¹ "Ma molonno kan ma fowonno, ma shero ne sheeroma wee yuwaaro, longku nen shukma na nei daklo wem," ² Bara ye shinui yaaraa shii yuwaa paaroi ta fok Araamiya, shinui in yooju yititi. Nang Buluj in tewi ya, ³ "Nei niyo Yawudaawa, ye pattaa ti Shiliishiya, pene nen kpiri ti tarang gokmina te. Ti ta gunno Gamaaliyel, yuwaano shubet kping ti ku shoro ma fowonmu kama kan nen ti mwissho wau Yamma, kaa ye ma ding ti ku yaani booi. ⁴ Ye ne po kuuno nen kum me an yiu bi koko te, nen ti tukyo shinui, nen ti kpakko memme shwiji kan shereb, nen ti numyo shinui ti ta mina muruk. ⁵ Mongba me an kpaa kan me an toom me an galo memme, shinui ta dum jimro fokno. Ti kiraju ye ne yinna yaan balla alau we war shik ma molonmu kama ti Dimashka. Ne waraa po teerei longku nen yippo me an yiu bi koko te, me ti po teere sheeju, nen warin ka shinui Urshaliima, longku in minin kelmo ti shinui. ⁶ "Pelle ka sheri darang ye ne wanna nimmi kan Dimashka, kpantidi aaro yen arang kping ti ku-dang in ee jeleno. ⁷ Nen shugno ti buk, nen yaaro ele in yuuno paaro ya, "Shawuulu! Shawuulu! longku wen ke ti ku kurono kaa tei? ⁸ Nen ya telyo na, "kei nongee Fo-mina? In liginna ya "nei Yeesho niyo Naajeret, ye ke ti ku kuranii." ⁹ Me an mereno weyaa shik aaroi, pene shinui a jemlo ele niyo ye ti ku yuuno paaroim. ¹⁰ Nen ya telyo na, "Fo-mina, ne ta ya wen? Fo-mina in teuno ya, "illo, ke ri tarang mina Dimashka. Ti po teere ta teuko wee teka ya ke ta yaani. ¹¹ Me an mereno in yiuno kirano, in warin nen Dimashka,longku eyan aaroi fuumoono doono. ¹² "Ka manni niyoi shommonii Anaa niya in warui geeno. ¹³ Shii mo an jooro shoro kping, kan memme Yawudaawa me dii ti po teere in ti minin gba ti shii. Shii in shereni ti jeleno in tewi ya, "mollo, Shawuulu, yiu we ta piri! Nang ta koddii teerei nen dum we shiknii. ¹⁴ Nang in tewi ta shii ya, "Yamma ma fowonmu kama shakako, ken pen lewanni, kan ken we shik dok mo shaana, kan ken yaaro paaro ta fokni. ¹⁵ Ke ta shiwo an jimroni ti toom memme ding, ka wee ke weyaa shiki kan ken yaaraa. ¹⁶ Nang wende ke ta dang wen? illo mo yuuko yulma kan in fuddoko shasshalauko, ka pau shommono Fo-mina. ¹⁷ "Kaa ye ne shinna Urshaliima, kan ne ti po for-fok ti ta mina Yamma, nang nen we shik jirim. ¹⁸ Ti ta jirimi, nen we shikno Yeesho in ti teuno ya, "kpantidi! wessho Urshaliima peeb, longku shinui a ta kum jimroko ti kuunom'. ¹⁹ Nen liginna na, "Fo-mina, memme te penaa ta shinui ne ti war ta mina for-fok nen ti kpakkina me kunnga kan ke,birang nen yuyyon tuwa ti shinui. ²⁰ Koddi ye deera domno Itipaanush mo an jimroko, ne po kuuno, ne sheerii ti po teere kan kumono, nen ti gee ku lanna me an tuk shii. ²¹ Nang Fo-mina in teuno ya, 'koo, ne ta shurko tali we war shik mei Yawudaawam! ²² Nang jimai in ke kumoju ti shikno Buluj we war koddi ye shii teka te. Nang shinui in shokro eleju kan bangi ya, "bwaaro peen niyo te kan ku-buk! shi nenna in wesshina kan dweim!" ²³ Kaa ye shinui ti ku yallo-yallo kan vingyo lanna kawojui, shinui in ti ya kpisshi. ²⁴ Longkuuno te, mo an toomi in min kumen mo warin Buluj awo mina me an bee deet. Mo yippo daknii kan in yuun biro-biro ti shii, longku wen ye galoi ti ku yuyyon yallo ti shiknii kaa tei. ²⁵ Kaa ye shinui kpakkaa shii ka we yuun biro-biro, nang Buluj in tewi ti mongba an bee deet Rooma ye sherii nimmi ya, "shoro kunnga ya mo yu biro-biro ti mo kan po kuuni ti Rooma a gale kan shiiro shii maa?" ²⁶ Bara ye mongba an bee deet Rooma yaaraa kaa te, nang in war shik mo an toomi in tewon ya, "ke ti ku nyimmo ya wen? La-moo ye paa kan jimro po ku Roomawani". ²⁷ Nang mo an toomi in waru in tewi ti Buluj ya, "Temo paaron kpang, kei niyo Rooma ya?" Nang Buluj in liginna ya, "Oo,' ²⁸ Nang mo an toomi in tewi ya, "Ne weyaa jimro po ku yei ka kine yen gbe kping," Buluj in liginna ya, Ne sheeno, pattaan nen kan te." ²⁹ Me leka tenglo shii in war shikju kpantidi. mo an toomi sheeni ye penaa wende Buluj ye shii kpakkani niyo Rooma, nang shewo in yiu shii. ³⁰ Pirbang, kaa ye mo an toomi leka pen peen yaan guni ti kuuno Buluj, nang in piddo shii, in min kumen mo men gbidina me an kpaa kan me an galo ding mo gallu, nang in waru ka Buluj, in li shii in sheeri ti toomjui.