¹ Ka bi ye min kauraamu nang minin yaara ya, pimbirim ya shommo koran buk teerei Malta. ² Memme tarang minai in yuumu min ding, shinui in piiremu deet longku ti ku ya doo, birang in ti ya duulau. ³ Buluj in gangullu nyir shuwe in ti shoppon ti deeti, nang den deeti in kai rin shammam ti ta nyir shuwei, in keen Buluj ti kirai. ⁴ Bara ye memme tarang minai weyaa shik kuret lokrii ti shik kirano Buluj,nang in tewi ti shaayi ya, "kulli, la-moo yei an tukyo niyo, ma gee kaa ye shii dogi diina kaa ku nyimrit daa manna ti ta paali doo, bambiri dum ti ku yiu biini ka we tukani." ⁵ Buluj in yikro shik kirani in ving kureti ti ta deet, pene a shar piram. ⁶ Shinui in nyimmina ya ta oworo koo dangi in shugno kpantidi in muroni, pene bara ye shinui diyaa bak a wa shik wee yuwaan ten ti shikniim, nang shinui in paaroku nyimmoju ya shii manni Yammai. ⁷ Ti po teere nimmi ka manni kudami,we an ku koran buk shakki dooi, ye shommonii Fubiiliyash. Yikka mui shii, in min mu po durani yen kpang, po shaklo tat. ⁸ Fono Fubiiliyash kuttii shiki kan agin kan kuruna. Nang Buluj in ri shiknii in forin fok ti kuunii, in liin kirani ti kuunii, niyoi in yooni bang. ⁹ Bara ye we te yuwaaro, dogi me shikii bangum ti koran buk ye ti shakki dooi in wangittu, nang in we bang shikju. ¹⁰ Shinui in yuumu kunngu gbe. Nang bara ye min tanga koomu ti ta gong doo, shinui in ganglomu do wee min leka ding. ¹¹ Ka bi tere tat, minin illina ti ta gong doo me ti Elekjandiriya ye yuwaa viyo tiku koran buk teere. Me ti po teere yuwaan teman pi romij Yamma ti shii. Gong doo kan we shiwo shiki. ¹² Bara ye min foonna Shiraakush, minin shakilla ti po teere. ¹³ Nang minin koomu, kpantidi gee min wono ti Rigiyum. Ka bi shaklo dok, pirit in illiru ti kudo dang. Pirbang minin fooro Futiyooli. ¹⁴ Ti po teere minin kpomi kan peddi me an ballai, shinui in bengmu ya mo min yuuju shaklo parilau. Kaa we tei minin fooron Rooma. ¹⁵ Bara ye me an balla me ti Rooma yaaraa shinnyimu, nan shinui in waru longku yuumu kaa ar kudam po piplo we te ti Afiyush, kan po teere ye ti tewi yaa po duro tat. Bara ye Buluj weyaa shikjui kaa te, nang in pammina ti Yamma, birangshii in tokko shaari we bang vurum. ¹⁶ Bara ye min riyaa Rooma in kumi ti Buluj mo wa deeni ti mina ye ti angngina kan an bee deet ye ti jooro kuunii. ¹⁷ Ka bi shaklo tat, Buluj in ye men gbidina Yawudaawa. Bara ye shinui gallaa, nang shii in tewon ti shinui ya, "ma molonno, kaa ye nei daklo we ti memmemu kamam, yei daklo we ti diya ma fowonmu kamam, shinui in yirun nen kaa tei ti Urshaliima, in dauno, in minno ti Roomawa. ¹⁸ Kaa ye shinui yippaa dakno, shinui in leu foran nen kira, longku shinui a weeno kan kelnye ye fooraa nen waan kaara murom. ¹⁹ Pene bara ye Yawudaawa kuraju kumani, nang in yiuno ti gbare-do nen shokuttu yaan gunno we waru toomno Keeshar, kaa ye ne ta yaani gun memme mu kamam. ²⁰ Longkuuno te, ne telaa na ne leka we shik ma kan nen deppo paaro kan ma. Kaa ye longkuuno te, ye shii Ishereila liyaan shaariju ti ku waranni ye shinui dakano ka we eem te. ²¹ Nang shinui in tewon ti shii, "minui wa yaan balla ti kira me ti Yawuudiya longkuukom, kan a doo dok ti shakki ma molon me wanna ti po teere ye weyani, wanna in teu paaro ti shkkom. ²² Pene min leka yaaroko ken teumu geyan sheeko, longku min penaa memme ti koo tong ti ku yuyyo piire paaro ti koko wawo yen fo te. ²³ Bara ye shinui liyaa darang ye ta kpomin kan Buluj, nang darangi, shinui in wariju po duronii, shinui wanna shin gbe kping. We yikka ka shaat we war kiryippo, shii in ti sheeron paaro, in ti kpaalon po paaro ti shinui ti ku gubno Yamma, shii in li shikni kaa tollu shinui ka we war shikno Yeesho ti bi shubet ta fokno Muuja kan balilon we me an-pigro. ²⁴ Peddi in kumi ka wee shii teka, pene peddi a kumum. ²⁵ Longkuuno te, a kumkan shaayi ta shinuim. Maa ti tang wessho po teerei, Buluj in yuun paaro dok ti shinui ya, "Duma, shoom yen shaana, teka yen kulli, ye yuwaa paaro ti ma fowonmu kama ti fokno an-pigro Isheeya ya, ²⁶ "Koo ke war shik memme te, ken tewon ka, yaarani, ma ta yiu yaarani, pene ma ta jemlani foki dokum, ye weyani, ma ta yiu weyani, pene ma ta penanim. ²⁷ Longku poshaari memmei fuwaa po yooro bang, shinui kpanglaa ta kumoju, in numyo adooju, longku yoo shinui we ka adooju, birang shinui in yaara ka kumoju, shinui birang in peni ti poshaariju, ar shinui in shiru shikno nen niyaan ka shinui". ²⁸ "Oo, nang man peni, Yamma shuraa ka shinnyi marku ti mei Yawudaawam sheeju. shin sheeju ta ke kumoju". ²⁹ Bara ye teka kaa te, nang Yawudaawa in illina ta shinui peeb in ti ya gbong shabbi ti shakkiju. ³⁰ Buluj in diina ta mina te ye ta angngani po sheno palau, shii in ti yiu me ding wanna shikni. ³¹ Kaa yei foddon fok kpaalo po paaro Yammam, in ti ya shubet ti kuuno Fo-mina Yeesho kiriti a do shewom.