¹ Nang Buluj in wessho Atiina in wanni Koronto. ² Ti po teerei shii in kpomi kan manni niyo Yawuudiyai shommonii Akiila, ye pattaa shii ti buk Pontush, ye baa foottu ti Itaaliya kan mannani shommoroi Birishkila. Shinui wesshina Itaaliya longku ye kalaudiyush Keeshar yuwaa shoro ya mo Yawudaawa ding wessho Rooma. ³ Buluj in deeni kan shinui in ti ya shuran ka shaayi, longku peen shuran kiraju dok, shuran toniro ten. ⁴ Darang nessho Yawudaawa ding, Buluj ti war ta mina for-fok Yawudaawa, in ti deppo paaro kan shinui, in li shikni ka we tollu kira Yawudaawa kan mei Yawudaawam. ⁵ Kan ka bi ye ma shilla kan Timotaawush shaana ti Makidooniya, Buluj in shar koddi ni ding ta kaawo paarono Yamma. Shii in peejo bi ti Yawudaawa ya Yeeshoi Kiriti. ⁶ Pene shinui in yuun jiram ti shii kan in kpakko shii, Buluj in tudiro kpisshi shig lannani in tewon ti shinui ya, "Dom ma ti kuuma! Ne kam nei daklo wem. We yikka booi, ne tayiu waranii shik mei Yawudaawam." ⁷ Nang shii in wanni minano Taitiyush Jushtush, moi Yawudaawam, an wau Yamma, minani nimmi kan mina for-fok. ⁸ Kirishbush, mo an toom ta mina for-fok, ka me ta minani ding in kumi kan Fo-mina ta shinui. Memme Korontiyawa gbe me yaaro kaawino Buluj, in kumi ta shinui, nang in yuun yulma ta shinui. ⁹ Manni yippoi, Fo-mina in ya paaro ti Buluj ti ta shuna, in tewon ti shii ya, "wessho tooro kuukei! ¹⁰ Longku ne ka ne kan ke, birang a doo mo ta shuwoni ti kuuko in yuuko manni weim, longku memmeno gbe ti tarang mina te," ¹¹ Kaa te, Buluj in diino ti po teere po sheno dokkan tere paragbanang, in ti kaawo paaro Yamma. ¹² Pene bara ye Galiiliyo shigani gub Akaaya, peddi Yawudaawai in illina ti shikno Buluj, in warin shii toom gub ka we shiiro shii. ¹³ Shinui in kpaa Buluj ya, "la-moo ye ti li memme mo wau Yamma ti koko ye shoroi kumum." ¹⁴ Pene kaa ye Buluj yikka kon fokni, nang Galiiliyo in tewi ti Yawudaawa ya, " mo da shii daa daklaa daa manni wei, yei gbong daklan we, ne daa yaaraa ma. ¹⁵ Pene kaa ye wei jiram deppo paaro waani, kan shommo-shommo, kan shoroma, nang ma pen po shakko ta weema ka shikma. Ne kam, nei li ti poshaarino ne ta shiiro peen we tem." ¹⁶ Nang shii in kayin biijui ta mina shiirei. ¹⁷ Nang galoi in yiu Shushtaanush mo an toom ta mina for-fok, in yuun tuwa ta shinui ti shii ta mina shiirei. Pene Galiiliyo a kaan kumoni ti shikjuim. ¹⁸ Ka biino teere, Buluj in shakillu ti Koronto, nang in minin menne ti ma molonni me an balla. In reeni ta gong kan ma Birishkiilakan Akiila, nang in kooju war Shuuriya. Pene ye tanga illani, Buluj in kul kuuni ti Kankiiriya kaa ye Yawudaawa ti ya kulang in ya deewanku. ¹⁹ Bara ye shinui fooraa Afiisha, ti po teere Buluj in wessho ma Birishkiila kan Akiila, nang in wanni ta mina for-fok, in deppo paaro shin kama Yawudaawa. ²⁰ Nang shinui in beng shii mo tokko shaari nesshani kan shinu, pene a kum ta shiim. ²¹ Kaa ye shii ta kooni, in tewon ti shinui ya, "Yamma maa kunnga, ne ta shiru birang." Nang shii in illina ti Afiisha ti ta gong doo in kooni. ²² Piree shii sheeraan birangii ti Antaakiya, in ammina in wa kaaru me an balla me ti Urshalima, nang inmeeni Antaakiya. ²³ Ka bi ye shii la diyaa bak ti po teere, nang in illina in me-merko buk Galaatiya kan Firiijiya, in ti yiu bi gokmina-gokmina, in ti pee shik vurum me an balla. ²⁴ In ti kuttina , manni niyo Yawudaawai shommonii Apoloj in waru Afiisha, shii la me ti buk Elekjandiriya ye ti Mashar, mo penaa paaro. ²⁵ Shuppaa shii ka paarono Fo-mina. shii ti pessho shikni kping ti ta paarono Yamma. Birang shii ti shuppinai ka koko kulli ti kuuno Yeesho. Pene shii bara penaai yulmano Yuwaana waani. ²⁶ Shii in yiu kaawo paaro ka bang ding ti ta mina for-fok. Bara ye ma Birishkiila kan Akiila yaaraa paaronii, in ye shii ta shinui ti jele, in tokkon shaari pen kokono Yamma kping ti shii. ²⁷ Apoloj ti ku nyimmo war Akaaya, me an balla in shau shii. Shinui in ballo alau ti an balla me ti Akaaya longku mo shinui yiu shiio kira palau. Kaa ye shii fooraa po teere, shii in yooni mo an shawo kping ti shik me kunnga ka kunnguno Yamma. ²⁸ Longku shii kannaa Yawudaawa kulli ti toom memme, shii in ti peen bi ta Balilan paarono Yamma ye ya Yeeshoi Kiriti.