¹ Bara ye deppaa ya mo min warmu Itaaliya, nang shinui in min Buluj kan peddi me kan jekan we eem ti kira manni mongba mo an bee deet Rooma, mo shommonii Juuliyosh, dok ti shakki gbumen an bee deetno Kaishar. ² Bara ye min riyaa ta manni gong Andiramitiiyum, ye nennga illani ka we war gokmina ye ti ta buk Aashiya, minin koona we war po paali. Arishtakush, niyo Makidooniya ye ti Tashaloonika, kama shin kan shaayi. ³ Pirbang minin duri ti Shiidom, Juuliyosh in ya ween kpang ti Buluj, in wessho shii mo war shik me an jeereni longku in yuun wee shii leka. ⁴ Bara ye min illaa ti po teere ti ta gong doo, pirit in ti turmomu, longkuuno te, minin kpaklamu ta bi buk Shaifurush piree piriti a bangum. ⁵ Min maa ti teelo shiiruk ye nimmi kan Kiliikiya kan Banpiiliya, minin fooro Miira ye ti buk Likiiya. ⁶ Ti po teere, mongba an bee deet Rooma in we gong doo me ti Alekjandiriiya ye ta war Itaaliya, in liin mun ti tai. ⁷ Minin shakilla ti po teere minin ti wangro ta mina Yamma, kaa ye min fooraa nimmi kan Kinidush ka shilibi. Kaa ye pirit beelamu po ya toom, nang minin kpomlomu piree a doo piritum, ta bi koran buk Kirit nimmi kan Shemmooni. ⁸ Minin koona ka shilibi, minin fooro manni pirii ye ti tewi yaa po latto shik yen kpang, nimmi kan gokmina Likiiya. ⁹ Kaa ye min diina bak ti po teere,meremu in yooro kan we bala ti taaro, longku ta koddi sheno yuwaa tali ye temre fuddo shasshalau kookaro. Nang Buluj in pekro shinui, ¹⁰ in tewon ti shinui ya, "memme, ne geeka mere te ta yooro ka bala ti taaro kan shenge we gbe, a ka jal shenge shari kan gong doo waanim, kan she kerangmu kama." ¹¹ Pene mongba an bee deeti ta yuuliyosh akum wee Buluj tekam, ka ye kaa teere in yaarani paaro mo an tol gong, kan mo an ku gong. ¹² Kaa ye po latto shik ye ti Liikiya a yu kpang gong doo in ya viyo tipo teerem, nang gbemu in kumi ya mo shu toom ka mere. kaman ti li doomu ka we fooro Piniikiya, maa ta dum yooro, longku shinui in sha viyoti won. Piniikiyai manni po sheri gong dooi ti Kirit ye shiwon dwei ka laddi kudo ta vuro kan dang ti kudo ta vuro. ¹³ Bara ye pirit laddi yikka yaani lawiiu-lawiiu, nang memme in nyimmoi ya wee shin lekai weyaaro, nang shinuiin tollu we eem ye ti yiu shik gong doo, shinui in yiwaju jele koran buk Kirit, nimmi kan po paali Shiiruki. ¹⁴ Bi shwei a diya bakum, nang gee gbong pirit ti laddi kudo booli in yiu yuuru ti koran buk ti shakki dooi. ¹⁵ Bara ye piriti turaa gong dooi ye ti shaaro shai, nang gongi in kettoro, nang minin wesshina waani piriti in yiu sheemu. ¹⁶ Kaa ye mini yikkamu ta bi manni koran buk ti shakki doo ya shommoi Kauda, piree piriti kuugoro, minin tollu kattan gong dooi ta shilibi we waru jele gong doo yen gbai. ¹⁷ Bara ye shwiji me tollina gong yen tobi we war ta gong yen gbai, shinui in ya shen dabyo fwaala ti shiki in kpomin shik gongin gbai, longku yoo todiroro, shinui in buk gbong dawan we eem gong dooi in wessho pirit in ti shen gun gong dooi longku shinui a ti dum tol gongim, shinui yuwaa kaa tei, longku ta ya shewo yoo vingju ti ta shwiyak shirtish ye ti dello we ding. ¹⁸ Longku dooi ti ku teu den, in ti midiromu shikmu kping, nang pirbang shinui in yiu pal shari ye ti ta gongii, shinui in vingiyya ti ta doo. ¹⁹ Ti ku darang an tati, shinui ka kiraju in vingyo peddi shari shuran gongi. ²⁰ Kaa ye min shaklaa gbe minui ti we shik darang yei ar-shalum, birang gbong pirit doo in ti yuumu, nang minin for poshaarimu ka diyo kan dwei. ²¹ Kaa ye shinui diyaa bak a shu wesshiinam, nang Buluj in illo-shikni ti shakkijui, in