¹ Ọnẹn ghe da dọ sẹ, nan rẹ miẹn Isisa Augustus nan tale da gbare nan rẹ ka agbọn ne yẹn bhi yerebhe ne ri bhọ. ² Ọnan ikẹbholo ọhẹnhẹn nan lulu ẹghe nin Quirinus rẹ ha yi ọnọn gbalo ghe Syria. ³ Ọnẹn ghe nan ọdeọde nan ha khi agbabholo nọn sọle dọ gbin elin bho otọ nan rẹ kale. ⁴ Inin Ijosẹfu da nabhi Igalili, bhẹ kẹ Inazarẹt ha khin Ijudea, agbabholo nọn si Idavidi ọle khin. ⁵ Ọle da ha khin enin bi Imari, nan zununbhọ re nanlẹn ọnan hanman. ⁶ Ọnẹn ghe da dọ sẹ be nenereribhi enin, nọn rẹ biẹ ọmọn. ⁷ Ọnan bie ọmọn okpẹa, ọmọn ọhẹnhẹn nọn sọle, ọnan ri ukpọn nọn fua rọ nowẹ bhi eja muni elanmẹn bhọ, ranmude otọi yẹribhọ nele rẹ ri ọmọn nowẹ bhin ọni ikuele. ⁸ Enere elanmẹn kọn enan ribhi ọnangbaẹbho nin ne ribhi ẹwẹ, ne rẹ gbaloghe ene elanmẹn asọn. ⁹ Enin ehi nọn se Ebianlẹnman zegbere man ele, bi oriri nọn se Ebianlẹnman nan davan rẹnẹga ele enin idede ofẹn da ha mun ele. ¹⁰ Eni ọnẹ ehi da taman ele, "Bha hẹ jo ofẹn mun bha, ranmude mẹn ri uhọnmọn uje ọse eghọnghọn nọn kpọnọle je ẹbhorebhe. ¹¹ Ẹlẹnan ọmiẹnbhafan abiọle bha bhi agbaẹbholo nọsi Idavidi! Ọnle khọ ọmiẹnmanfan ne Ebianlẹnman! ¹² Ọnan khi iyaman nọn da rẹ man bha: mun wẹ amin ọnọn ọmọn aru ukpọn gbanọle bi arọle nowẹ bhu uwaelanmẹn" ¹³ Bhẹkẹ iguaguaco, ẹhi nebunbunlun da bu ọnẹ ẹhi, enan gẹn osẹnobulua ha tale, ¹⁴ "Oriri kiẹn ọso osẹnobulua nọn ko okhun nẹ, bhajo ofure ne bha dia bhu ukotọle bi ẹwe ẹbhorebhe nọn ole nan maman ghọnghọn" ¹⁵ Ẹghe da dọ sọ enẹ ehi rebhe khi rẹha khin okhunlun fo, enẹ ro ohuan kọn nan taman egbele, "Bhajiman ha khin Ibẹtlẹhẹm nin man dọ miẹn ebe ruan bhi enin, ne Ebianlẹnman rẹ man bhanlẹn." ¹⁶ Enan jejie ha khin enin enan dọ ki Imari, Ijosẹfu bi ọnọn ọmọn re, nan mu no wẹ bhi uwa elanmẹn. ¹⁷ Ekhi miọn fo, eda tare eba rẹ man ele bi eba taman ele rẹ ji ọnọn ọmọn. ¹⁸ Ene họnlẹn rebhe ọnan han ele ilolo ebin ene rohunan kọn taman ele. ¹⁹ Imali nan fẹkẹ ria emin rebhe nọn ọle họnlẹn, bhẹ ẹkẹ ọkhọle nọn sọle. ²⁰ Ene ro ohuan kọn da ha khin sele, mun oriri bi ugẹnbhi ni osẹnobulua bhe emin rebhe nele họnlẹn bi ebele daghe, be eja rẹ taman ele. ²¹ Ẹghe nin ukpẹdẹ nọn zelẹnlẹn khi rẹsẹ, ẹghe nan khirẹ ruẹ ọle fo, ena hẹole Ijesu, nọn yi elin nan ka hẹọle bho obi ẹhi nọn kasi eji Imari ye akue hamanlẹn. ²² Ẹghe ni ikpẹdẹ ukpekhia nọn sele khi rẹ gbera