¹ Ti ta shaklo shurme, Keeshar Agushta minaa paaro ya mo ballo memme ding ye ti ta gun gub Rooma. ² Tenei balla ye ka toom ye yuwaa koddi ye Karniyush ta ya gub ti ku-buk Shuuriya. ³ Kaa te memme ding in meeju gok-minaju longku in balloju. ⁴ Yushubu in illina ti ta buk Naajeret ti shakki Galiili in war gokmina Baitalaami ti shakki Yawuudiya ti ta gok-minano Gub Dauda, Yushubu in war won longku shii ta minano Dauda. ⁵ Shii in kooni kan Maryamu ye deewaa-kuuro shinu ta ya diyoo, longku in ballo shinui ka shaayi. Koddi teerei kan uu ta tei. ⁶ Koddi ye tida shinui ti Baitalaami shaklo pariro in yooro. ⁷ Tei in patto la newero in dawi ka lanna dau la in li shii ti po shaklo ti ta gong, we min we-shiina we-ta-gun longku shinui a wa gume ti po duroim. ⁸ Ti ta buk teere, ka me an tii we-ta-gun kuttii ti ku-dam in ti gee dinnyiju ka yippo. ⁹ Kpantidi, gee an shuranno Fo-mina Yamma in perin ti jelejui, birang shokranno Fo-mina in ee shikjui nang shewo in yiu shinui kping. ¹⁰ Nang an shurani in tewon ti shinui ya, "Mo ma yu shewom, ma yaaro, ne wanna ka paaro yen kpang ye ta li memme ding ya gbong beere kping. ¹¹ Booi te, ti ta gok-minano Dauda! pattaa ma An mar ku, shii kiriti Fo-mina! ¹² Tenei ye ta shukma, ma ta we la daka shiki ka lanna mooli in li shii ti ta we min we-shiina we-ta-gun." ¹³ Kpantidi, gee galan jima me an shuran ti ku-dang, in peru kan in ti wau Yamma in ti tewi ya, ¹⁴ "Shokrani ti Yamma ti ku-dang, kan mo kuttan shaari deeri ti ku-buk ti shakki memme shii ti sha tomonju." ¹⁵ Ma me an shurani maa ti wessho shinui, in meeju ku-dang, nang me an tii we-ta-guni in tewi ti shaayi ya, "Ma shero wende kama war Baitalaami kama in wa gee wee yuwaaro ye Fo-mina tekamu kama." ¹⁶ Shinui in koona peeb, in wa we Maryamu kan Yushubu, kan lai, ye kannii ti po shaklo ti ta gong, wee ti minin we-shiina ti we-ta-gun ti tai. ¹⁷ Ka bi ye me an tii we-ta-guni weyaa shiknii, shinui in sheero pi wee an shuranno Yamma tennan ti shinui ti ku lai. ¹⁸ Me ding me yaaraa sheer te, nang in yiu fokju, in yuun maam kan wee me an tii we-ta-guni teka. ¹⁹ Pene Maryamu in yiu wei ding in ti yuun nyimmo ti poshaariro. ²⁰ Me an tii we-ta-guni in meeriju, in ti mun gba kan wau Yamma longku wee ding shinui yaaraa kan we shiki, bara kaa ye me an shuranno Yamma tennan ti shinui. ²¹ Koddi ye lai yuwaa shaklo pididau, koddi ye karaan kuwoi, in liin shommo ti shii yaa Yeesho, shommo ye me an shuranno Yamma minnan ti shii in tang waraa yuun uunii. ²² Koddi yuwaa ye Maryamu kan Yushubu ta ya wee shorono Muuja teka yamo yu, longku nyik la, nang in shar Yeesho in warin Urshaliima longku in mini ti Fowi Yamma. ²³ Kaa te ye ballii ti ta shorono Fo-mina ya, "La newe yen shwiji ding ta tewani ya nyika shii ti Fo-mina." ²⁴ Nang shinui in kur-we kaa ye gasshaa ti ta Shorono Fo-mina ye teka ya, "Ammaluk palau koo bakri palau." ²⁵ Kpantidi, ti ta koddi te ka niyo deeni ti Urshaliima ya shommonii Shimiyon shii niyo an kunngu an wau Yamma, birang in ti dangku darang ye ta kem shaari Ishereila, kan Shommo Yamma ti