¹ Wende in yooro ye memme in ti gallu ti jeleno Yeesho kan in ti yaaro paaro Yamma, shii shereni ti jele shakya Jenishereeta. ² Shii in we shik gong-doo palau ye shenrii ti po-ganra shakyai. Pebraan ti tai ta me an yippo shirim in ti fudiro shik jaju. ³ Yeesho in reeni ta dok gong-dooi, yei sheeno Shimon kan in beng shii mo la sheno guni ti ta dooi la-wiiu kan ku-buki. Nang shii in deeni dii ti tai kan in yiu shuppon memme. ⁴ Koddi ye shii wiila poya paaroi, shii in tewi ti Shimon ya, "sheno gongi we war pirin joori ti ta dooi kan ken ving ja yiu shirimko ken tollu shirim." ⁵ Shimon Biiturush in liginna ya, "Fo-mina, min wiila yippa po te min ti ku taa shilibi minui wa wen, pene gee kaa ye ke tekan, ne ta vingin jano ti ta dooi." ⁶ Koddi ye shinui yuwaa kaa te, shinui yippuro shirim gbe, ar jaju in yiu bebrero. ⁷ Longku kaa te nang shinui in aplo me-shaaju me ti ta yen dok gong-dooi ka we waraa shauju. Shinui in waru kan in kemro ta gongi ding, longku gbe shirimi, gongi in yiu shaaju gun dooi. ⁸ Pene koddi ye Shimon Biiturush weyaa shik we te, shii in juunani ti toomno Yeesho in tewi ya, "Wesshono ta Fo-mina, longku nei mo an shasshalau." ⁹ Longku shii kan me shaani shinui yuwaa maam ka yippan shirim gbe ye shinui shanna. ¹⁰ Tenei ma Yaakubu kan Yuwaana, shibano Jabadi, me shinui me an-jeereno Shimon. Yeesho in tewi Shimon ya, "Wessho ya shewoi, longku we yikka booi we war toom ke ta yippanii memme a shirimum." ¹¹ Koddi ye shinui shenna gongju in giirin po-gangrai, shinui in wessho koo wen in yiwaju biinii. ¹² In yooro ye Yeesho tida ti tarang manni gok-minai, ka manni niyo ye kan pira baluk ti po teere. Koddi ye shii weyaa shikno Yeesho, shii in juunani kuwan-kwi ti buk in beng shii ya, "Fo-mina, ke maa leka, ke ta dum tasshono." ¹³ Nang Yeesho in shou kirani in tawin shiknii, in ti tewi ya, "Ne leka. Tasshoko." Kpangtidi baluki in wessho shii. ¹⁴ Shii in pekro niyoi ya mo peemo wessho tewani koo niyo doki, Pene kooko, ken wa shuk kuuko ti me ankpaa kan ken min ding-ta-kira we fuddani, kaa ye shorono pekraan, longku in yooro we jimro ti shinui." ¹⁵ Pene shinnyii in wangro koo tong ar kan piri tali, kan gbong jima memme in yiu gallu ka we yaaro shii ti ku shubet kan in tassho aginju. ¹⁶ Pene manni koddii shii ti wessho po teere in wanni piree adoo niyom ka we fur-fok ¹⁷ Manni darangi Yeesho ti ku shuppani, ka Parishaawa kan me an-shubet ti ta shoro dijiyii ti po teere me shinui wanginna ti meno-mina me ti Galiili kan Yawuudiya kan Urshaliima. Kumenno Fo-mina ka we tasshanii ka we ti shiknii. ¹⁸ Wende peddi shwijii kan sharan niyo ti ku irau ye kuulei, kan shinui in gassho ye shin po riirin ka shii kulang shinui in kanno shii ti toomno Yeesho. ¹⁹ Shinui a dum we koko ye shi ta riirin ka shiim longku jimai, longku kaa te, shinui in ammaju daalan-ku mina kan shinui in shorin shwijii ding kan irauni in li shii kpantidi ti shakki memme ti toomno Yeesho. ²⁰ Bara ye Yeesho