¹ Bara ye mun wesshaa shinui, minin reemu ta gong dooi, minin koomu war Kosh, pirbang minin war Rod kan Pa taara. ² Bara ye mun weyaa gong ye ta war Piniikiya, nang munin ri, minin koomu. ³ Bara ye mun yikka we shik Shaipunish, nang minin ketto shikmu ti ku kira jiyaumu, minin sha toom ka mere we war buk Shuuriya. Nang minin duri ti Taaya, longku ti po teere gong dooi ta dur sharito. ⁴ Nang minin gassho bi piree kan me an balla ti po teere, minin diina kan shinui po shaklo parilau. Nang shoom in shaarin ti kuujui in tewi ti Buluj mo wessho koo war Urshaliimai. ⁵ Pene kaayekoddi ilit mu kenngaro, minin sha toom ka meremu, me an ballai ding kan sherebju kan shibaju in waraa liimu biimu, in peron ka minu ti tarang minai, nang ti po teere ti po shiiruki, minin juunna minin for-fok. ⁶ Ka bi minaan menne ti shaayi, minin ammamu ta gong dooi, nang shinui in meeju mina. ⁷ Bara yemun wiila meremu ye mun tangna ti Taaya minin fooro Tolamish, minin kakyo ma molon, minin nang kuttina dok kan shinui. ⁸ Pirbang minin illina minin war Kaishaariya, minin ri ta minano Pilibush an kaawi, mo dok ti shakki parilau ye shaka shii ka we shuran ti me an balla me ti U rshaliima, minin duri ti minanii. ⁹ Kan shibani peereu, shiba shereb mei yu diyaam. Shinui me an ya pigra. ¹⁰ Ka bi ye mun shaklaa ti po teere, manni mo an pigrai shommonii Agamu in shaaru ti Yawuudiya. ¹¹ In waru shikmu, shii in shar we ta kumono Buluj, in dawin kirani kan shooni, in tewi ta shii ya, "shoomno Yamma teka ya, "kaa te Yawudaawa me ti Urshaliima ta kpakko an ku wekuma te kan ta mun shii ti mei Yawudaawam. ¹² Bara ye min yaaraa kaa te, min kan memmei ding, mininbeng Buluj mo wessho ammo Urshaliimai. ¹³ Nang Buluj in lignamu ya, " longku wen ma ti ku ya kwii kan beblo poshaarinoi? Ne kunnga a bara ka dauno waanim, pene birang nen muri ti Urshaliima longku shommono Fo-mina Yeesho." ¹⁴ Bara ye muni ta dum meeru ka poshaarimum, nang munin bukk shigmu, munin tewi, "mo sheeno Fo-mina yooro." ¹⁵ Ka bi shaklo te, munin illina munin ammo Urshaliima. ¹⁶ Peddi me an ballai ti Kaishaariya in koona ti biimu ta shinui nang in warin mun ta minano Manaashon, piree mun ta deenmun. Shii niyo Shapurush kan shii dok ti shakki me an yiu shubet ye ka toom. ¹⁷ Bara ye mun foraa Urshaliima me an balla in yiu mu ka poshaari dok. ¹⁸ Pirbang Buluj in koona ka shaayi kan minu kama shinun war shikno Yaakubu, nang me an toomi ding ka shinu. ¹⁹ Buluj in kaa shinui kan in sheeron pi wei ka dok-dok ye Yamma yuuna ti shakki mei Y awudaawam ti ta shuran kaawini. ²⁰ Bara ye shinui yaaraa te, shinui in wau Yamma. Nang shinui in tewi ti Buluj ya, "Oo, na ke gee ta mol, ke ta weyani wende ti Urshaliima, Yawudaawa shik sho-kpumu shinui kennga, kan shin ding liyaa shikju ka yiu bi shiire. ²¹ Sheeraan ti shinui ya ke ti shuppina ka Yawudaawa me dii ti shakki mei Yawudaawam mo shiwo ta bi ti shorono Muuja, ya kei ti tewon mo wessho kar kuwo shibajui, kan ya peen diya kuut minamu kama. ²² Minui ta ya wen? Shinui ta dum yaarani ye ke wanna. ²³ Longkuuno te, yu wee min te teuko. Ka shwiji shin peereu