Po geyani 26

1 Ti po teerei Agiripa in tewi ti Buluj ya, "minaako kumen ke jimro fokko". Nang Buluj in shokro kirani, in yuun paaro ya. 2 "Kulli, ne kan shawar, Gub Agiripa, kaa ye ti toomko ye ne ta jimro fokno booi ti ku paaro ye ding Yawudaawa tebraa ti kuuno, 3 teng-teng kaa ye kei mo leeraa ka pebno dijiyo mina Yawudaawa kan wee shinui ti yuyyon jiram ti kwi. longkuuno te, ne ta bengko, ken yaarono kan kem shaari. 4 "Yawudaawa shin ding penaa peen diyo ye ne yuwaaa yau ye ne ta lai, we yinna ti liyaan guni ti minamu kan ye ti Urshaliima we fottu booi. 5 Shinui penaano yau kan shinui ta dum jimrono ya kulli, nei niyo Parishaawa, ma shinui maa leka, kaa ye peen me an wawo te, me yeka jooro kping ti shakki peddi me an wawomu kama. 6 Wende, ne sherii ti toom ma mo yuuno shiire longku ne liyaa shaari ti ku kem deewaanku ye Yamma deewaa ti ma fowonmu kama. 7 Deewanku te ye po peenmu kama kpumu gee palau ye liyaa shaari shin ta we kemanto, ye shinui liyaa shikju ka wau Yamma yippo kan darang. Gub, Longku ye ne liyaa shaari ka keman deewanku te, tenei ye Yawudaawa ti ku geen digno ti kwi. 8 Longku wen ta geyaan mai, Yamma a ta dum shokro me muroojum mi? 9 "Oo, ne po kuuno maa, milam ne geeka kaa yuwaa dob-dob nen ya ween shurme gbe, longku nen beelo paarono Yeesho niyo Naajeret sha toom. 10 Tei wee ne yuwaa ti Urshaliima. ye nen waan kumen ti kira men gbidina me ankpaa. Longku kpakko me an balla gbe ta mina muruk. Kaa ye maa ti tukyo shinui, nen ti dabyo gun yaani kaa te. 11 Ne yippa bi ta mina wawo ding nen ti yuyyo kelmo ti shinui, nen ti li shinui ka bang mo shinui yuyyo paaro bek ti shik shommono Yeesho . Longku ne ti ku ya den kan shinui kping, nang nen ti yippo biijui we wangro peddi buki, longku nen minin shilibi ti shinui". 12 "Ti shakki yaani kaa te, darang nan dok, ne ti ku mere war Dimashka, kan kumen men gbidina me ankpaa kan yaan balla kumen ye shinui minaano. 13 Mo Yamma min ko joori shaklo, ka sheri darang ti koko, ne weena aaro ye yeka aaro darang eena ti kudang, in aaro jelemu kan me an mereno. 14 Bara ye min ding wakyaa ti buk, nang nen yaaro ele in ti shereno ta fok Ibiraaniyawa ya, "Shaawulu, Shaawulu, longku wen ke ti ku yuuno diurung kaa we tei? Ke ti ku minani shilibi ti kuuko ye ke ti ku ya kenne kan ne." 15 "Nang nen liginna na, "kei nongee mongba? Nang Fo-mina in teuno ya, "Nei Yeesho ye ke ti ku kurani. 16 Pene wende illo-shikko, ne shukna shikno ti shikkoi longku nen liiko ken yuuno shuran, ken yooko an jimro wee ke weyaa shiki ti kuuno, ken wee ne ta shukloko ti toom. 17 Ne ta kauroko ti kira memmeko, kan ti kira mei Yawudaawam, me ne ta shurin ken ti shikjui. 18 Ke ta au adoojui, shinui in meeriju ti ta dil we shiru ta aaro. birang ti ta gubno shuuro we shiru ta sheeno Yamma. Kaa we te, shinui ta fuddon shasshalauju, kan po aa ye kan me ding shigaju me an shaana, longku shinui kunnga kan shii. 19 "Longkuuno te, ai, Gub Agiripa, nei kura min gba ti jirim ye shaana ti ku-dang tem. 20 Nen liiru gun paaro Yamma ti Dimashka, birang nen ya ti me ti Urshaliima kan kpakan po buk Yawuudiya, birang nen ya ti mei Yawudaawam, na mo shinui shiru shikno Yamma, birang shinui in ya wee te shuklani ye shin foraa fokju. 21 Tenei ye Yawuudawa yikkano ti ta mina Yamma, shinui in yiu gassho koko po tukno. 22 Pene Yamma in shauno we foottu wende, tenei ye wende ne bambirino ti ku kpaalo piri ti men gbidina kan shiba. A manni wei dokro ye ne ti ku sheeranim, bara wee me an-pigro kan Muuja teka ya ta yooro, 23 ya kulli, Kiriti ta taa shilibi, in shiwani mo an toom ilit ta duwo. Longkuuno te, shii ta waru ka aaro ti memme ding, Yawudaawa kan mei Yawudaawam ding. 24 Buluj ti ku sheero fokni, nang Feshtush in shokro eleni kan bangi ya, "Buluj, ke shigago an shanngau! Gbe maarigo shigago kuuko!" 25 Pene Buluj in liginna ya, "Mongba Feshtush, ne ti ku ya shangawum. Ti shakki keman shik, ne ti ku tewani yen kulli. 26 Longku gub penaa gun wee te, nang nen ti yuun paaro kaa tei, ne kunnga a doo wee lattani ti shiim, a yu we tei ti jele bim. 27 Gub Agiripa, ke kunnga kan me an-pigraa? Ne penaa ke kunnga. 28 Nang Agiripa in tewi ti Buluj ya, "Ta koddi lawiiu ke leka shiwan nen an balla ya?" 29 Buluj nang in tewi ya, "Ti ta kattan koddi, yei yen joori, ne ti ku pau Yamma, a ke dokko ye ta liyanim, ken me ding me ti ku yaarono booi, shinui in yooju kaa ne, nang kaananii jekanwe eem ye." 30 Nang gub in illo shikni, kan Baanish sheeni, kan me ding dijiyii ka shaayi kan shinui. 31 Bara ye shinui peraa ti po shiirei, shinui in tewi ti shaayi ya, "La-moo ye a yu wee po liyaani in nummo shiim, yei tuk shiim." 32 Agiripa in tewi ti Feshtush ya, "modaa kuma ye la-moo ye shaaraa yaan gunni in warintoomno Kaisharum, daa foraan kira ka shii."