geeka lishaarijui, nang shii in tewon ti mo kuttii ya, "Jeereno, fuddaako shasshalauko. ²¹ Me an-shubet ti ta shoro kan Parishaawa in yiu yuyyo telyo ya, "Duma leyyei nong ye ti ya paaro bek ti Yamma kaa tei? Ta fuddo shasshalawii nong in maa bara Yamma shi doknim mi?" ²² Pene Yeesho, mo fuwaa po pen nyimmojui, nang in tel shinui ya, "Longku wen ye ma ti ku tenglo kuuma ti poshaari ma kaa tei? ²³ Yekai shiri yen tewi ya, 'Fuddaako shasshalauko, ' kan yen tewi ya, 'Illo, ke merei? ²⁴ Pene kulang man peni La Niyo kan kumen ye Yamma shunna fooraa in fuddo shasshalau ti ku-buk." shii in tewi ti niyo ye kuulei ya, "Ne tekako, illo, ken shar irauko ken warko minako." ²⁵ Kpantidi shi in illina ti toomjui kan in shar irauni ye bo shii kuttiin ti kwii. Nang shii in kooni war minani, in ti kum pinno Yamma. ²⁶ Koo nong in ya maam kan shinui in kum pinno Yamma. Shewo in yiu shinui, in ti tewi ta shinui ya, "Min weyaa shik manni bino wei." ²⁷ Ka bi yaan wen shurme te, Yeesho in peri ti po teere in we shik an yiu kine-buk ye shommonii Leewi, deeni ti ta tam po yiu kine-buk. Yeesho in tewi ya, "Yiru biino." ²⁸ Longku kaa te Leewi in illina in yiu biinii, in wessho shuranni she yiu kine-buk. ²⁹ Nang Leewi in ye gbong temre ti ta minani ka longkuuno Yeesho. Ti po teerei ka me an yiu kine-buk gbe kan peddi memmei me diin ti ku dangla sha weshiinai kan shinui in ti sha kan shinui. ³⁰ Pene Parishaawa kan me an shubet shoro me shinui ti ku ya nyitti in ti tewi ti me an yiu-shubetnii ya, "Longku wen ma ti sha kan sheyani kan me an yiu kine-buk kan me an shassshalawii?" ³¹ Yeesho in lignon ti shinui ya, "Memme me shikju bang a lewo mo an-gunulum, bara me shikjui bangum. ³² Nei warui ye me mereju dobum, penei me an shasshalau kulang in for-fokju." ³³ Me an-toom ta mina wawo in tewi ti Yeeaho ya, "Me an yiu-shubetno Yuwaana manni koddi ti yiu-fok kan fur-fok, kan me an yiu Parishaawa ti yai kaa te. Pene me an yiu shubetko shinui in ti she kan in ti sha a doo berantaim. ³⁴ Yeesho in tewon ti shinui ya, "Ka muyo mo ta li me an war po ya diyaa in yiu-fok ye tida mo an-diyaa maa ka shaayi kan shinui ya? ³⁵ Pene darangi ta waru koddi ye ta sharin mo an-diyaai ti piree kan shinui, nang ti ta darang teere shinui ta yiu-fok." ³⁶ Nang Yeesho birang in yuun paaro ka temyan ti shinui ya, "A doo mo ta peero fok lanna ti shik gbong lanna yen fo in toonon yen koorom. Maa yuwaa kaa te, shii ta jaaro gbong lanna yen foi, kan peeran-fok lannai ye ti shik gbong lannai a ta diyani kpang kan kooro gbong lannaim. ³⁷ A doo mo ta der doo inaabi yen fo ti ta kooro luru-lakat we-ta-gunum, ma shii maa yuwaa kaa te, doo inaabi yen foi ta jaaro lurui kan doo-inaabii ta derero, kooro luru-lakat we-ta-guni in dakloro. ³⁸ Pene doo-inaabi yen fo yikka ti gbare-do in der tei ti ta luru-lakat yen fo. ³⁹ A doo mo ta leu doo-inaabi yen fo ka bi ye sheyaa peere doo-inaabiim, longku shii ta tewani ya, 'Yen kooroi yeka kpang.' "