¹ Ta koddi ye Apoloj ti Koronto, Buluj ti ku merko tarang buk, we fooro Afiisha, piree weyaan peddi me an yiu shubeti. ² Shii in tel shinui ya, "Ma yikka shoomno Yamma koddi ye ma kunnga kan shii ya?" Shinui in liginna ya, "ongngoo, minui nau yaaraani ya ka shoomno Yammam." ³ Shii in tel shinui ya, "Duma yuwaa mai peen yulma wen? Nang shinui in lignon ya, "yulmano Yuwaana." ⁴ Buluj ya yulmano yuwaana yuwaai we for-fok ya shasshalau, pene Yuwaana po kuuni teka ti memme mo kumu kan mo ta waru ka biini, ye shii Yeesho. ⁵ Kpantidi ye shinui yaaraa kaa te, nang in yuun yulma ti shinui ti ta shommono Fo-mina Yeesho. ⁶ Nang bara ye Buluj liyaan kirani ti kuujui, shoomno Yeesho in sherin ti kuujui, nang shinui in yuyyo paaro ka dak peeni-peeni kan shinui in yuyyo pigro. ⁷ Shin ding fooraa niyo kpumu gee palau. ⁸ Nang Buluj in war ta mina for-fok, in ya kaawi ka poshaari dok po tere tat, in ti tollu poshaarijui ti ku paaro Yamma. ⁹ Pene peddi in shiwaju me an bang kumo in kuroju kumani, ar shinui in sheero ding paaro ti me ti yiu bi kokono Fo-mina te ti kudam ti toom memme. Longkuuno te, Buluj in fulin bi kan shinui, nang Buluj in wessho ta mina for-fok, in kooni kan me an ballai, kpaaliya ding shii in ti shuppina ti po meeri Tiraanush. ¹⁰ Shii in yiu yaani kaa te po sheeno palau, longku me ding dii ta buk Aashiya, me Yawudaawa kan mei Yawudaawam shin ding in yaaro paarono Fo-mina. ¹¹ Yamma in min kumen ya peen maam yei leero yaanim ti Buluj. ¹² Ye bara shumma shwangro shuwo do yei laannani ye maa teeka shikni, maa waraan ti me shikii bangum, nang shinui ta tasshoju, pi-piire shoom ta wessho shinui birang. ¹³ Ka worang ku Yawudaawa me an merko gokmina we war gokmina in ti foddo pi-piire shoom ya, "Ne pekraa ma ti ta shommono Yeesho te ye Buluj ti yuun kaawini. ¹⁴ Ka me molon shaayi shibano Shikiiba mo an toom me an kpaa, shin ding ti ya we te. ¹⁵ Pene manni koddii bara ye shinui naka yaani, piire shoomi in liginna ya, "Ne penaa Yeesho, kan nen pen Buluj, pene ma sheema mai ma nong?" ¹⁶ Nang niyo ye kan piire shoomi, in illo kuujui, in yek bangjui shin ding, nang in shuwon ti kuujui ka liyyon pira, nang shinui in perenjun ta minai ka yoba, shikjui waani, kan shigjui ku jal pira. ¹⁷ Shinnyi wee yuwaaro in kudan fooro ta kumo me ti Afiisha, Yawudaawa kan mei Yawudaawam.Gbong shewo in yiu me ti tarang gokminai, nang shinui in shokro shik shommono Fo-mina Yeesho. ¹⁸ Gbe me kunnga kan Yamma in for-fokju ka ya shasshalau. ¹⁹ Gbejui me ti ya shuran ningo, in gangullu do alau ballaju in warin in kur shinui ti kudam po kur we. Kine shik balilan alaujui yuwaa kine ye mo an shuran shuwo darang ta weyani po shaklo shig fuwat sho shik dok. ²⁰ Kaa te, po paarono Fo-mina in fu ta piri gbauyau, kan in yooro bang kping. ²¹ Ka bi we te ding, Buluj in li ti poshaarini ya shi maa merkaa ta buk Makidooniya kan Akaaya, shin tang war Urshaliima. Shii in tewi ya,"kan ka biino teere, nen tang war Rooma!" ²² Shii in shur me an shawoni ye shin palawi, ma Timotaawush kan Erashtush, mo