¹ Nang Buluj ka toom in war Daaba ka bi in tang war Lishtura, piree weyaa la-ilit mo an yiu shubet ye shommonii Timoti, shii la manni paamun Yawuudiyai an balla ta tei, pene fonii niyo Elenaawa. ² Me an balla me ti Lishtura in ti kum-pinno Timoti kping ta shinui. ³ Longkuuno te, Buluj in leu shii mo shin koo ka shaayi, kaa te shii in wa kar kuwonii. Longkuuno te, Yawudaawa me ti po teerei shin ding penaa ya fono Timotii niyo Elenaawa. ⁴ Kaa ye shinui ti ku merko gok-mina gok-minai, shinui in peen bi ti memmei sheran ku-paaro me an kaawi kan men gbidin me an balla ye kunnga mo warin Urshaliima, shinui in tewon ti me an ballai mo shor-shiki. ⁵ Kaa te me an balla in tokko shaari bangju ti ta li-shaari, gbeju in tokko-shaariro kpaaliya ding. ⁶ Birang ns Buluj kan Shilla in merko gok-mina Piriigiya kan Galaatiya longku shoomno Yamma foddaan foki ti shinui mo wessho kaawo paarono Fo-mina ti Aashiya ti ta koddi teerei. ⁷ Koddi ye shinui nemna waru ku karak kan Mishiiya, shinui in gassho po ri ta buk Bitiiniya, pene Shoomno Yeesho in foddon foki ti shinui. ⁸ Nang shinui in yiwaju jele buk Miishiya in shaaju buk Turowash. ⁹ Ka yippa teerei, Buluj in we shik jirim, Manni niyoi ti Makiddnoya ye ti kudo laddi ti ta buk Elenaawa, sherii ti po teere, in ti beng shii ya, "Amru Makidooniya ken shaumu." ¹⁰ Kaa ye Buluj weyaa shik jirimi, kpantidi minun li shik mu ka we teelo Makidooniya, longku minin pwni yeyaamui Yamma ka longku minin yuun kaawi shinnyi yen tomon ti shinui. ¹¹ Nang minin illina ti ta gong-doo ti Turowash, minun shettemu war Shamutarkiya. Pirbang,minun war Niyaapolish. ¹² Ti po teere, minun fooro Pilipi, gbong gok-mina ye ti ta buk Makidooniya ye ti ta gun gub Rooma. Nang minun shakilla gbe ti po teere. ¹³ Darang nessho Yawudaawa, minun perii tol-shikmu, minun war po shiiruk piree min liyaan shaari ka po fur-fok Yawudaawa, minun deemu dii,minun ya paaro kan shereb me galii ti po teere. ¹⁴ Ka manni paamuni ye shommoroi Liidiya, an wau Yamma ta tei, Lidiiya ti ku yaaromu. Tei lai me ti Tiyaatira, tei ti pipila ka alak lanna yen kparkidak. Kaa ye tei ti ku yaaromu, Fo-mina in au poshaariroi, kan teu in yiu wee Buluj ti ku sheerani. ¹⁵ Koddi ye tei kan me ti ta minaro yuwaa yulma, tei in bengmu ya, "Mam maa kunnga, nei an-balla yen kpang ti taano Fo-mina, ma waru man duri ti minano." Nang tei in dimmomu, nang minun kumi. ¹⁶ Pirbang ka shaat min ta sha ta mina fur-fok, minun kpomi kan la paanu ye shanngau sharaa kwi. Tei an-pirak ye ti weeru kine gbe ti ma fo-minaro. ¹⁷ Tei in yiu biino Buluj kan dogimu, in ti shoppo bobak ya, "Memme tei me shookno Yamma mo ti ku-dang bak, nang shinui wannai teuma ye ma po waan mar-ku." ¹⁸ We te in shooro-toom ti ta shaklo shurme. Pene ta aano Buluj in gbanoro kping, in shiwa dooni in tewunti shanngau ye ti taaroi ya, "Ne pekraaji ti ta shommono Yeesho Kiriti, perenjin ti shikroi." Nang kpantidi in wessho tei. ¹⁹ Koddi ye fo-minaro weyaa koko po we kineni kpalaaro kaa te, shinui in yippo ma Buluj kan Shilla, nang in tollo shinui in warin toom me an