¹ Wende koddi ye ma Buluj kan Shilla merkaa tarang gok-mina Ampibolish kan Apoloniya, nang shinui in waru Tashlonika, piree kan mina fur-fok Yawudaawa. ² Kaa ye Buluj ti yuun, shii in war ta mina fur-foki ya wawo, in jebbo shaklo tat ti gun shaayi, shii in ti sheu ta paaro Yamma kan shinui. ³ Shii ti ku twailo-do yuyyan pigra kan peejon-bi ya Kiriti ta taa-shilibi,kan ta illoni ti shakki me kumai. Shi in tewon ya, "Yeesho ye ne ti sheeromw piri te, shii Kiriti." ⁴ Peddi Yawudaawai kan Elenaawa me an wau Yamma kan gbidina sherebgbe me yaaraa ma Buluj kan Shilla, in kumi ta shinui, in shemo mayaju dok kan maBulj kan Shilla. ⁵ Pene peddi Yawudaawa, me shinui an-mwisshi shinui in gal-do peddi ms an bang-ta-kumo ti kudam po-pilo-we. Bara ye galaa, shinui in yiu shiwa-ku tarang minai. Shinui in ri ta minano Jaashon in ti gassho biima Buluj kan Shilla longku shinun warin toom memme. ⁶ Pene bara ye a wa ta shinui tipo teerem, shinui in tolluru Jaashon kan peddi mean ballai ka po shoojui, nang in warin toom me an-gub shiire in ti ya yallo kan in ti tewi ya, "Memme me ti ku teeru nee ti ku-buk ding, gee shin wono foonna po te tiku turmo gok-minamu sheero. ⁷ Memme shurme me Jaashon yikka, shinui ti ku ya wee shorono Keeshar a kum pirim; shinui ti tewi ya ka manni gbong an-gubi yaa Yeesho." ⁸ Nang bara ye me ti tarang gok-minai kan me an gub-shiire yaaraa we te, poshaarijui in gbanoro. ⁹ Pene shinui a foran-kira ka ma Jaasho kan peddi me an ballaim. Nang bara ye yikka kine paaro-ku ti kirajui, in tang foran-kira ka shinui. ¹⁰ Ka yippa teere, me an balla in shr gun ma Buluj kan Shilla ti Biiriya. Koddi ye shinui fooraa po teere, shinui in war ta mina fur-fok Yawudaawa. ¹¹ Nang Yawudaawa me ti Biiriya yeka me ti Tasshlonika nyimmo, longku shinui yikka paaroi ka poshaari dok kan kira palaw. Shinui in ti sheu ta paaro Yamma kpaaliya ding, kulang shinui in peni wee ma Buluj kan Shilla ti tewii yen kulli. ¹² Longkuuno te, Yawudaawa gbe in kumi kan Yamma, kaa ye gbe shwiji kan shereb me kan gbidina po-shire kunngan. ¹³ Pene koddi ye memme Yawudaawa ti Tasshaloonika yaara ya Buluj ti ku kaawo paarono Yamma ti Biiriya, shinui in war po teerein turmo memme. ¹⁴ Kpantidi me an ballai in shur gunno tipo shiiruk, pene ma Shilla kan Timataawush shinui in dangi ti po teere. ¹⁵ Me an li biino Buluj in wanna kan shii we fooro Atiina. Nang kaa ye shinui ta meeruju, Buluj in sheettin shuran ti ma Shilla kan Timataawush ya mo shinui wa weeni peeb, nang shinui in kooriju. ¹⁶ Wende kaa ye tida Buluj ti ku dang kuuju ti Atiina, poshaarinii in gbanoro kping ti ku ye weyaa tarang gok-minai kenngaro ka we-kuma-we. ¹⁷ Longku kaa te, shii in war ta mina fur-fok in deppo paaro kan Yawudaawa kan peddi Elenaawa me ti wau Yamma. Kaa ye ti po ppiplo-we kan me ka shin ti