¹ Ka bi ye bobaki yuwaa maj-maj, Buluj in ye me an ballai. Bara ye shii peeka shikjui, nang in minin memme ti shinui, in kooni war Makidooniya. ² Kaa ye ti po teerei, shii in min bang vurum ti me kunnga ding ti me ti tarang mina ye shii waraa. Nang shii in shaanibuk Girik. ³ Ti po teere, shii in diino po tere tat.Ti ku kengmo shikni ka we reeni ta gong doo ka we wanni buk Shuuriya, nang Yawudaawain yuun piire nyimmo ti kuunii,kaa te shiiin yiwani Makidooniya. ⁴ Memme gbe ti ku merei kan shii, ma Shopaata kan Paarush me ti Biiriya, Arishtakush kan Shakundush me ti Tasshalonika. Gayush niyo Deeba. Timotaawush, Tikiikush kan Turopiimush me ti kpakan po buk Aashiya. ⁵ Shinui in kooju ti toom in war wa dang kuumu ti Turowash. ⁶ Ka bi temre teelani fuwaa pitto, minin meemu ta gong doo ti pilipi ye ti Makidooniya, kan ka bi shaklo fuwat minin wa we shinui ti Turowash. piree mun diyaan po shaklo parilau. ⁷ Darang dok ti ta shaklo parilau, minin gali kan me an balla longku sha wesshiina kiryippo ka shaayi. Buluj ti ku yuun kaawi ti shinui, kan kaa ye shii ta wessho shinui pirbang, shii in sha toom ka yuun paaro ti shinui we war nang shakki yippo. ⁸ Ta gume kudang piree min galaan ka ejiyan deet. ⁹ Kaa ye Buluj ti ku ya paaroi, ka manni la kparini, shommonii Erotikosh, deeni ti piran jwal po she pirit shik mina, shaklo in yiu shii. Ti wilani, shaklo in shar shii, in shugno ta shii ti won ti ku-dang, ti ammo an tati, nang in shokro shii kumai. ¹⁰ Nang Buluj in shaani buki in tuumo shikni in taamo shii, in tewi ya, "ma wessho turmomai, longku shii kan dwei." ¹¹ Nang Buluj in meeni ku-dangii, in bwatto we-ta- kele minin sha ka bi in shuun toom ka yuun paaro ti shinui we kpaalo ta piri, nang ka bi shii in kooni. ¹² Shinui in kooju kan la kparini kan dwei, nang shinui in ya beere kping. ¹³ Minin war toom piree kan gong dooi nang minin koona we war Ashush, piree min ta waraa sharin Buluj ka we yuun toom. Shii fuwaa pi temyo pi weeni, longku shii ta war po teere ka sho. ¹⁴ Bara ye shii weyaa mu ti Ashush, minin shar shii we war Miliita. ¹⁵ Pirbang minin sha toom ka mere ti ta gong doo we war Kiyosh. Ta piri maa ti kpalla, minin teelo Shamosh, pirbang minin war Miliita. ¹⁶ Buluj nyimmaa yiwani Afiisha longku a ta daklo koddi ti ta kpakan po buk Aashiiyam, longku shii ti ku dawal war Urshaliima, modaa ta yooro, daa fooroni Urshaliima darang temre pentakosh in tang yaani. ¹⁷ Ti Miliita, Buluj in shuri ya mo yeeni men gbidina an balla. ¹⁸ Bara ye shinui wanna jelenii, intewon ti shinui ya, "ma po kuuma ma penaa peen diya ye ne yuwaa ti shakkima, we yinna darang ye ne shonna ti buk Aashiya. ¹⁹ Ne wawaa Fo-mina ka poshaari dok kan muru, nen kurmina kan nawo peeni-peeni ye wanna shikno ti piree kan piire shuran ye Yawudaawa balaa ya yuuno. ²⁰ Nei daifo yuuma kaawi ye ta yooro yen piire kan mam, nen ti yuuma kaawi kan shubet ti kudam, kan nen ti war mina-mina. ²¹ Ne teka ti me Yawudaawa kan mei Yawudaawa, na yiika shinui ti gbare-do in for-fokju, meeru shikno Yamma kan in lishaariju ti taano Fo-mina Yeesho. ²² "Gee wende, shoom ti ku shaaru ti kuuno, ne ta war Urshaliima, pene nei peno wee ta weeno ti po teerem. ²³ Bara shoom yen shaana ti piri ding ta jimrono ya nummani kan taa shilibi tadang kuuno ti gokmina ding. ²⁴ Pene nei shiwan kerangno weenan dogum, bara ma nei ta dum fu shuran ye Fo-mina yeesho minaano ya mo ne yu, kaa kpaalo po shinnyi yen tomon kunnguno Yamma. ²⁵ "Wende ne penaa a doo dok ti shakki ma mo ne shalii ti ku kpaalo pi gubni, ye ta we shigno birang. ²⁶ Longkuuno te, ne teka booi, ne kan dumno mondokum. ²⁷ Longku nei daklo koddi sheero ma nyimmono Yamma dingum. ²⁸ Ma jooro kuuma kpang kan dinnyi me shoomno Yamma liyaa ma me an jooro shinui. Ma shu toom ka tii memme an balla me Yamma pilla ti kuuni ka domno Laani. ²⁹ "Ne penaa ma nei kookano, pidire angurateele ta riiru shakkima, ye shinui a ta wessho we-ta- gunim. ³⁰ Modaa ti shakki mai ka me ta illiru ta yuyyo pap-paaro shaba, longku shinui in tol me an balla ti shakkiju. ³¹ Longkuuno te, ma jooro bang! Ma nyimmo po sheno tat, nei dai-fo pekro ma ma ding yippo kan darang kan murum. ³² "Wende ne minaa ma ti Yamma kan ti ta paaro kunnguno, ye shii ta dig ma kan in minma po aa ti shakki ding me sheenaa shinui. ³³ Nei nau lawwo kine yei lannano mondokum. ³⁴ Ma po kuuma, ma penaa ne yuuna shuran kirano, longku nen tutton kennino kan she me dii ka shaayi kan ne. ³⁵ Ti ta we te ding, ne temyaa ma na yikka ti gbare-do man ya shuran kaa te, longku kaman shau me lomgku kuugero. Man ti nyimmina ka paarono Yeesho ye teka ya, "minani yeka yiwani kpang." ³⁶ Bara ye shii teka kaa te, shii in toomo shikni kan shinui ding in for-fok. ³⁷ Shin ding in ukko muru ta shinui, kaa ye shinui taama shii. ³⁸ Wee turmaa shinui kpingii paaaroni ye teka ya shinui a ta we dooni birangum. Nang shinui in liin biinii we war jele gongi.