¹ Memme gbe liyaa shikju ka we te ye yuwaaro ye kenngari ti shakkimu kama, ² Bara kaa ye sheeraa mu kama ti piree me shinui weyaa shik wee yuunaro ka adooju kan shinui me shiba me an-shurani. ³ Longku yuwaa kpang ti piree kan nen, longku ne yippaa gun wei ding ti liyan guni, na ne ballo kaa ye tei ka longkuuko, ta mongba Tiyaapolosh, ⁴ longku ken pen kulli wei ye shuppaan ken. ⁵ Ti ta koddino Iriidush gub Yawuudiya, ka manni ankpaai shommonii Shakaariya ti ta bwatta ta me ankpaa ye ti ta gunno Abiija, mannani ta Alishabatu te sheeroi po-peenno Aruuna. ⁶ Shin ding merejui dob-dob ti toomno Yamma, shinui ti yiu bi shoroi kan waarino Fo-mina. ⁷ Pene shinui a kan lam, longku Alishabatui jemra, kan shinui shin ding kodirooju ti ta koddi te. ⁸ Wende koddi ye Shakaariya ta riin toomno Yamma, ka we ya shuran kaa ye bwaari ta ankpaa sheeni shuka. ⁹ Kaa ye waari kunnga ye po shakin ankpaa ye ta ya shurani, in shak shii ka ving kaari mo ri ta mina Yamma ka we kur ding-ta-kira. ¹⁰ Jima memmei ding ti ku fura-fok ti peewe ti ta koddi ye ti ku kurin ding-ta-kirai. ¹¹ Kpantidi an-shuranno Yamma in keru doonii kan in shereni ti ku kira temme po li-dungoi. ¹² Koddi ye Shakaariya weyaa shiknii, shii in gbaral, kan shewo in yiu shii. ¹³ Pene an-shuranno Yamma in tewon ti shii ya, "Wessho ya shewoi ta Shakaariya, longku yaaraa fura-fokko. Mannako ta Alishabatu ta pattoko la. Ke ta ye shii ka shommo Yuwaana. ¹⁴ Maa pattaa, ke ta ya beere kan twaalan shaari kan memme gbe ta shuk twaalan shaari longku lai. ¹⁵ La ye ta shiwani mongba ti toomno Fo-mina Yamma. A ta she doon shwang kan wee ta daklo nyimmonim, ta kem shii ka shoomno Yamma ye tidai patto shiim. ¹⁶ Ta meeru ka poshaari Ishereila ti shikno foju Yamma. ¹⁷ Ta koo toom fowi mongba, in ya shuran ka shoom kan bang poshaari kaa ye Iliya an-pigro yuwaa. Ta waru ka diya yen kpang ti shakki me fowi kan shiboju. Ta meeru ka memme an bangku in wessho memmen kpang, kaa te ta limmo memme ti fowi mongba. ¹⁸ Shakaariya in tel an shuranno Yamma, 'Ne ta pen wee ke tekai ka yee ta yooroi? Gee nei kooroi mannano sheero kaa te" ¹⁹ An shurani in liginna, "Ne Jibriilu ye sheeri ti toomno Yamma, birang shunnano ne yuuko paaro nen teuko kpang paaro te. ²⁰ Pene wende ke ta ya yititi ke ta ya paaro birangum, we war koddi ye wei yuwaan, longku ye ke kum paaroim, ye ta yooro yen kulli ta dob-dob koddirom." ²¹ Wende memme ti ku gee kuuno Shakaariya, ti ya tarbo-tarbo ti poshaariju, longku wen ta diiru bak ti ta mina Yowo Yammai. ²² Bara ye penna, a dum yuun paaro ti shinuim. Nang in peni ta shinui ya kergum weena shik jirim ti ta mina Yowo Yamma. In yiu temyo wei ti shinui, pene a ta dum ya paarom. ²³ Pene koddi wawo sheeni maa ti fuworo in meeni minani. ²⁴ Ka