shiknii. ²⁶ Shoomno Yamma shuklaan ti shii ya a ta muranim peemo maa wa shikno kiriti ye shii dok shakan weeno Fowi Yammam. ²⁷ Shoom in shuulo shii in reeni ta kudam ta mina Yamma ti ta koddi ye me an patto Yeesho wannan ka shii ti ta mina Yamma longku shinui in ya kaa ye shorono Muuja teka ya mo yu. ²⁸ Pene Shimiyon in yiu lai ti kirani in pammina ti Yamma ya, ²⁹ "Wende ai Fo-mina, ken li bi shooko bang, kaa ye ke kunngan piri. ³⁰ Longku adoono weyaa shik mar-kuuko, ³¹ ye ke limmaa ti toom memme ding. ³² Aaro ye ta shukloko a ti me Yawudaawam birang in waru ka shuk gbe ti memme Ishereila." ³³ Fowii kan non lai in yiu fokju, in ti ya maam ka wee Shimiyon tekan ti kuunii. ³⁴ Shimiyon in liin kpang ti kuujui, in tewi ti Maryamu non lai, "Yaaro, Yamma shaka lai longku shuwot kan ilit memme ti Ishereila kan we shuklonii tekan ti kwi. ³⁵ Kaa we te, wee lattii-lattii ta peru. Wee shee te ta perji ka agerum ye ta kpe poshaariji. Longku shii ta au-do wee memme ti nyimmina." ³⁶ Ka manni kooro an-pigro ye shommoroi Annatu laano Fanuwel ti po peenno Aashiru. Tei kan mannaro sheena parilau waani. ³⁷ Nang tei paamun kolo. Wende shenero naa- pididau kan peereu. A ti wessho ta mina Yamma ta teim, ti tuumina ti toomno Yamma yippo kan darang ti fur-fok kan kura sha we-shiina ka darang. ³⁸ Dob-dob koddi te, nang tei waru nimmi kan shinui, in yiu pammina ti Yamma, birang tei in ya paaro ti ku lai ti me ding ta dangku Yamma in for Urshaliima ti ta shilibi. ³⁹ Ma Yushubu kan Maryamu in wiilo ya wee ding ye shorono Fo-mina Yamma teka, nang in meeju minaju Naajeret ti Galiili. ⁴⁰ Lai in kpiri in ya bang, kemii kan shen ta shii, kunnguno Yamma birang ti kuunii. ⁴¹ Shene ding me an parino Yeesho ti war Urshaliima longku Peewe Teelani. ⁴² Yeesho maa ti kem shene kpumu gee palau kan pattanni, nang shinui in waraa ya peewe kaa ye ti ya shene-shene. ⁴³ Ya peewei maa ti fuworo, in koo meeju mina, pene Yeesho in deeni ti bi ti Urshaliima, pene a kan penanjum. ⁴⁴ Shinui birang ti nyimmina ya ti shakki jimo memme, longku kaa te in ya mere shuwo darang dok. In yiu gassho bi ti shakki po-peenju kan me an jeereju. ⁴⁵ Koddi ye shinui a wa shiim, longku kaa te shinui in meeju Urshaliima kan in yiu gassho biinii ti won. ⁴⁶ Ti ku darang an tat in we shii ti ta mina Yamma deeni ti shakki me an shubet. In ti yaaro shinui kan tenglo shinui. ⁴⁷ Shin ding me ti yaaro shii, in yiu fokju, in ya maam penanni kan ye ti lignon. ⁴⁸ Koddi ye me an-patto shii weyaa shiknii, shinui in ya maam weyan shiknii ti po te, nang nonnii, in tel shii ya, "Laano, longku wen ke yuwaamu kaa tei? Gee, foko kan ne min balaa kping ta gassho biiko." ⁴⁹ Shii in lignon ti shinui ya, "Longku wen ma ta gassho biinoi? Mai peno nennaa nen deeno ti ta minano fono maa?" ⁵⁰ Birang shinui a peno piree paaroni liyaan kuurom. ⁵¹ Nang in illina in yiu biijui, in meeju Naajeret ka shaayi, in yiu ya wee me an-parini teka. Nonni birang in yiu wei ding ti poshaariro. ⁵² Pene Yeesho in kpiri ti tokko shaari kpira kan pen-we, Yamma in leu shii kan memme.