an-gub shiireti kudam po piplo-we. ²⁰ Bara ye memme waraan ma shinui toom me angub shiire, in tewi ta shinui ya, "Yawudaawa me ti ku turmo tarang mina te. ²¹ Shinui ti ku shuppani ka we ye kuut-mina yei nenno memme Rooma in shar shubetim." ²² Nang memmei in gallin ti kuujui, me an-gub shiire in jadiro ta lanna shikjui,in foddo lannai, shinui in min kumen yuun tuwa ti shinui ka biro-biro. ²³ Koddi ye fuwaa po yuun tuwa ti shinui kping, in nang nummo shinui ti ta mina-muruk. Shinui in tewon ti mo an jooro ku mina-muroki, ya mo piime wessho wesshani in juwajui. ²⁴ Kaa te mo an jooro ku mina-muruki in li shinui ti ta gume an jele-bi kan in shoppon biro too an-shanngau ti shoojui. ²⁵ Ka nangshakki yippa, ma Buluj kan Shilla ti ku fur-fok kan ya vonak ti Yamma, kan peddi me an for-shuna in ti yaaro shinui. ²⁶ Kpantidi ku-buk in ya shor, ye in li kel mina-muruki in middoahikro. Kpantidi podang mina-muruki sing in appaju, we-ee shoo me ti ta mina-muruki ding in pidiroju. ²⁷ Bara ye mo an jooroku mina-muruki pigroon tidoshakloi, in we podangi appani, in kpaattu agarumni ka nyimmo tuk kunni, longku nyimmaa ya meti ta mina-myruki juuga yoba. ²⁸ Pene Buluj in pekro shii ka ele yen bang ya, "Wessholi pira ti kuukoi, longku min ding min ka minu." ²⁹ Nang mo an jooro ku mina-muruki in tewi ya mo warini ka wulon deet, in illin peeb in ri shiki in ti tarika shewo, in shugna ti toomno Buluj kan Shilla, ³⁰ kan in perin peewe ka shinui in tel shinui ya, "Me an-shubet, ne ta ya wen nen we ma-kui?" ³¹ Shinui in lignon ya, "Kumu kan Fo-mina Yeesho, kan ma ta we ma-ku, kan ke kan minako." ³² Shinui in paarono Fo-mina ei shinui, gale kan me ti ta minani ding. ³³ Nang moan jooro ku mina-muruki in ahrshinui ka yippa teerei, kan in wa fudiro diijui, kan shii kan me ti ta minai ding kpantidi in yuun yulma ti shinui. ³⁴ Nang shii in riin ma Buluj kan Shilla ta minani in wa minin weshiina ti shinui, nang shii kan me ta minani shin ding in ya beere-beere, longku shin ding kunnga kan Yamma. ³⁵ Pirbang ka shaat, me an-gub shiirei in shuru me an dau-ta-gongo mo tewo ti mo an jooroku mina-muruki ya, " Wessho shwiji shurme mo kooju." ³⁶ Mo an jooro ku mina-muruki in tewi ti ma Buluj ya, "Me an-gub shiire tenna ya mo maan Shilla kooma ti ta twaalan-shaari." ³⁷ Pene Buluj in lignon ya, "Shinui yuwaamu biro-biro ti shakki diyo-diyo niyon-ding, a gale kan shiiromum, shinui in shoumu ti ta mina-muruk kaa ye min sheemui Roomaawa. Kaa te,wende shinui leka minun koomu ka jiri ya? Oonngoo, akaa tem! Mo waru ka shikju in foran mun kira." ³⁸ Bara ye me an dau-ta-gongo meyaan po paaro te, me an-gub shiire in ya shewo kaa ye yaaraa ya ma Buluj kan shillai Roomaawa. ³⁹ Nang me an-gyb shiire, shinui in waru in wa we ma Buluj kan Shilla in beng shinui mo tekloju wee shinui yuwaa. Shinui in tewon ti shinui, mo kooju in wessho tarang gok-minai. ⁴⁰ Ka bi ye ma Buluj kan Shilla peraan ti ta minai-muruki, nang in warju minano Liidiya. Ka bi ye shinui kponnga kan me an-balla, shinui in kem-shikjui, kan nang shinui in gok-minai in kooju.