¹ Wende me an kaawi kan peddi me an ballai ye ti Yawuudiya in yaanna ya mei Yawuudawam yikka paaro Yammai sheeju. ² Bara ye Biitiurush ammaa Urshalima, peddi me shereju ti waar kar kuwo in yuun kon ti kuunii; ³ shinui ya, "Ke waraa ta mina mei Yawuudawam ken sha wesshina kan shinui!" ⁴ Pene Biiturush in li gunsheeron ti shinui dob-dob ya, ⁵ "Ne ti po furafokno ti gokmina Joppa, nang nen we shik jirim gurang ta shaaru ti kudang, kaa pelle lanna we kau ku ti gungkul kudang peereu. In shaaru kuuno. ⁶ Nen ukkon ado nen ti nyimmina. Nen we we-ta-gun me shoi peereu-peereu, kan lo ta shwee, kan me ti tol gonghoju ti buk, kan adeewe kudang. ⁷ Nang nen yaaro ele in yuuno paaro ya, 'Illo shikko, ta Biiturush; karu ken addina!' ⁸ Nang nen liginon na, 'A kaa tem, Fo-mina; longku nei nau addo we ye doonum kan yei fuddanim.' ⁹ Pene elei in liginnu ti kudang birang ya, 'Wee Yamma fuddaa ke ta yiyani ka doonum.' ¹⁰ We te yuwaa sho tat, nang in tolin gurangi ti piri. ¹¹ Nang koddi teerei shwiji tat shengrin ti po dang piree kan minui; shunna shinui ti Kaisariya we war jeleno. ¹² Nang shoom in teuno yano koon ti biijui, ya no wejon shukin kaali ti shinui. Me an balla shin paragbanang ye ti biino te, minin war ta minano la moo teerei. ¹³ In teumu ya shi weyaa shik Malaikano Yamma sheri ti ta minani in teuni ya, 'Shur memme we war Joppa in waru ka Shimon mo ti ye ka Biiturush. ¹⁴ Shii ta teuko shuran ye ke ta waan marku- ke kan taminako ding.' ¹⁵ Bara ye ne shuwaan toom ka paaroi, shoomno Yamma in shaaru kuujui ka ye ka toom shaana kumu kamai. ¹⁶ Nen nyimmo paarono Fo-mina kaa ye teka ya, 'Yuwaana yuwaa yulmai ka doo; pene ta yuuma yulmai ka shoom yen Shaana.' ¹⁷ Nang Yamma ma minan ti shinui kuungu kaa ye minamu kamai koddi ye kama kunnga kan Fo-mina Yeesho Kiriti, nei nong ye ne ta kura we Yammai?" ¹⁸ Bara ye shinui yaaraa we te, shinui a kan we po tewanim, nang in wau Yamma ya, "Kaa te, mei Yawuudawam Yamma yuwaan koko forfok kan we kerang." ¹⁹ Wende me lekraa taajui ta shilib ye illina ti kuuno Itipanush wangraa tali we war Ponisiya, Shiipurush, kan Antakiya, in ti ya paaroi bara ti Yawuudawa. ²⁰ Pene peddiju, shwiji me ti Shiipurush kan Sairiin, in waru Antakiya in ya paaro ti Elenawa, in tewon ti shinui shinnyin tomon ti kuuno Fo-mina Yeesho. ²¹ Kirano Yamma ti kuujui; memme gbe in kumi in shirju biino Fo-mina. ²² Paaro kuujui in ri ta kumo an balla ye ti Urshalima, nang in shur Barnaba we war Antakiya. ²³ Bara ye shii foora in we shik kunnguno Yamma, shii in ya beere in pee shikjui ya mo deeju ti taano Fo-mina ka po shaari dok. ²⁴ Longku shii niyon kpang kemi kan shoomno Yamma kan lishaari, memme an yiu biino Fo-mina in tokko shariju. ²⁵ Nang Barnaban in war Tarsush longku gassho biino Shawulu. ²⁶ Bara ye weena shii, in yeeru we war Antakiya. Kaa te po sheno dok in ti gali kan me an balla in ti ya shubet ti memme. Tanga ye an balla ka kiritai ti Antakiya. ²⁷ Ti ta koddi teere peddi me an-pigroi in shaaru ti Urshalima we war Antakiya. ²⁸ Dok ti shakkiju, shommoi Agamu, in shokro shikni in ya paaro ta shoom ya ka kpiyam yen shilib ta waru kubuk. We te yuwaai koddino Kalaudiyus. ²⁹ Nang me an yiu shubet, kaa ye koonong ta dum yaani, in li ya shin ta shur gun we shawo ti me an balla ye ti Yawuudiya. ³⁰ Shinui in ya kaa we tei; in shur gun kine ti men gbidinoi ti ta kirama Barnaba kan Shawulu.