¹ Nang ti shakki me an balla ye ti Antakiya, ka peddi me an-pigro kan me an shubet. Shinui ma Barnaba, Shiimon(mo ti ye ka Niiga), Lusiyush niyo Sairiin, Manayel(mo kpiroo ka shaai kan gub Iriidush), kan Shawulu. ² Koddi ye shinui ti ku wau Yamma in ti yiu fokju, shoomno Yamma in tewon ti shinui ya, "Ma wakno ma Barnaba kan Shawulu, ta yuuno shuran ye ne yeenan shinui ti kwii." ³ Ka bi yiwan fokjui, in furafok, in liin kira ti kuujui, in li biijui. ⁴ Nang Barnaba kan Shawulu in kumi kan shoomno Yamma in shaaju Seleukiya; ti po teere in ri ta gong doo we war Shaifurush. ⁵ Bara ye shinui foora Salamish, in ya paarono Yamma ti mina wawo Yawuudawa. In shar Yuwaana Markush ka an ya shauju. ⁶ Bara ye shinui merkaa kubuk Phaposh, in we manni an gunuli, niyo Yawuudawa shii an-pigro shaba, shommoi Bar Jesshuwa. ⁷ An gunul mo ti gal kuuni kan an toom shuranno, Shariyush Paulush, mo shiikan shen kping. La moo in ye ma Barnaba kan Shawulu, longku shii leka yaaro paaro Yamma. ⁸ Pene Elemas "An pirak"(longku terei wee shommonii shuklaa) in kura shinui; in leu li shikni ka we shal do an toom mo ti ku lishaarii ⁹ Pene Shawulu, ye ti ye birang ka Buluj, kemi kan shoomno Yamma, in muuro shii kping ¹⁰ in tewon ya, "Ke laano shuuro, ke kemi kan dokko kan shek. Kei an gei wenee yen kpang ding. Ke dum wessho daklo shupran kokono Fo-mina maa? ¹¹ Wende kirano Fo-mina ti kuuko, ke ta yooko an fugum. Ke ta we shik darangum koddi la wiu." Kpantidi goom kan dil; in kpal adoonii in yiu nabyo ta piri in ti tel memme mo yiu ni kirani. ¹² Ka bi ye mo an toom mo weyaa wee ye yuwaaro, in kumi, longku shii yuwaa maam kan shubetno Fo-mina. ¹³ Nang Buluj kan me an jeerini in kooju war Paphos in wa war Paaga ti Pampiliya. Pene Yuwaanan wejo shinui in meerini Urshalima. ¹⁴ Buluj kan ma jereni in war Paaga ti po teere in war Antakiya ye ti Pisidiya. Ti po terei in ri ta mina wawo darang Asabar in deeju dii. ¹⁵ Bara ye maara shoroi kan an-pigroi, me an toom ta mina wawoi in shurin ti kuujui ya, "Ma molon, mam maakan paaro pekro ti memme te, ma tewo." ¹⁶ Nang Buluj in illo shikni ti po sheri in ya kamro ka kirani in tewi ya, "Ma me ti Isheereila kan me an shewo Yamma ma yaaro. ¹⁷ Yamma memme Isheereila shaka ma fowonmu kama in li memme in fiyoju ye tida dii ti Mashar, kan shokran kirani in forin shinui ti tai. ¹⁸ Kaa pelle po sheno naa-peereu diin kan shinui ti ta shwee. ¹⁹ Ka bi ye shii toddaa gokmina parlau ti kubuk Kanana, in min bukjui ti memme mu kama ka weeju. ²⁰ Yuwaa we te ding tita sheno 450. Ka biwe te ding, Yamman minin an shiire ti shinui we war Samaila an-pigro. ²¹ Nang memmei in teli ya mo yuujuan gub ti kuuju, Nang Yamman minin Shawulu laano Kish, niyo gokminano Bejamin, mo yu gub po sheno naa-peereu. ²² Ka bi ye Yamma foraan shii ta gubi, in liin Dauda ka gubjui. Wo ti kuuno Dauda ye Yamma teka ya, 'Ne weyaa tishikno Dauda laano Yesshe niyo ye ti po shaarino, mo ti ya wee ne leka shiin ya.' ²³ Ti po peenno la-moo Yamman waru ka an marku ti Isheereila,Yeesho kaa ye shii kuunga yaani. ²⁴ Ye tidang Yeeshon tang waru , Yuwaana yuwaa kaawi for-fok kan yulma ti memme Isheereila. ²⁵ Kaa ye Yuwaanan tang