¹ Ka bi shaklo fuwat, nang mongba ankpaa, Anaaniya, in waru ka shaayi kan peddi me an toomi, kan manni mo an pil po paaro, ya shommonii Tartulush, nang shinui in waru ka yaan gunno Buluj ti toomno gobna. ² Bara ye yeyaa Buluj ti ta, nang Tartulush in li gun ya gunno Buluj ti toomno gobna ya, "mongba, ti bi shenko ye diya memmeko yuwaan kpang, kan biran ke kan nitta kping, tenei ye liyaa diya memmeko kpangi. ³ Memme mu ti koo tong, ti kum pirko a doo kpakan fokim. ⁴ Pene longku ne ta tukko koddim, ne ta bengko, ti ta kpangko ken yaaro dwakra wee min ta teuko. ⁵ Min weyaa la-moo yei mo an turmo, ye ti yeeru nee ti shakki Yawudaawa ti ku peewe ding, shii mo an toom me an wawo Naajarawa, me an yiu biino Yeesho. ⁶ Birang shii in ti daklo mina Yamma, pene minin yiu shii. ⁷ Missed ⁸ Ma kee yippaa daknii ka shikko, ke ta dum penani ti foknii we te ding ye min ti ku yuun gunnii ti kwi. ⁹ Yawudaawa po kuuju deewaa guni, shinui in kumi ya wei kaa te. ¹⁰ Bara ye gobna kunnga ya Bulju yu paaro, nang Buluj in liginna ya, "ne ta jimro fokno ka pe poshaari, kaa ye ne penaa ke sheniraa gbe ken ti shiiro memme te. ¹¹ Nang ke daa yippaa guni, ke daa penaa wende a koo shaklo kpumu gee palawum, ye ne waraa Urshaliima wawo. ¹² Me ti ya gunno te, a nau weeno ne ti ku ya jiram kan mondokum, yei ta mina for-fok, yei ti tarang minam. ¹³ Wee ti ku tewani ti kuuno wende maa, shinui a ta tewani yaa yen kullim. ¹⁴ We dok ye ne kunnga kan te, ne ti yiu bi Yamma ma fowonmu kama ti koko te ye peddi teka yaa dob-dobum, birang nen ti kumi kaa wee ballii ding kaa ye shubetno Muuja shuppaan kan yuyyon balila me an-pigro. ¹⁵ Ne ti lishaari kan Yamma, ka ye ma mee ti ya, ye yaa, ta shokro me murooju, me mereju dob kan merejuidobum ding. ¹⁶ Tenei ye kpaaliya ding, ne ti ku li shikno ti poshaarino nen yoono a kan bel poshaari yei manni we turmoi ti toomno Yamma kan memmem. ¹⁷ Oo, ka bi ye sherinaa, nang nen meru Urshaliima longku nen waru ka kunngumu ti memme me leka kan nen min ding ta kira. ¹⁸ Ne ti ku yaani kaa te, nang shinui in weeno ti ta mina Yamma. Ne fuwaa po shaano kuuno, a doo me an galo ka shaayi kan nem, birang nei shokro poshaari niyom. ¹⁹ Pene ka peddi Yawudaawai ye penna ti buk Aashiya ye ti po teere, nennaai shinui in waru toomko ka ya gunno ye shinui maa kan paaro kan ne. ²⁰ Maa kaa tem, me memme me tewo kelnyo ye shinui weyaan nen kan te. Koddi ye ne sheraa ti toom me an galoi. ²¹ Nang maa bara dok paaro te waani ye ne teka koddi ye ne sherii ti toomjui, ye ne shokraa eleno na, "longku paaro ilit memurooju ye ti yuuno shiire ti toom ma booi." ²² Nang Felish ye penaa we la gbe ti ku kokono Yeesho, nang in sheron ka shinui ya, "nang mo an toom Lishiiya maa wanna nen tang waraa karma ku shiirei." ²³ Felish in min kumen ti mongba mo an bee deet Roomai mo jooro kuuno Buluj, pene mo wessho pessho shii gbei, mo wessho beelo me an jeereni waru jelenii yuun wee shii lekai. ²⁴ Ka bi ye la shaklaa, Felish kan mannani ta Durushiila ye tei niyo Yawudaawa, in waru ta shinui. Nang shinui in shuri mo waru ka Buluj, shii inkaan kumoni ti shi paaro kumani ka Yeesho Kiriti. ²⁵ Nang Buluj in li guni ka sheero paaroi ti ku kpang poshaari, ken yek bang wee lo-shik leka, birang kan darang shiire te ye ta waru. Bara yaaraani ka te, shewo in yiu Felish, nang in tewi ti Buluj ya, "wende meeko. ma nei weyaa koddii, ne ta yeeko." ²⁶ Longku shii liyaa shaari ya Buluj ta minni kine, tenei ye Felish ti ye shii ti kwi-ti kwi, in ti ya nessho kan shii. ²⁷ Pene ka bi sheno palau, nang Fokiyush Feshtush in shiwani gobna ti po shoono Felish, longku Felish leka lewan ti toom Yawudaawa, nang shii in wessho Buluj ta mina muruk.