¹ Nang Yeesho shinna ti shiiruk Urdun kemii ka Shoomno Yamma. Shoom in warin shii ta shwee, ² ti piree shuuro ta nawin shii po shaklo naa-peereu. Shii a shu we ti ta shaklo shurme, kan ta wiilani ti ta koddi teere kpiyam in yiu shii. ³ Nang Shuuro in tewon ti shii ya, "Ma ke maa laano Yamma, shiwan shiila me in yooju we-ta-kele." ⁴ Yeesho in lignon ti shii ya, "Ballii ti ta paaroYamma ya, 'A ku jal ka weshiina waani ye niyo ta kpirinum.' " ⁵ Nang shuuro in ammon Yeesho manni pirii yen joori kping in shukyon po ya-gub ku-buk ti ta koddi la-wiiu. ⁶ Shuuro in tewon ti shii ya, "Ne ta minko gub ti ku we te ding kan kpangro, longku ye minnano we te ding, kan ne ta minani ti mo ne leka. ⁷ Longku kaa te nang, ke maa ta juunani ti toomno ken wauno, ta yooju weeko." ⁸ Pene Yeesho in lignon ti shii ya, "Ballii ya, 'Ke juuna ti Foko Yamma, kan ke ta wau shii shi ku dokni.' " ⁹ Nang Shuuro in warin Yeesho Urshaliima kan in ammon shii won piren joori ti ku Mina Yamma kan in tewon ti shii ya, "Ke maa Laano Yamma, nyaattu shikko ti wono. ¹⁰ Longku ballii ya, 'Shi ta li me an shurani, in jooro kuuko,' ¹¹ kan, 'Shinui ta shokroko ti ku kiraju, kulang ke ta tura shooko ka shiilam.' " ¹² Ti po lignon ti shii, Yeesho in teewi ya, "Tenna ya, 'Moko nau Fo-mina Yammam.' " ¹³ Bara ye shuuro fuwaa po nau Yeesho, in shemo kooni in wessho shii we war manni koddii. ¹⁴ Nang Yeesho in meeni Galiili ti ta kumen Shoom, kan shinnyi kuunii in fu ta piri ti koo tong ti ta kpakan po buki. ¹⁵ Nang shii in yiu shuppani ti ta mina fur-fokju kan memme ding in ti kum pirnii. ¹⁶ Shii in waru Naajeret, piree shii kpiraan, kan ye kaa ye shii ti yuun, shii in ri ta mina fur-fokju ti ku Darang Nessho Yawudaawa kan shii in illo shikni ka we ya maari ka ele yen bang. ¹⁷ Shinui in minin lawan lakardano an-pigra Isheya ti shii. Shii in au ta lawani kan in we manni pirii ye ballaan ya, ¹⁸ "Shoomno Fo-mina ti kuuno, longku shii sheennano ka we kpaalo po shinnyi yen tomon ti me an kenni. Shii shunnano nen kpaalo po nessho timeti ta mina muruk kan nen au ado me an fugum, nen min nessho ti me ti ta shilibi, ¹⁹ nen kpaalo pi sheno ye Fowi Yamma ta liin kpang ti ku memmeni." ²⁰ Nang shii in lawin do lakardai tipiri, shii inmin ti mo an geren minai, kan in deeni dii. Me ti ta mina fur-foki shinui in ukkon ado ti shii. ²¹ Shii in yiu yuun paaro ti shinui ya, "Booi paaro Yamma kennga ti ta kumo ma." ²² Koo nong ti po teere in ya paaro yen kpang ti kuunii kan shinui in yaa maam ka kpattirin pa-paaro me ti ku pe-pittin ti ku foknii, kan shinui in ya telyo ya, "Duma tei laano Yushubu maa?" ²³ Nang shii in tewon ti shinui ya, "Kulli ma ta yuuno shiwan-do paaro te, ye ya 'An-gunul, ninngo shikko. We maam ding ye min yaaraa ke yuyyina ti Kapanaawum, yuuro kaa te ti gok-minako.' " ²⁴ Pene shii in men tewon ti shinui ya, "Kulli ne teka ma, adoo