shaayi in ti tewi ya, 'Min biika ma dooro, kan mai yu shorum. Minun yuuma vonak muro, kan mai yu kwii kan minum.' ³³ Longku Yuwaana wanna a ti sha we-ta-kele koo she doo inaabim, kan man ti tewi maa, 'Shii kan shaabug ti shikni.' ³⁴ La Niyo in waru in ti sha kan sheyani, kan man ti tewi maa, 'Gee, shii niyo ye an shaani kan sheyani, an-jeere me an yiu kine-buk kan me an shasshalau!' ³⁵ Pene penani shiiro tei ka shibaro." ³⁶ Wende dok ti shakki Parishaawai in mwinnyo Yeesho ka we sha weshiina ti minani. Kaa ye Yeesho riyaa ta mina niyo Parishaawai, shii in deeni ti jele danglai ka we sha weshiinai. ³⁷ Kpantidi ka manni paamuni ti ta gok-minai ye tei an-shasshalau. Koddi ye tei yaaraa ya shii ti ku sha weshiina ti ta mina niyo Parishaawa, tei in waru ka okro mor turaali. ³⁸ Kaa ye tei sheraan ten ti ta biinii nimmi kan shoonii, in ti ya kwii ta tei, tei in yiu allo shik shoonii ka muru-dooro, kan tei in ti tekilla ka shok-kuuro kan shummo shik shoonii kan sheeno shinui ka mor turaalii. ³⁹ Koddi ye Parishaawa mo mwinnyaa Yeesho weyaa shik we te, shii in tewi ti kuuni ya, "Modaa la-moo ye daa an-pigra, nang shii daa penaa nong kan peen paamun wen ye ti tau shiknii, ye tei an-shasshalau." ⁴⁰ Nang Yeesho in lignon kan in tewi ya, "Shimon, Ne kan wee ne po teuko." Shii in liginna ya, "Teru, ta an-shubet!" ⁴¹ Yeesho in tewi ya, "Ka manni mo an min jan kine ye ta yiu bi niyo palau. Ye dok ta yiub bi dinaari shig-fuwat, kan yen dok naa-fuwat. ⁴² Koddi ye shinui a ta dum anngo shiim, shii in fuddo shinui shin ding. Longkuuno te, wo nong ti shakkijui ye ta leu shii kpingi? ⁴³ Shimon in lignon ya, "Ne ti nyimmina mo dok ye fuddaan sheeni gbei." Yeesho in tewon ti shii ya, "Ke shiiraa dob-dob." ⁴⁴ Yeesho in shiwa dooni ti shik paamuni kan in tewi ti Shimon ya, "Ke ti we paamun ye. Ne riina ta minako. Kei minno doo ka we fuddo shik shoonom, pene tei allaa shik shoono ka muru-dooro kan in tekilla ka shok-kuuro. ⁴⁵ Kei taamonom, pene tei we yinna ti koddi ye Ne riinan tei a dai-fok shummo shik shoonom. ⁴⁶ Kei sheeno kuuno ka murum, pene tei sheenaa shoono ka mor turaali. ⁴⁷ Longkuuno te Ne ta teuko, shasshalauro ye gbe, fuddaan, longku tei shuklaa lewando gbe. Pene mo dok ye fuddaan la-wiiu, shiklaa lewan sheeni la-wiiu." ⁴⁸ Nang shii in tewon ti paamuni ya, "Fuddaaji shasshalauji." ⁴⁹ Me dii ka shaayi ti ku dangla sha weshiinai in yiu yuyyo pap-paaro ti shakkiju ya, "Wo nong ta tei ye koo shasshalau in ti fuddinai?" ⁵⁰ Nang Yeesho in tewon ti paamuni ya, "Lishaariji kauraaji. Kooji kan kuttan-shaari."