¹ Wende ti ku Darang Nessho Yawudaawa, Yeesho kan me yiu-shubetni in yiwaju ta doong tinnyak, nang peddi me an yiu-shubeti in yiu bel-ku tinnyaki in ti pikinna in ti ari. ² Pene peddi Parishaawai in yiu tewani ya, "Longku wen ma ti ya wee shoro foddaa fok yaani Darang Nessho Yawudaawai?" ³ Yeesho in lignon ti shinui ya, "Mai nau maaro wee Dauda yuwaa ye shii kan me an mereni yaaraa kpiyam maa? ⁴ Shii riyaa ta mina Yamma kan in shar we-ta-kele ye waka in sha, in min dogi ti me an mereni yei nenno niyo ding in sham, bara shoro kunnga pirii ti me ankpaa. ⁵ Nang shii in tewon ti shinui ya, "La Niyoi Fo-mina Darang Nessho Yawudaawa." ⁶ Ti ku manni Darang Nessho Yawudaawai, ye Yessho riyaa ta mina fur-fok in shuppo memme ti po teere. Ka niyo ti po teere ye kira temmenii isshaaro. ⁷ Me an shubet ti ta shoro kan Parishaawa in ti dira shii ka nimmi kulang shinui in we koo shii ta tassho pira niyo Darang Nessho Yawudaawa, longku shinui in we koko po shwaalo shii. ⁸ Pene shii fuwaa po pen wee shinui ti ku nyimmani nang shii in tewi ti niyo ye kirai isshaaroi ya, "Illo shikko ken sheroko wono ti toom memme ding. "Kaa te niyoi in illina in shereni sherii ti po teere. ⁹ Yeesho in liginon ti shnui ya, "Ne ta tel ma, shoro kunnga ti ku Darang Nessho Yawudaawa mo yu yen kpang ya koo mo daklo, mo kauro kerang ya koo mo tuk ya?" ¹⁰ Nang shii in gejiyo shikjui ding kan in tewon ti niyoi ya, "Tol shik kirako." Shii in ya kaa te, kan kiranii in meerito yen kpang. ¹¹ Pene shinui in kpalaju den kan shinui in yuyyo paaro ti shaayi ti ku wee shinui ta yaani kan Yeesho. ¹² In yooro ti ta shaklo shurme, shii in ammo ku-sheelai fura-fok. Shii in shuun toom we war kpaalo ta-piri in ti fura-fok ti Yamma. ¹³ Koddi ye ta piri kpaalaa, shii in ye me an yiu-shubetni ti jeleni, nang shii in shakko kpumu gee-palau ti shakkijui, me shii birang ti ye ya shinui me an kaawi. ¹⁴ Gee shommo me an kaawii wono:- Shimon (mo ye liyaan shommo yaa Biiturush) kan molli ta Andaraawish, Yaakubu, Yuwaana, Batalamaawush, ¹⁵ Matta, Tooma, Yaakubu laano Alpayo, Shimon ye ti ye yaa mo leka bukni, kan ¹⁶ Yawuda Ishkarooti, mo shigani an mal-fok. ¹⁷ Nang Yeesho in shaarin ti ku sheelai kan shinui in shereni ti diyang-diyang kudam kan jima me an yiu-shubetni kan jima memme me wanna ti gok-mina Yawuudiya kan Urshaliima kan me penna ti kudo buk Taaya kan Shiidon me ti po gba Shiiruk. ¹⁸ Shinui wannai ka longku yaaro shii kan in tasshoju agin shikju. Memme me piire shoom turmaa shinui, shin sheeju in tasshoju. ¹⁹ Koo nong ti shakki jimai in li shikni ka we tau shiknii longku kumen tasshani ti perin ti shiknii, kan shii in tassho shinui ding. ²⁰ Nang shii in dira me an yiu-shubetniin tewi ya, "Kpangii sheema ma me an-kenni, longku sheemai po ya-gubno Yamma. ²¹ Kpangii sheema ma me ti yaaro kpiyam, longku ta kemon kama. Kpangii sheema me ti ku ya kwii wende. ²² Kpangii sheema ye memme maa kuraa ma, kan koddi ye shinui waka ma kan in kpaa ma kan in kura shommo ma kaa shek, ka longku La Niyo. ²³ Ma yu beere ti ta darang teere kan ilit-jura ka beere, longku kulli ma ta we we shik shuran ma kan gbai ti ku-dang, longku ma shiiju minaa shilibi ti me an-pigra kaa te. ²⁴ Pene dogii sheema ma me an birma, longku ma fuwaa po yiu sha-tomon ma. ²⁵ Dogii sheema ma me kennyei wendei, longku ma ta ya yaaro kpiyam ka bi. Dogii sheema ma me ti ku ya shuro wende, longku ma ta bau kenni kan kwii