ti shakki mu kama me yuwaa pammi. ²⁴ Yo shwiji me, ken yiu bi shoro shidda shik kan shinui, ken angngo kine shiddani longku in kul kuujui. Nang koo nong ta penani ya a doo paaron kulli ti ta wee shinui yaaraa ti kuukom, pene ya ke po kuuko dii ti ta murku ti ta shoroi. ²⁵ Kaa she me an balla mei Yawudaawam, min ballan sheran ku paaro sheemu ti shinui, min ya mo shinui wessho addo lo ye karaa tu we-kuma-wei, kan domi, kan we-ta-gun ye meeraa bongii, kan yuuyo shomaki". ²⁶ Pirbang Buluj in ye shinui shurme, nang in shiddo shikni ka shaayi kan shinui. Nang shii in war ta mina Yamma ka we kpaalo po darang ye shaklo shiddo shik ta wiilon, kan koddi min ding ta kira longkuuno koo nong ti shakkijui. ²⁷ Bara ye shaklo parilau nennga wiiloro, peddi Yawudaawai mei ti kpakan po buk Aashiiya, in we shikno Buluj ti ta mina Yamma. Nang shinui in shuulo galan memmei ding, in yiu tenglo shii. ²⁸ In ti ya yallo ta shinui in ti tewi ya, "ma molonmu Yawudaawa. Ma shaumu! Sheyyei la-moo ye ti wangro koo tong in ti kpakyo memme mu kama kan shoro mu kama kan ta mina wawomu kama te. Birang shii in riiru ta mina Yamma ka mei Yawudaawam, in yuyyo ding ti piree shaana." ²⁹ Teka kaa te ta shinui longku milam shinui weyaa shikno Buluj kan Turoofimush, niyo Aashiya, ti tarang minai. Tenei ye shinui nyimmaa ya Buluj riyaa ta mina Yamma ka shaayi kan shii. ³⁰ Nang tarang minai ding in yooro ku jal bobak, memme in illiru foki dok peeb in yiu Buluj, shinui in peron ka shii ti ta mina Yammai, in ku dan nummo podangi peeb. ³¹ Kaa ye shinui leka tuk shii, shinnyii in foro ta kumo mo an toom mean bee deet Rooma ya tarang gokmina Urshaliima ding sharaaro shabbi foki dok. ³² Kpantidi shii in ye men gbidina me an bee deet, in sha po teere ka yoba. Bara ye me an bobaki weyaa shik mo an toom bee deeti kan me an bee deeti, shinui in daifo tuwano Buluj. ³³ Mo an toom mean bee deeti in amru in yiu shii, nang in min kumen ya mo kpakko shii ka we eem palau. Nang shii in ya telyo ya shii nongee kan yuwaai wen ta shii. ³⁴ Peddi ti shakki jimai in ti shoppo bobak ween dokro, peddi in ti teu sheeju dokro. Longku gbe bobaki, mo an toom me an bee deeti, adum pen liyaan gun paaroim, nang shii in min kumen mo warin Buluj awo mina me an bee deeti. ³⁵ Kaa ye Buluj tannga ammo po tau shoi, nang me an bee deeti in shokro shii, longku bobak jimoi yuwaaro gbe. ³⁶ Jima ye yinna bii, in ti yayallo ya, "mo koon ka shii". ³⁷ Kaa ye me an bee dee ti ku nyimmo shar Buluj ka we warin awo mina mean bee deet, Buluj in tel mo an toom me an bee deeti, "ke kunnga nen teuko we ya?" Nang mo an toomi in liginna ya, "pimbirim ke ti teu fok Elenaawa ya? ³⁸ Tei ke niyo Mashar ye milam yeena nee, ye tolla muro niyo shig sho naa peereu me an tukyo niyo ti ta shwee maa?" ³⁹ Buluj in liginna ya, "Nei niyo Yawudaawa, niyo Tarshush ti Shiliishiya, la buk yei kattan gokminam. "Diijikujum, kumno ne yu paaro kan memmei". ⁴⁰ Kaa ye mo an toomi kunnga ti shii, Buluj in sheren ne nin ti ku digan po sherii, in kamro memme ka kira. Bara ye shinui yuwaa yititi, in yuun paaro ti shii ta fok Araamiya.