¹ Wende pelle koddi te gub Iriidush in yippo an balla longku ya shin minin shilibi. ² In tuk Jamush mollo Yuwaana ka agarum. ³ Bara ye weyaa we te yuwaa kpang ti Yawuudawa, in shooni toom ka yiu Biiturush. Terei koddi sha jong we-ta-kele. ⁴ Bara ye yikka shii, in li shii ti ta mina muruk, in li me an geren shin peereu ka we gee kwi; leka in warin ka shii ka bi waar we-ta-kelei. ⁵ Nang in li Biiturush ti ta mina muruk, pene me an balla ti ku furafokju ti Yamma kping longkuunii. ⁶ Ka yippo ye kpaaliyo ta perin ka shii ka we shiiro shii, Biiturush ti po shaklo ti shakki me an geren palau, dawani kan fwala we eem palau, koddi me an geren palau ye ti po dangi shengri kan dooju ti po mina muruki. ⁷ Kpantidi Malaikano Yamma in kuman perin ti shii, nang aaro in ee ta mina muruki. In tura shikno Biiturush in pigro shii in tewon ya, "Illo shikko peep," nang fwaala we eem yei in ukyonden ti kira. ⁸ Malaikai in tewon ya, "Shou lannako ken shoppo taako." Biiturush in shoppina. Malaikai ya, "Shou lannan gbogo ken yiru biino." ⁹ Biiturush in yiu biino Malaika we per pewe. A peno ya wee Malaika yuwaai yen kullim. Nyimma ya kaare shi ta yaani shuna. ¹⁰ Bara ye shinui kooka po dang an dok kan an palawi, in war shik po dang we eemi ye peraa ka tarang mina in aworo ka shikro. Nang in pereju in yiu manni bi kokoi, nang Malaikan wessho shii peep. ¹¹ Bara ye nyimmono Biiturush meena shigi, shii ya, "Wende ne penaa kulli Yamma shunna Malaikani in forno ti ta kirano Iriidush, kan wee ding ye Yawuudawa ta dang kwii." ¹² Bara ye Biiturush jemlaa kaa te, in wanni minano Maryamu nonnono Yuwaana, mo ti ye ka Markush, pirinnee ye memme galaa in ti furafok. ¹³ Biiturush in ya gbooroo ti po dangi, shook la pomun ye shommoi Rooda in peru ka wo liginoni. ¹⁴ Ma ti yaaro eleno Biiturush ta tei in peni, nang longku beere a dum au po dangim; pene in meero ta minai ka yoba; in wa tewi ya Biiturush sherin ti bi po dangi. ¹⁵ Nang shinui in tewon ti tei ya, "Ka shannghou ta kuuji." Pene tei in ti isshoro yaa kaa tei. Shinui ya, "Kaarei Malaikani." ¹⁶ Pene Biiturush in shuun toom ka ya gbooroi, bara ye shinui aka po dangi, in we shiknii in ya maam kping. ¹⁷ Biiturush in ya shuklo ka kirani ya mo yooju yititi, nang in tewon ti shinui dangan piri ye Fo-mina fonnannin ti ta mina muruki. Shii ya, "Ma tewo we te ti ma Jamush kan digi an ballai." Nang in kooni in wanni manni piri. ¹⁸ Ka shaat, a kattan shanngau ye illa ti shakki me an bee deet longku wee ye weyaa Biiturujum. ¹⁹ Bara ye Iriidush gassha biinii a wa shiim, in tenglo me an gereni in li in tukyo shinui. Nang in shaani Yawuudiya kan Kaisariya in deeni ti po teere. ²⁰ Ta koddi teere Iriidush ta yaden kan me ti Taaya kan Shiidon. In waru jelenii ka sheran paaro dok, bara ye benga Bilatush, an shau gubi, mo shauju, in tel kuttan po shaari longku mukjui ti we wesshinaroi ti bukno gubi. ²¹ Manni darangi gubin shoppo lanna gubni in deeni ti po diyo ya gubni; in yuun paaro ti shinui. ²² Memmen yallina dik, ya, "Tenei ele Yamma, a ele niyom!" ²³ Kpantidi Malaikano Yamma in tura shii, longku a min gbei ti Yamma kudangum; muruk in addo shii in muroni. ²⁴ Nang paaro Yamma in ti kpiroro in ti tokko shaariro. ²⁵ Nang bara ye Barnaba kan Shawulu wiilaa shuranju, in meeruju Urshalima in yeeru ti biiju ma Yuwaana ye ti ye ka Markush.