¹ Buluj in diro me an galoi kpang, nang in tewi ya, "ma molonno, wende ne kan marak ti poshaarino, koo we turmo ti ta peen diya ye ne yuwaa ti toomno Yamma we fottu booyum. ² Bara ye Anaaniya mongba me an kpaa yaaraa kaa te, nang shii in tewi ti me sherii nimmi kan Buluj ya mo paalon shii ti ku foki. ³ Nang Buluj in tewon ti shii ya, "kei sheri doo mina ye shakan kulunji ti shiki, mo an shek, ke sheeko Yamma ta paaloko! ke deeko ken ti shiirono kaa ye shoro teka, pene gee ka mo yuuno tuwa, yei yu dob-dob kan shorom. ⁴ Me shengrii nimmi kan Buluj in tewi ya, "mongba ankpaano Yamma, ke ta kpaa shii ya? ⁵ Buluj in liginna ya, "mol, nei peno na shii mongba me an kpaam, longku ballii ya, "moko teu piire paaro ti ku me an toom memmekoi' ⁶ Nang Buluj, penaa peddijui Shadukiyaawa kan peddi Parishaawa. Nang in shokro eleni kan bangi ti shakki galoi ya, "ma molonno, nei niyo parishaawa, la niyo parishaawa. Gee longku ye ne liyaa shaari ka ilit ta duwo tei yema ti ku shiireno." ⁷ Bara ye shii teka we te, jimai in illina ti shakki parishaawa kan Shadukiyaawa, nang ta galoi in bwaaroro palau. ⁸ Shadukiyaawa ti ya nyimmo sheeju yaa a doo ilit ta duwom, kan a doo me an shuranno Yammam kan a doo shoomum, pene parishaawa kunnga kan shin ding tati. ⁹ Longku gbong shabbi ye illaa, peddi me an shubet ta shorono Muuja, me ti ta woran ku me parishaawa in illeju po sheri, shinui in ya jiram kping, in ti tewi ta shinui ya,"minui wa la-moo ye kan manni shoomi, yei an shuranno Yamma ye yuunan paaro ti shii". ¹⁰ Shabbi in yooro shilib kping ye an toom me an bee deeti in shi, ya yoo twalo taano Buluj ka bang ti kirajui, in warin shii awo mina me an bee deet. ¹¹ ka yippo, Fo-mina in sheri nimmi kan Buluj in tewi ya, "kemo shikko! Kaa ye ke jimraa fokno ti Urshaliima, kaa teere, ke ta jimrani ti Rooma!' ¹² Pirbang ka shaat Yawudaawain gal fokju kan in ya pammi ta shinui a doo shaani yei sheyanim, ma shin maa tuk Bulujum. ¹³ Shwiji me yuwaa piire nyimmo teere, yeka bang niyo naa-peereu. ¹⁴ Nang shinui in war shik mongba ankpaa kanmen gbidina in tewi ya, "kama yuwaa pammi, a doo sha wem, ma kama maa tuk Bulujum. ¹⁵ Nang wende, ma kan me an galoi man tewi ti an toom me an bee deet maa mo warin man ka shii, kaa ma leka sha toom ka yippo gun paaronii kping, maa ka sheemu, min fuwaa limmo shikmu ka we tuk shii ti koko in tang waraa foottu." ¹⁶ Nang ma laano molano Buluj maa ti yaaro deewan wee deewai, nang in wa ri ta awo mina me an bee deeti in sheero guni ti Buluj. ¹⁷ Buluj in ye mongba an bee deet Rooma in tewon ya, "warin la kparin ye toom mongba an bee deet longku shii kan paaro ye ta tewon ti shii. ¹⁸ Nang mongba an bee deet Roomai in warin la kparini shik mo an toom me an bee deeti, in tewon ya, "La an for-shina ye ta Buluj, yeyaano ta shii, in bengno ta shii mo ne wariko ka la ye, longku la kparini kan wee po teu ko". ¹⁹ Nang mo an toom me an bee deet Roomai in yiu kira la kparini, in meeju jele dok, in tel shii ku jalju shin palau ya, "ke ta teuno wen?" ²⁰ La kparini in tewi ta shii ya, "me an toom Yawudaawa kunnga ta telko ta shinui ya ke waruju ka Buluj dwei ti toom me an galoi, kaa birang shinui leka yippo gun paaroikping. ²¹ Mo ko kumin piri ti shinuim, longku niyo yeka bang naa-peereu ti ku dang kuunii ka we tukani. Shinui pammaa we a ta sha wem yei she wem, ma shinu maa tuk shiim. Shinui fuwaa po limmo shikju, shinui dii ti ku gee ku kumanko". ²² Nang mo an toom bee deet Rooma, in li bi la kparini, kan in tol kumonii mo wessho tewani ti niyo peemo sheerani gun paaroi." ²³ Nang mo an toomi in ye men gbidina me an bee deet Rooma palau in tewon ti shinui ya, "ma limma shik ma longku ma ta illani ka bi shaan weshiina yippo karbe ferejeu we war Kaishaariya, kan me an bee deet shin shig palau kan me an bee deet me ti ammo ku agbamjam shin naa-paarilau, kan me an bee deet ye penaa ya nee ka kash shin shig palau. ²⁴ Ma gasshuru agbamjam ye Buluj ta ammani kwi. Nang man warin ka shii ti gobna Felish." ²⁵ Nang shii in ballo alaukaa lee, ²⁶ Kilaudiyush Liishiyash, we war shikno mongba gobna Felish, ne yuwaa kaa gbe. ²⁷ Niyo ye, Yawudaawa tollina shii ye shinui nennga deeno tuk shii, pene nen waru kan me an bee deetno, nen lauwuru shii, longku ne yaaraa ya shii niyo ye kan po kuuni ti Rooma. ²⁸ Ne leka nen peni longku wen shinui ti ku yuun diurung ti shiknii, kaa te, nen warin ka shii toom me an galojui. ²⁹ Nen we diurung ye shinui ti ku yaanii gale kan telyo ti ku paaro shoroju, pene a doo wee shii daklaam ye ta warin shii mina muro yei ta mina murukum. ³⁰ Bara ye tekano gun piire nyimmo ye shinui sharaa ti po shariju ka we yaani ti ku niyo ye, nang nen shurko gunnii peeb. Birang nen min kumen na mo me an diurungi sheeroko gun yaan gunnii ye shinui ti ku yuun ti shiknii. ³¹ Longkuuno te, me an bee deet in ya shuranju, shinui in shar Buluj ka yippo in warin shii Antipaatirish. ³² Pirbang shinui in wessho me an bee deet me an ammo ku agbamjam in koon ka shii, nang shin sheeju in meeju awo mina me an bee deet. ³³ Bara ye me an bee deet me an ammo ku agbamjam fooraa Kaishaariya, nang shinui in min yaan ballai ti gobna, shinui in wesshon Buluj ti kiranii. ³⁴ Bara ye gobna maaraa yaan ballai, in tel Buluj ya peemoi niyo kudo po shire. Bara ye shii yaaraa Bulujii niyo Kiliikiya, ³⁵ nang in tewi ta shii ya, "ne ta ke kumono nen yaaro paaroko, koddi ye me an yagungo foonna," nang gobna in min kumen ya mo nummo shii ti ta aapalau ye Gub Iriidush diga.