¹ Ti ta sheno kpumu gee-fuwat ti ta gubno Tibeeriya, Buntush Bilaatush gub Yawuudiya Iriidush ti ya gub Galiili, Molli ta Pilibush ti ya gub Ituuriya kan Tarakuniitash, Lishaaniyash ti ya gub Abiiliya, ² ta koddi ye Anaana kan Keyaapash men gbidina ankpaa. Ta koddi te, pene paaro Yamma in waru shikno Yuwaana laano Shakaariya ti ta shwee. ³ Yuwaana in wangro koo tong ti jele shiiruk Urdun, shii in ti kaawo paaro yulma for-fok ti shinui longku fuddo ding shasshalau ⁴ Kaa ye ballii ti ta lakarda paarono Isheya an-pigra ya, "Ele niyo ti ku ya yee ti ta shwee, 'Ma limma do koko ti Fo-mina, man shupro shik kokoni dob. ⁵ Ta kemro ta gida ding, kan koo sheela kan gungum shire ta dodirani kan meklan do koko ta shupro shiki ta limyo do koko ye daklaaro longku in ya yen kpang, ⁶ Kan memmei ding ta we shik mar-kuuno Yamma.' " ⁷ Longku kaa te Yuwaana in tewi te memme me wanna longku in yuuju yulma ya, "Ma gbuman ku shiba shammam! Pekinna mai nong, ya ma yoppo den ye ta warui? ⁸ Longkuuno te, ma sheelo shiili ye ta shuklani ma foddaa fokma ka shasshalau, mo ma nyimmo ti poshaari ma maa, 'Ibiraayii fomai.' Ne ta teuma Yamma fooraa ya shiba ti Ibiraayi ka shiila me. ⁹ Koo wendei, fuwaa po liin gbaamei ti shoorin biroi. Longku kaa te, biro yei sheelo shiili yen kpangum, ta keyani in vingi ti ta deet." ¹⁰ Nang jimai in yiu tenglo shii ya, "Minui ta ya wen?" ¹¹ Shii in lignon ti shinui ya, "Ma mondok maa kan lanna palau, mo bwaaro kan moi kan tem. Mo kan weshiina shi sheeni in ya kaa te." ¹² Me an yiu kine-buk me shinui wanna longku in yuuju yulma, kan shinui in tel shii ya, "An-shubet, minui ta ya wen?" ¹³ Shii in lignon ti shinui ya, "Mo ma yiu kine gbe in kooro ti fok wee ya ma yiwii." ¹⁴ Peddi me an bee deet shin sheeju in tel shii ya, "Min sheemu paa? Minui ta ya wen?" Shii in tewon ti shinui ya, "Mo ma lawwo kine ti kirano koo nong ka bangum, kan mo ma yu shaba ti kuuju ye kurooju min mam. Ma pammo ka wee ti anngon man." ¹⁵ Wende kaa ye memme ti ku gee ku waranno Kiriti ye Yamma ta shuru ka we waru, koo nong in ti ya tarba-tarba ti poshaarini ti kuuno Yuwaana, koo shii Kiritii ya. ¹⁶ Yuwaana in lignon ti shinui shin ding ya, "Kaa sheeno, ne ta yuuma yulma ka doo, pene ka mo ta waru mo yekano gba, kan nei ta dum piddo fwaala taanim. Shii ta yuuma yulma ka Shoom Yen Shaana kan deet. ¹⁷ Shii yiwii kan we dekro weeni ti ta kirani, shii ta dekron shauni ding, birang in ganglo-do shawi in gali ti ta kang. Pene shii ta kur jongrangi ka deet yei ti dum bittanim. ¹⁸ Kan peddi pekroi gbe, Yuwaana in ya kaawi shinnyi yen kpang ti memme. ¹⁹ Koddi ye Yuwaana pekraa mo an-toom Iriidush ka longku shi Iriidush diga Iriiduya manna molli. Birang shii in yuyyo peddi sheki gbe, ²⁰ Iriidush in tokko shaarii ti shinui ding, ye shii nummaa Yuwaana ti ta mina-muruk. ²¹ Wende in yooro ye koddi ye fowaa po ya yulma ti memme ding, in ya ti Yeesho sheeni kan kodii ye shii ti ku fur-fok, ku-dang in aworo, ²² kan Shoom Yen Shaana kaa ammaluk in shaarin ti kuunii, kan ele in peru ti ku-dang ya, "Kei Laano, mo ye ne leka. Ne ti sha tomonnii kping." ²³ Koddi ye Yeesho liyaa gun shuran shubetni pelle kan shene naa-tat. Memme liyaa ya shii laano Yushubu yei laano Eli, ²⁴ Eli laano Mataat, Mataat laano Leewi, Leewi laano Malki, Malki laano Yanna, Yanna laano Yushubu. ²⁵ Yushubu laano Mataatiya, Mataatiya laamo Emuj, Emuj laano Naawum, Naawum laano Ajaaliya, Ajaaliya laano Najaaya, ²⁶ Najaaya laano Maata, Maata laano Mataatiya, Mataatiya laano Shimeya, Shimeya laano Joshek, Joshek laano Yawuda. ²⁷ Yawuda laano Yuwaana, Yuwaana laano Reesha, Reesha laano Jerebebel, Jerebelel laano Shiyeltiyel, Shiyeltiyel laano Neeri, ²⁸ Neeri laano Malki, Malki laano Addi, Addi laano Kosham, Kosham laano Almadam, Almadam laano Eer, ²⁹ Eer laano Yasshi, Yasshi laano Eliyaajar, Eliyaajar laano Yorima, Yorima laano Mattat, Mattat laano Leewi. ³⁰ Leewi laano Shimiyon, Shimiyon laano Yawuda, Yawuda laano Yushubu, Yushubu laano Joonam, Joonam laano Eliyaakim, ³¹ Eliyaakim laano Malya, Malya laano Menna, Menna laano Mataata, Mataata laano Naatan, Naatan laano Dauda, ³² Dauda laano Jesshe, Jesshe laano Obiida, Obiida laano Buwaj, Buwaj laano Shalmon, Shalmon laano Naashon. ³³ Naashon laano Aminadad, Aminadad laano Admin, Admin laano Arni, Arni laano Asharuuna, Asharuuna laano Fereesha, Fereesha laano Yawuda, ³⁴ Yawuda laano Yaakubu, Yaakubu laano Ishaako, Ishaako laano Ibiraayi, Ibiraayi laano Teera, Teera laano Naawor, ³⁵ Naawor laano Sherug, Sherug laano Reeyu, Reeyu laano Peleg, Peleg laano Eber, Eber laano Sheela. ³⁶ Sheela laano Kenan, Kenan laano Arfakahaad, Arfakshaad laano Sheem, Sheem laano Nubu, Nubu laano Lamek, ³⁷ Lamek laano Metusheela, Metusheela laano Anufu, Anufu laano Yaared, Yaared laano Kenan, ³⁸ Kenan laano Enush, Enush laano Shiitu, Shiitu laano Adamu, Adamu laano Yamma.