biino teerei, mannani ta A lishabatu in yooro kan uuro, in ti latto kuuro po tere fuwat. ²⁵ Alishabatu in tewi ya, "Fowi Yamma yuwaano kaa te," in tewi ta tei, "Ti shakki shaklo te, shuklaano lewanni in shemo yaaro kwiino, in bwaarono kan kenni la ti shakki memme." ²⁶ Ti ta tere an paragbanang, Yamma in shuru an shuran Jibriilu ti Naajeret, gokmina ye ti Galiili, ²⁷ ti shik la-paamun, ye ti ku gasshani ka we digani ta manni la-shwijii shommonii Yushubu, po peenno Dauda. Shommo la-paamunii Maryamu. ²⁸ An shurani in war shikroi ya, "Twaalan shaari, ye shi weyaa kunngu! Fowi Yamma ti shikji." ²⁹ Kuuno Maryamu in shiworo poshaarii in illoro kping ka peen kaa te. ³⁰ Pene an shurani in tewon ya, "Wessho ya shewoi, ta Maryamu, shi weyaa kunnguno Yamma. ³¹ Gee shi ta yooji kan uuji, shi ta patto la, shin liin shommonii 'Yeesho.' ³² Ta shiwani niyo mongba, birang ta tewani yaa Laano Mo ti ku dang Bak. Fo-mina Yamma ta minin ti shii ku gburmi gubno foni ta Dauda. ³³ Birang, in ya gub ti ku minano Yaakubu po-ding, po ya Gubni a ta wiilanim." ³⁴ Maryamu in tel an shurani ya, "Ta yooro ka tei ka yee pene tida nei la-gejei?" ³⁵ An shurani in liginna ya, "Shoomno Yamma ta shaaru ti kuuji, kan kumen gbano Mo ti ku-dang Bak ta nummoji kuujii. Longku wee ta pattanii we shor shiki, ta yeyani yaa Laano Yamma. ³⁶ Alishabattu sheero ta we la ti ta koororo, birang ye yaa jemra, pene ta tere an paragbanangro. ³⁷ Longku ye a doo wee ta yek bangno Yammam." ³⁸ Maryamu in liginna, "Ne la-paamun shookno Fowi Yamma. Mo yooro ti kuuno kaa ye ke tekan." Nang an shurani in wessho tei. ³⁹ Ta koddino teere Maryamu in illina in war gokmina ye ti ta sheela kpakan po-buk Yawuudiya, ⁴⁰ Tei in wa ri ta minano Shakaariya in ya kaa ti Alishabattu. ⁴¹ Alishabattu maa ti yaaro kaano Maryamu, nang lai in middon shikni ta aaroi, kan Alishabattu in kemero ka shoomno Yamma. ⁴² Tei in shokro elero ka bangi ya, "Shii niyo yen kpang ti shakki shereb, la ye shi ta patturu kpang ti kuunii. ⁴³ Pene longku wen yuwaano ween kpang kaa tei, nonno Fo-mina ta waru shiknoi? ⁴⁴ Longku ne maa ti yaaro keleji riyaa ta kumono, la ye ti ta aano in bee shikni longku beere. ⁴⁵ Shii niyo yen kpang ye kunnga ka shuranno Fo-mina Yamma ye shunna ta kemoro yen kulli" ⁴⁶ Maryamu in tewi ya, "Kerangno ti ku wau Fo-mina, ⁴⁷ kan shoomno yuwaa beere-beere ti taano Yamma An-markuuno. ⁴⁸ Longku nyimmaa kan ne shommoi ye nei la-paamun shookni. Longku gee, we yikka booi, ku-kira ku-kira ding ta yeeno ya nei niyo yen kpang. ⁴⁹ Longku ye shi Mongba yuwaano wee kan gbai, kan shommonii sheenaa. ⁵⁰ Kunnguni in deero ti ku me shiini ti ku-kira we war ku-kira ti me ti shi shii. ⁵¹ Ka kirani yen bang yuwaa ween gbidino, Shii wakyaa me an shokro kuuju kan