warju toom kan Makidooniya, nang shii in bereni bi ti ta kpakan po buk Aashiya. ²³ Ta koddi teere, shabbi kping in illina ti Afiisha ka longku do koko te. ²⁴ Liina guni ta Dimatiriyash an kuwa, ye ti ya shuran ka laa bela ye ti kutirin jirim mina wawono Artimash. Shi kan me an shuranni ti waan kine gbe a la wiiwum ti shik shuranjui. ²⁵ Nang shii in ye shinui ti do shaayi, kan me sharaa shinui ta peen shuran te, nang in yuun paaro ti shinui kaa lee, "ma memme, ma penaa birma mu kama ti warui ti shik shuran ye. ²⁶ Pene kaa ye ma weyaa kan man yaaraa, a ti Afiisha te dokrom kan an gbe buk Aashiiya ding, la-moo ye, ye yaa Buluj ye, kparaa poshaari memme gbe kping. shigan ka poshaarijui ta shii, in ti tewi ta shii ya, Yamma -Yamma ye kutturaa ka kira, yaa Yammam. ²⁷ Kulli, ne ta ya paaroi bara ti ku min gbe ye memme ta minani ti ku shuran mu kamam. Ne turmaano ka gbong mina wawono Yamma Artimash, ta shiwon tei waani, birang ta bwaaro tei kan illoro, tei ye ti buk Aashiiya ding, a ku jaltom, ku-buk ding ti wau tei". ²⁸ Bara ye shinui yaaraa kaa te, nang shinui in kemeju ka den kping, shinui in alin ka yallo foki dok ya, "Gbai weeno Artimash buk Afiisha ding!" ²⁹ Nang tarang minai ding in jubloro, memme in juwoju in warju kudam po galo, in ti tollo ma Gaayush kan Arishtakush, memme Makidooniya, me shinui me an jeere mereno Buluj. ³⁰ Buluj deena ri ta galo te, pene me an balla in beelo shii. Pene me an balla in beelo shii. ³¹ Peddi men gbidino me an gub buk Aashiiya, me shinui me an jereenii, shin sheeju in shurin ti kuunii, shinui in beng shii, mo wessho sharaani ka dallam in ri shakki galo teerei. ³² Ti shakkii, memmei ding ti ku ya bobak, longku shinui a peno wee shinui gallan ti kwiim, peddi in ti shoppo bobak we waani, peddi in ti teu weenan dokro. ³³ Peddi Yawudaawai in shennu gun manni niyoi ya shommonii Elekjanda mo sheero wee ti ku yooro. ³⁴ Pene bara ye shinui jemlaa shii niyo Yawudaawa, in shokro eleju kan bangi foki dok in ti tewi ta shinui ya, Gbai weeno Artimash Afishaawa foki dok!" shinui in yiu yaani kaa te pelle po koddi la tali. ³⁵ Ka bi, mo an ya balla memmei in li shinui mo yu yititi, in tewi ya, "ma me ti Afiisha! koo nong penaa ya gokmina Afiishai ye ti jooro ku mina wawo mongba Artimash kan Shilla yen shaana ye shugna ti ku-dang. ³⁶ Kan ye tenei paaro shabam, ma kemo shik ma kan mo ma yu we ka gban ta gongoi. ³⁷ Ma wanna ka shwiji me po te, pene shinui a jir we ta mina Yammam kan shinui a yu paaro ti shik Yammamu kamam. ³⁸ "Ma Dimitiriyash kan me an yemo maa kan manni we turmoi kan manni niyoi, ai, gee mina shiire foki awani, birang gee me an shiire, nang mo shinui yuun gunjui ti toomjui. ³⁹ Kan birang maa ka manni wei dokro ye shinui leka man peni, ta dum limma shakkijui ti toom me an galoi. ⁴⁰ Sheeno poshaarino belani kan kama ta shilibi kaa ye kama ti ku ligno shiire ka shabbi booi, kaa ye kamai ta dum sheero wen longku wee yuwaro ye yeena shabbii in yooroi. ⁴¹ Bara ye shii teka kaa te, nang shii in ti li bi galoi ye shinui in kooju.