ka bi. ²⁶ Dogii sheema ma me memme ti kum pirma, teerei dob-dob kaa ye ma shiiju yuyyaa ti me an-pigra shaba. ²⁷ "Pene ne ta teuma ma me ti yaarono, ma lewo me an gei ma man ya ween kpang ti mo kuraa ma. ²⁸ Ma bengo Yamma mo li kpang ti ku me ti shaamo ma kan man fura-fok ti ku me ti min ma shilibi. ²⁹ Maa mo paalaako ti jaklumko ye dok, shiwan ye dok. Ma mondok maa lawwaa lannako, moko beelon shii ka yen tobim. Minu ti koo nong mo benngako. ³⁰ Ma mondok maa lawwaa wee weeko, moko telo shii in meerin ken pirim. ³¹ Kaa ye ke leka memme in yuuko, ke sheeko yuun ti shinui kaa teere. ³² Mam maa ti lewii memme me leka ma, we bii shire ti piree kan mai? Longku koo me an shasshalau shinui ti lewii me lekaju. ³³ Mam maa ti ya kpangii ti me ti yuuma kpang, we bii shire ti piree kan mai? Longku koo me an shasshalau shinui ti yai kaa te. ³⁴ Mam maa ti min jani ti bara memme me ma ti nyimmina ta maan man ka foki, we bii shire ti piree kan mai? Koo me an shasshalau ti minii ti me an shasshalau, kulang in yiu bi dob-dob gbe wei. ³⁵ Pene ma lewo me an gei ma kan man yuun kpang ti shinui. Ma min jan a kan nyimmo we ta meerum, kan we shik shuranma ta yooro kan gbai, kan ma ta yooma shibano Mo ti ku-dang Bak, longku shi po kuuni mon kpang ti piree kan me an-shik kan mei ti pammonim. ³⁶ Ma yooma me an kunngo, bara kaa ye Fomai mo an kunngo. ³⁷ Mo ma shiirom, kulang a ta shiiro mam, mo ma kelmom kan a ta kelmo mam. Ma fuddo ti peddi, kan ma sheema ta foddo ma. ³⁸ Ma minu, kan ta min ma. Gurang kemani in kemi shuk-shuk in ti ukkoro, ar in paaroma dogi ti ta kira lannama. Longku Gurang ye ma keraan, teerei ye ta keron man ti tai." ³⁹ Nang birang shii in sheero manni temoi ti shinui ya, "Ka an-fugum ta dum yiu toom mo an-fugum ya? Ma shii maa yuwaa, shin ding ta shuwani ti ta jwal, a kaa tem maa? ⁴⁰ La an yiu shubet a yeko mo an shubetni gbam, pene koo nong ye shii maa yikka shubet kping, ta yooni kaa an-shupponi. ⁴¹ Longku wen yeke ti geeko kattan jimit ye ti adoono molko, pene kei peno ka gbong biro ti ado sheekommi? ⁴² Ka yee ke ta tewani ti molko ka, 'Mollo, shero mo ne forko la jimit ye ti adooko, 'pene ke sheeko tida kei for gbong biro ye ti adookommi? Ke mo an wawo ado! For gbong biro ye ti adooko tida, kan ken tang weyani kpang ka we for jimit ye ti adoono molko. ⁴³ Longku adoo biro yen kpang ti sheelo shiili ye ommanim, kan adoo omman biro ye ta sheelo shiili yen kpangum. ⁴⁴ Longku koo biro shire ti pen tei ti bi shiiliro ye sheelaa. Longku memme a ti yokko dugni ti shik kpaka-dilingum, koo shinui in yokko inaabi ti shik twaalem. ⁴⁵ Niyo yen kpang ti yai wee yen kpang, gee niyo ye shek ti yai piire-we longku wee ti poshaarii a yen kpangum. Wee kemii ti poshaari teerei wee ta peru ti ku-fokni. ⁴⁶ "Longku wen ma ti yeeno maa, 'Fo-mina, 'Fo-mina kan kpat ma ti murku ti wee ne tekam mi? ⁴⁷ Koo nong mo wanna shikno kan in ti ke-kumoni ti shik paarono in ti murin-ku ti paaroi, Ne ta teuma ka yee shii ta yoonii. ⁴⁸ Shii kaa niyo ye diga mina, mo oppaa ta buk kan joorii in teron kel-mina ti ku sheela men bang. Koddi ye shum-shiiruk kemna, doo in waru in wa tura minai, pene a dum yikro shikim, longku niyoi diga kpang. ⁴⁹ Pene niyo mo ti yaaro paarono kan a ti murin-ku ti shinuim, shii kaa niyo ye diga mina ti bama-buk a doo kelim. Koddi ye shum-shiiruk wanna in tura minai, kpantidi in vubroro, kan daklan mina teere ta yooroi foki-dok."