wee ti liin shaari ti bi nyimmoju. ⁵² Shii in kajiyo bi shiba me an gub ti ku jukju kan in shokro me beka kuuju. ⁵³ Shii in kemro me an kpiyam kpiyam ka ween kpang, pene in li bi me an birma kira waani. ⁵⁴ Yamma in shau shookni Ishereila, longku ka we nyimmina ka shuk kunngoni ⁵⁵ (kaa ye shii teka ti ma fowonmu kama) Ibiraayim kan po-peenni po-ding." ⁵⁶ Maryamu in diina ti jeleno Alishabattu po tere tat, nang in meero minaro. ⁵⁷ Wende koddi parino Alishabattu in ya tei in patto laaro la shwiji. ⁵⁸ Me an ganglangro kan ma molonto yaaraa ya fowi Yamma shuka kunngoni ti tei, nang shinui in ya beere-beere kan tei. Longku kpangno Yamma ye yuwaan ti tei. ⁵⁹ Nang lai in kem shaklo pididau, in warin longku kar kuwoi, birang leka liin shommono foni "Shakaariya." ⁶⁰ Pene non lai in tewi ya, "Ma wessho. Ta ye shii ka Yuwaana." ⁶¹ Shinui in tewon ti tei ya, "Ti ta minama a doo mo ti ye shii ka shommo tem." ⁶² Shinui in wa tel fo lai ka kira mo temyoju shommo ye ta yoon lai. ⁶³ In temi ya mo warini ka we balla, in ballon, "Shommonii Yuwaana." Memmei ding me ti po teerei in ya maam . ⁶⁴ Kpantidi Shakaariya in we ku fok ya paaro birang in yiu wau Yamma. ⁶⁵ Shewo in yiu an-ganglangnii ding. Memme in ya shinnyi wee yuwaaro ti ku sheela gok-mina me ti Yawuudiya ding. ⁶⁶ Ding me yaaraa shinnyi te in yiu ya nyimmo in ti tewi ya, "La te ta yoonii wen?" Longku kirano Fowi Yamma ti shiknii. ⁶⁷ Foni ta Shakaariya kemii ka shoomno Yamma in ya pigro ya, ⁶⁸ "Kpangii weeno Fowi, Yamma memme Ishereila, longku wanna in shawi kan in for memmeni ti ta shilibi. ⁶⁹ Shii in minmu kama an-marku mongba ti ta minano shookni Dauda ⁷⁰ (kaa ye teka ti ta fok me an-pigrani me sheenaa yau.) ⁷¹ Marku ti kira me an geimu kama kan ta kira me kurooju kama. kan ti ta kira me kuraamu kama ding. ⁷² Shii in shuk kunngoni ti ma fowonmu kama kan in nyimmo sheenan deewan-kuuni, ⁷³ Yaan pammi ye yuwaa ti fomu kama Ibiraayim, ⁷⁴ Shii pammaa-we ya shii ta minmu kama, ya shii fuwaa po formu ti ta kira me an geimu kama, kama ta wau shii adoo shewom ⁷⁵ kama in deemu ta shaana kan dob-dob ti toomni ta shaklo mu kama ding. ⁷⁶ Oo, kan ke, la, ta yeeko ka an-pigro Mo ti ku-dang Bak, longku ke ta yuuru toom ti Fo-mina ken limmo do kokoni, kawe limma memme ka longku shiwanni, ⁷⁷ in min penan mar- kuuni ti memmeni longku ka we fuddo shasshalauju, ⁷⁸ Tene ta yooro ka longku shuk kpang kunngono Yammamu kama, longku aaran darang ta aatu kuumu kama ti ku-dang ye ta waru in shaumu kama, ⁷⁹ ta ee ku me dii ti ta dil kan ti ta lukni muro. Shii ta ya we te ka we shuppomu kama ye kana ta yuun diyo kuttan-shaari kan Yamma." ⁸⁰ Nang lai in kpiri in yooni bang ti ta shoom, deen ti ta shwee we war koddi ye yikka kaawo paaro ti Ishereila ti ku-dam.