po teere. ¹⁸ Pene birang shii in deppo paaro kan me an shubet ye ti ye yaa Abikuriyaawa kan Shitokiyaawa me penaa-we. Shinui in ti ya jiram kan shii. Peddijui in ti tewi ya, "Mo an bobak ye, leka tewanii wen?" Peddi in tewi ya, "Kaa mo an ya kaawi bino-bino yamma yei peen she po tem." Shinui teka kaa we tei longku Buluj tiku kaawo paaro shinnyi yen tomonno Yeesho, kan birang ilit ta duwo. ¹⁹ Shinui in shar Buluj in warin shii ku-dongor Araasha ti toom po galoju, shinui in tewon ti shii ya, "Koo ke ta waru ke aumu-do bino shubet ye ke ti ku yaani te ya? ²⁰ Longku minui nau yaaro pa-paaro tem. Min leka minun pen ween shurme te ta shuklani." ²¹ Wende me ti Atiina ding kan me bino me dii ti Atiina, leka ta shinui in yaaro we yen fo, birang shinui in yuun paaro ti kwi, ye yeka koo wen. ²² Kaa te Buluj sherii ti toom galoi, in yuun paaro ti shinui kaa lee ya, "Memme Atiina, Ne geeka mai me wawo ti koo kokono yen shire. ²³ Longku kaa ye ne ti ku merko tarang gok-minai, ne weena shik wee ma tiku wawi. Kan ti ku manni po wawoi, ka yaan balla ti kuuroi ye ti tewi yaa, "Longku Yamma yei peno shiim! Oo, shi te ye ma ti wawi ye mai peno shiimmi, shii mo ne ti ku sheero ma pinnii. ²⁴ Yamma ye yuuna ku-buk kan koo wen ye ti taaro, kaaye shii Fo-mina ku-dang kan buk, a ti diina ti ta ye diga ka kiram. ²⁵ Koo in gassho sawo ti kira memme, kaa pelle ye shii leka manni wei, shi po kuunii ti minii ti memmei kerang kan for-shuna kan dogi wei ding. ²⁶ Ti shik niyo dok shii kpiina memme ding, longku shinui in diina ti ku-buk. Shii limyaa kpakan fok koddi, kan piree koo memme shire ta diyon, ²⁷ longku ye Yamma yuuna kaa we te kulang shinui in gassho biini, kergum in we kokoju we war shiknii, kaa ye shii a tali kan mondok ti shakkimu kamam. ²⁸ Longku teka ya, "Kaa ma dii ti taani, kaman ti middo shik, kan birang kama dii. Bara kaa dok ti shakki mean vonakma teka ya, 'Longku kama sheemui kamai po-peenni." ²⁹ Longkuuno te, kaa ye kamai po-peenno Yamma, ai, ayu kpang kama in nyimmina Yamma penna manni temo bela, koo laa-bela, yei shiila men kpattirin, ye niyo kuttaa ka shennim. ³⁰ Longku Yamma waka dooni ti ta koddi dil-ku, pene wende shii pekraa memme ding ti kootong mo shinui for-fokju. ³¹ Tenei longku liyaa darang ye koddi ye shii ta shiiron ku-buk te ti piree kan dob-dob niyo ye shii shaka. Yamma shukilla kulli niyo te ti koo nong ti bi shokran shii ti shakki me kuma." ³² Wende koddi ye memme Atiina yaaraa pi ilit ta duwa, peddi in ya shwaal ti shikno Buluj; pene peddi in tewi ya, "Min leka yaaroko birang ti ku paaro te." ³³ Ka biino te, Buluj in wessho shinui. ³⁴ Pene peddijui in kumi kan paaroi, in Shem meeju biino Buluj, ti shakkijui Diyonishiyush, dok ti shakki me an shiire, kan manni paamuni ye shommoroi Danarish, kan peddi me shinui ka shaayi.