¹ Nang ka bi sho shaklo tat ye Festush foonna longku yiu shuran gobna, nang in illina ti Kaishaariya ta wanni Urshaliima. ² Nang men gbidina me ankpaa kan me an toom Yawuudawa,in wanna ka yaan gunno Bulus ti toomnii, shinui in beng shii. ³ Mo li in maan Bulus Urshaliima longku shinui fiwaa po li me tadang kuuo Bulus ti koko ka we tukani. ⁴ Festush in liginna ya, "Ta jooro kuuno Buluj ti Kaisheriiya, ne po kuuno, a ta diyani bakum, ne ta war po teerei. ⁵ Longkuuno te, ma la-moo ye maa kan kelnyo, shinui in yippo daknii . ⁶ Ka bi ye shii diyaa kan shinui po shaklo pididau yei kpumu ti jelejui, nang in meeni Kaisheriiya. Pirbang in deeni ti ku juk po ya shiire, in li in waru ka Buluj ti toomni. ⁷ Bara ye Buluj wanna, Yawudaawa me wanna ti Urshaliima in illina in kpomlo jeleni, shinui in ti wagittu ka yuyyo gun gbe, yen shilib ti kuunii, peddijui a dum pee bim. ⁸ Pene Buluj in jimro fokni ya, "Nei daklo we ti ta shoro Yawudaawam, birang nei daklo we ti ta mina Yamma yei ti Kaishar koo la wiiwum". ⁹ Pene Feshtush, leka induulo poshaari Yawudaawa, shii in tel Buluj ya, "ke leka in warin ken Urshaliima in yuuko shiire ti toomno ti won ti ku ween shurme te ya?" ¹⁰ Pene Buluj in liginna ya, "Ne ti ta mina shiireno Kaishar. ti po tenei, nennaa in yuun nen shiire. Nei daklo we ti Yawudaawam, ke po kuuko ke penaa ka te kping. ¹¹ Ma nei an daklo we, ye ne daklaa wee nennaa ween yooro muro, ne ta kurani in tuknom. Pene maa a doo kulli ti ta yaan gunno ye shinui ti ku yaanim, oo, a doo mo ta dum minno ti shinuim. Ne ta bengo ka we shar yaan gunno we war toomno Kaishar!" ¹² Ka bi ye Feshtush deppaa shin kama me an galoi, nang in liginna ya, "oo, ke benga ka ke ta shar yaan gungo ka we war toomno Kaishar, oo, ta warin kan shikno Kaishar". ¹³ Ka bi ye shuklaa la-wiiu, ma Agiripa kan Baanish in waru Kaishaariya longku in min wanniya ti Feshtush. ¹⁴ Kaa ye shinui ta shaklani gbe ti po teere, nang Feshtush in waru ka paarono Buluj ti toomno gub. Feshtush in tewi ya, "Ka manni niyoi ye Felish wesshaa ti ta mina muruk. ¹⁵ Koddi ye ne ti Urshaliima, men gbidino me an kpaa kan me an toom Yawudaawa shinui in warino ka yaan gunnii, shinui, in bengno ya ne minin kelmo ti shii. ¹⁶ Pene nen tewon na mun Roomawa, minui leero ka ya shiire ti mo an kelnyom, bara in waru ka shii ti toom me an ya gunnii a do kan a do, birang ka kumin ti shii mo jimro fokni ti ku yaan gun ye ti ku yuun ti shii. ¹⁷ Longkuuno te, bara ye shinui wanna po te ka shaayi kan ne nei daklo koddim, pirbang nen ammono ku juk ya shiire, nen li mo waru ka niyoi. ¹⁸ Bara ye me an ya gunnii illaa, shinui a waru ka yaan gun piree kelnyo ye ne ti nyimmina shii yuwaam. ¹⁹ Bara shinui in ti yuyyo peddi pa-paaro ye shinui a kum kan Buluj ti kwim, ti ku wawoju, kan manni niyo ye muraa ya shommonii Yeesho, ye Buluj tinnaani ya kan dwei ta shii. ²⁰ Ne po kuuno bara ye nei wa koko ye ne po yippon gun we tem, nang nen tel Buluj ye shii ma leka war Urshaliima ka we yuun shiire ti shii ti won ti ku wen shurme. ²¹ Pene longku ye gassha ka sheron ka paaronii longku mongba gub Kaishar in kar ku yaan gunnii, nang nen min kumen , na mo jooro kuunii we war koddi ye ne ta shurin gunnii ti shikno Kaishar. ²² Nang gub Agiripa in tewi ti Feshtush ya, "Ne sheeno ne leka nen yaroo la-moo yeka kumono". Feshtush in liginna ya, "Ke ti yaaro shii dwei". ²³ Nang ta piri maa ti kpalla, ma Agiripa kan Baanish in riiru ka peen riyaan she me an gub, shinui wanna ka shaayi kan me an toom me an ya gei kan men gbidino tarang mina. Nang Feshtush in min kumen ya mo riiru ka Buluj. ²⁴ Nang Feshtush in tewi ya, "Gub Agiripa, kan me ding ka shaayi kan kama ti po te, gee niyo ye memme Yawudaawa wannano ka yaan gunni ti Urshaliima, kan ti po te birang, ye shinui in ti ya babak ya a yu kpang in wessho shii kan dweim. ²⁵ Pene nei wa wee shii yuwaa ye ta warin shii kaa ta murom. Kaa ye shii po kuuni gasshaa mo warin shiireni toomno mongba Kaishar, nen tewi na, oo, ne ta shur gunni ti shiknii. ²⁶ Pene ne kan kpalan ku paaro ye ne ta ballani ti mongba gub Rooma ti kuunim. Longkuuno te, ne wanna ka shii ti toom ma, teng-teng toomko, te gub Agiripa, longku ka bi ye kama yippaa daknii, kergum ne ta we wee ne po ballani. ²⁷ Longku kaa geyan sheeno, ta yooro we dil in shur gun la ta mina muruk, a kan shuklan kelnyo ye shii yuyyaam.