wiilo shuranni shii ya, 'Ma nyimmaa nei nong? nei shiim. Pene ma yaaro, ka mo ta waru ti biino, koo we dau po taani ne ta dum piddanim.' ²⁶ Mamolonno, shibo po peenno Ibirayim, ka me ti shi Yamma ti shakkima, shunna paaro marku tei ti kama. ²⁷ Shinui me dii ti Urshalima, kan me an gubju, a jemlo shiim, shinui in kemro tewan paaro me an-pigro ye ti maanna kpaaliyo Asabar ding in ti kelmo shii. ²⁸ Kaa ye shinui a wa shii kan kelinye ye ta liyani in tuk shiim, in tel Bilatush mo tuk shii. ²⁹ Bara ye fuwaa we ding ye balilin ti kuunii, in durin shii ti ku gbong biroi in liin ta duwoi. ³⁰ Nang Yamman shokron shii ti ta duwoi. ³¹ In we shiknii po shaklo gbe ta me wanna ka shaayi ti Galili we war Urshalima. Shinui wendei me an jimro shii ti memme. ³² Nang wende min ta teumai shinnyi ye Yamma kunnga ti ma fowonmu kama ³³ shii kemraamu kama, kan shibojui, ka shokro Yeesho. Kaa ye ballii ti ta Jabuura: 'Kei laano, boi ne shigo fokko.' ³⁴ Kpang paaro ye ya shi shokraa shii ti ta duwo longku loshiknii a ta ommanim, Yamma yuwaa paaro kaa te: 'Ne ta minma mon Shaana kan kumen ti Dauda.' ³⁵ Tene longku ye shii teka ti ta manni Jabuurai, 'Ke ta wessho mon Shaanako in omminam.' ³⁶ Ka bi ye Dauda kenngan wee Yamma leka ti ta koddini, in muroni; in nan shii kan ma fowonni nang loshikni in ommoro. ³⁷ Pene mo Yamma shokrai a ta we ommanim. ³⁸ Longkuuno te ma peno, mamolonno, ya ti taano la-moo ye kpaalan po fuddo shasshalau. ³⁹ Ti piree kan shi maa mo kuunga peraan ka shii ding ti ta wee shorono Muja ta dum yuumam. ⁴⁰ Longkuuno te ma jooro yoo wee me an-pigro tekai a yooro ti kuumam: ⁴¹ 'Ma gee ma me an nwinnyo fok, ma yu maam nang man muri; Longku ne ta ya shuran ta koddima, shuran ye ma ta dang kumanim, koo da mundok tekama.'" ⁴² Kaa ye ma Buluj kan Barnaba tanga kooju, memmen beng shinui ya mo meeru birang manni Asabari in ya paaroi birang. ⁴³ Bara ye galo ta mina wawo wiilaro, Yawuudawa shi gbe kama me foraafokju in yiu biima Buluj kan Barnaba, in yuun paaro ti shinui in peeshikjui ya mo shuun toom ka deeju ti ta kuunguno Yamma. ⁴⁴ Manni darang Asabari, pelle gokminai ding in gali longku yaaro paarono Fo-mina. ⁴⁵ Bara ye Yawuudawa weyaa shik jimoi, shinui in yiu ya mwisshi kan tebro ding paaro ti ku wee ye Buluj teka in ti kpakyo shii. ⁴⁶ Nang ma Buluj kan Barnaba in ya paaro ka twaalan shik ya, "Yikka ti gbare do in yuuma paaro Yamma ka po toom. Pene kaa ye ma kurama man geena mai nenno we kerang po dingum, pene ma gee min ta meemu shik mei Yawuudawam. ⁴⁷ Longku Fo-mina fuwaa po teumu ya, 'Ne shigon ken aaro ti toom mei Yawuudawam, longku ken waru ka marku ti kubuk ding.'" ⁴⁸ Bara ye mei Yawuudawamyaaraa we te, shinui in ya beere kan min gbe ti paarono Fo-mina. Me limman we kerang po ding in kumi ta shinui. ⁴⁹ Nang paarono Fo-mina in fu ta piri ding. ⁵⁰ Pene Yawuudawa in shuppo peddi shereb me ti shi Yammai kan me an toom tarang minai. Shinui in illo kunne ti kuuma Buluj kan Barnaba gale kan kai shinui ti ta bukju. ⁵¹ Nang ma Buluj kan Barnaba in tudra kpisshi shik shooju longku in yooro we jimro ti kuujui. Nang in warju Ikooniya. ⁵² Nang me an balla in kemi ka beere kan shoom ye shaana.