an-pigra ye memme ta kumani kan shi ti gok-minanim. ²⁵ Pene yen kulli ne ta teuma na ka shereb kolo gbe ti Ishereila ti ta koddino Ilya, koddi ye ko-dang nummaaro fo sheno tat kan tere paragbanang a ti ya doo ku-dangum, gbong kpiyam-doo in waru ku me ding ti ta buki. ²⁶ Pene Ilya a shur gunnii ti shik manni niyom, penei ti Jaripat ti Shiidon, ti shik paamun kolo ye dii ti po teere. ²⁷ Birang ka me an baluk gbe ti Ishereila ti ta koddino Ilisha an-pigra, pene adoo dok ti shakkiju mo tasshaam, bara Naaman niyo Shuuriya." ²⁸ Me ding ti ta mina fur-foki me yaaraa we te, shinui in gbanta-gongoju ti shiknii. ²⁹ Shinui in illina, ka bang in peron ka shii ta bi mina, kan in ammon shii ku gungum ta gangrung minaju ye milam, kaa te shinui leka raamuru biinii ti garak. ³⁰ Pene Yeesho in yirini shakkijui nang shii in wanni manni pirii dokro. ³¹ Nang shii in shaani Kapanaawum, gok-mina ye ti Galiili, kan shii in yiu shuppo shinui ti ku Darang Nessho Yawudaawa. ³² Shinui in ya maam shubetnii kping, longku shii ti ya paaroi kan gbong kumen. ³³ Wende ti ta mina fur-foki ka manni shwijii ye kan piire shoom, kan shii in yallina ka ele yen bang ya, ³⁴ "Wuu! Taakakoi wen kan minui, Yeesho niyo Naajeret? Ken wannai tukyomu ya? Ne penaako- kei dok shaana weeno Yamma!" ³⁵ Yeesho in pekro piire shoomi, ya, "Wessho ya paaroi! Periko ti shiknii!" Koddi ye piire shoomi biraan buk ka shwijii ti shakkijui, shii in peren nen ti shiknii, kan a liin pira ti shiim. ³⁶ Memmei ding in ya maam kping, kan shinui in yiu ya paaro ti shaayi. Shinui in ti tewi ya, "Tenei peen paaro shire kaa tei? Shii in pekro piire shoomi ka bang kan kumen nang shii shinui in pereju." ³⁷ Kaa te shinnyi kuunii in yiu fu ta piri ti dogi kpakan-fok ta buki. ³⁸ Nang Yeesho in wessho ta mina fur-foki in wa reeni ta minano Shimon. Koddii gbarumno Shimon ti ku bau agin, kan shinui in beng shii ka longkuuroi. ³⁹ Kaa te shii in wa shere nin ti ta kuuroi in pekro beewi, kan in peron ten ti shkroi. Kpantidi tei in illo shikro peeb kan in yiu yuun shuran ti shinui. ⁴⁰ Koddi ye darang ti ku shuwaro, memme wangittu shikno Yeesho ka me shikjui a ka me an peen pira peeeni-peeni. Shii in liyyo kirani ti kuuno koo nongjui kan in tajiyo shinui. ⁴¹ Pidire shoom sheeju in pepittin ti shik gbejui, in ti ya yallo in ti tewi ya, "Kei Laano Yamma!" Yeesho in pekro pidire shoomi kan in beelo shinui ya paaro, longku shinui penaa shii Kiriti. ⁴² Ta pirii maa ti kpaalla, shii in peri we war piree adoo niyom. Jima memme in yiu gassho biinii kan shinui in waru piree kan shii. Shinui in li shikju ka we foddon foki ti shii ka war manni pirii. ⁴³ Pene shii in tewon ti shinuiya, "Nennaa ti kpaalo pi shinnyi gubno Yamma ti peddi gok-minai gbe, longku tenei wee shunnan nen ti kwi ti po te." ⁴⁴ Nang shii in yiu shuppani ti ta mina fur-fok me ti ta buk Yawuudiya ding.