tewi ya, "memme, modaa ma daa yaaraa paarono ye na mo ma wessho illiru ti koran buk ye ti shakki doo ye ti kiritim, ma daa shuwo ti ta shilib kan shwa peewe tem. ²² Pene wende ne ti ku yuuma nawit ma yu bang poshaari, longku a doo mo kerangi ta shekani ti shakki mam, nang bara gongi ye ta dodiroro. ²³ Ka yippo, an shuranno Yamma wanna shikno ye nei sheeni, in shereni nimmi kan ne. ²⁴ In tewi ya, "Buluj, wessho ya shewoi, kulli ke ta sherani ti toomno Keeshar. Geeru, ka longkuuko, Yamma ti ta kpangni, ta kauro me an jeere mereko. ²⁵ Longkuuno te, ma memme, nang ma yu bang poshaari, longku ne kunnga kan Yamma, ti ku ye tekano kaa we te, ta yooro kaa tene. ²⁶ Pene paa, yikka ti gbare-do pirit in wakyomu kama ti manni shwiyak koran buk shakki dooi". ²⁷ Ti ku yippo an kpumu gee peereni, bambiri ti ku kaimu ti ku paali doo Meditereeniya. Pelle ka nang shakki yippo, nang me an shen gongii shinui in nyimmina ya kama shin yuwaa nimmi kan buk. ²⁸ Nang shinui in nau joori ta dooi, in we fooraa sho shig dok kan naa-palau. Bara, ye min giika la-wiiu, nang shinui in nawi birang, in we sho naa-fejereu. ²⁹ Longku shii gongmu yoo wa tura shiila, nang shinui in foddo kira ka we eem yen tira shin peereu ye ta bi gongii longku in beelo gongii ya mere. Nang shinui in ukko ado ti Yamma mo ta piri kpaalo shwat. ³⁰ Pene me an shen gongi in gassho koko po juwoju yoba, nang shinui in duru gongi nang ta bi in ti ya shen kaa shinui ta dur eem yen tira ti toom gong nen gbai. ³¹ Nang Buluj in tewon ti mongba an bee deet Rooma kan me bee deet, "ma memme te maa diyan ta gong tem, a doo mo ta tuulanim". ³² Bara yaarani kaa te, me an bee deeti in bebro ta fwaala gongin tobi, in wesshina ta shinui, in yiworo bi doo. ³³ Bara ye ta piri tannga kpaaloro nang Buluj in beng shinui ya mo piime la shu wesshiina, "booi, shaklo kpumu gee peereu ma ti ku diya lishaari, mai shu wem. ³⁴ Longkuuno te, ne ta bengma ma shu wesshiina longku bang shikma, kaa ye a doo dok ti shakki ma ye shok kuuni ta shekanim". ³⁵ Bara ye teka kaa te, nang in shur we-ta-kele, in pammina ti Yamma ti doojui ding, in bwayinna in yiu shaani. ³⁶ Nang shin ding in we pee vurum, shin sheeju in sha wesshina. ³⁷ Min ti ta gongi min shig palau kan naa-parilau kan paragbanang. ³⁸ Bara ye shinui shuwaa in kemreju, nang shinui in kuwo tira shari gongi ka ukko ar shawi ta doo. ³⁹ Bara ye ta piri maa ti kpaalla, me an shengongi a dum pen buk ye kan shinuim, pene shinui jemlaa manni la balabangi ye kan shwiyak. Nang shinui in li shikju ka we warin gongi ku shwiyaki maa ta dum yooro. ⁴⁰ Nang shinui in petto fwaala we eemi ding me tiraim in wesshon ta dooita shinui. Ta dob-dob koddii birang shinui bebro po dau wee ti shiwan shik gongi. Nang shinui birang in shokro shik beek gongi an toom ye pirit ta shenani we war toom. Nang shinui in fooro po gangra paalii. ⁴¹ Pene ye min fooraa manni pirii ye doo ti kpomin, nang gongi in tura shwiyak, ye ku gongi in reero ta shwiyak in kaano middo shikro. Nang gongi in yiu todiroro ti kudo ta bi longku shenngau shum doo. ⁴² Nang me an bee deet in limma shikju ka we tukyo me an for-shunoi, longku yoo dok ti shakkijui juulo dooi in juwaju. ⁴³ Pene kaa ye mongba me an bee deet Roomai leka in kauro Buluj, nan in beelo shinui. Birang in min kumen ding mo penaa doo mo kai doo in li gun teeleju, mo shinui ri ta dooi in kai doo we war po gangro paali, ⁴⁴ peddi pene in ammaju ti ku bailan biro, yei in ammaju ti ku todiran gongi. Kaa te ne, shin ding in fooro po gangra paalii bang ding.