fo, beji uhi nọn si Imosis tale, enan mun ọnọn ọmọn re bhi uwa nọn khua nọn si osẹnobulua nọn ri bhi Ijerusalẹm ne nan munọn bu Ebianlẹnman re. ²³ Beja rẹ gbọnlẹn bhi uhi nọn se Ebianlẹnman, "Ọmọn okpẹa nọn tugie ẹkpọmọn nọn si inẹnolẹn ahi siọ kie kẹ rẹ lu ọmọn nọn si osẹnobulua." ²⁴ Iriọ ere zọ ọne ese, beja rẹ gbọnlẹn bhẹ ẹkẹ uhi nọn sẹ Ebianlẹnman, "Ikpi idulu eva la igbẹnẹkuku eva." ²⁵ Dọghe, okpẹa ọkpa da dọ kharibhi Ijerusalẹm ada ha tieọle isamọn, ọnọ okpẹa nan da ha yi orikhiale bi ọria nọn man man ga.Ọnan yọria nọn mọn oriọn nọn khiale. ²⁶ Ọriọn nọn khiale rẹ manle ọida miẹn uyumin ọkuẹ min Ebianlẹnman in Kristi. ²⁷ Oriọn nọn khiale rọ khian, Isamọn da vae bhi uwa nọn so osẹnobulua. Enan aba bi inẹn khi mun onọn Ijesu re, ne re lu bi eju uhi nan rẹ bhotọ tale, ²⁸ Ọnan mun ọnọn ọmọn yan igiabọ, gẹn osẹnobulua ọnan tale, ²⁹ Ejayenan ji eguọbhandia nọn sẹ ha ri ọfure khian, Ebianlẹnmẹn, bi eji ẹmọn nọn sẹ tale. ³⁰ Ẹlolo mẹn min anin nọn sẹẹ, ³¹ Nu uwẹ mun egbọle isagha ọrebhe: ³² Ukpa orẹman re ji eni Igẹntali bi oriri rẹji ẹbhorebhe bhi Izrẹl." ³³ Abale bi inẹn ọnan han ele ilolo bhẹkẹ eba taman ele rẹji ọni ọmọn. ³⁴ Isimọn da ne erọnmọn nele tami Imeri ni inọn, "Dọghe, ọnọn ọmọnan ai mun ọle bhi obọ udeguọghọa bi ukpanọ ọsi ẹbho ne bunbun bho otọi Izrẹl bi iyama nan agbọn bha miọn bhe egbe.- ³⁵ Bi opolo nan diọle bhọ ọkhọle - bọ nan miẹn eria nọn ribhi ẹkẹ ọkhọle ne bunbun ai zọegbere." ³⁶ Anna ni akhasẹ ọsi okhuo do yẹ ribhi enin. Ọle khi ọmọn okhuo ọsi Fanuẹl nọn ribhi uẹnlẹn nọn si Asha. Ọwo manman wanre. Ọgbe ikpe ihilọn bhi isọdọ ẹghe nọn rẹsibhi ọmanmẹn re, ³⁷ Bi ọnan ha yi ikpe enẹn yan egbọenen nọn ọdọ rẹ yuu. Ọbha si bhi uwa nọn kpọnọle nọn so osẹnobulua re ọnan ga bhẹkẹ ifiazemin bi Inerọnmọn, asọn bi odanmẹn. ³⁸ Ọnẹghe nin ọnan bu ele rẹ ha khuẹnmẹn osẹnobulua, ọnan ha tẹbhọn ọnọn ọmọni man ọrebhe nekhẹ umiẹnfan ọsi Ijerusaẹm. ³⁹ Ẹghe ne khi rẹ lufo enan ha guanọ nelu bi enu uhi nọn si Ebianlẹnman tale, enan fike ha khin Igalili nọn yi isele bhi Inazarẹt. ⁴⁰ Ọnọn ọmọn da ha wanre, bhẹkẹ ewanlẹn, ẹseọhẹ nọn osẹnobulua da nọle. ⁴¹ Abale bi Inọnlẹn ukpukpe ọle rẹ ji Ijerusalẹm bhẹkẹ ebbhi ukpe osi passover. ⁴² Ẹghe nọn rẹ yi ikpe igbeva, enan sẹyẹ yi ọnebhi ukpe be jẹ rẹ luemin. ⁴³ Ehi gbe enin ikpẹdẹ nea gbe rẹte ọne ebhi ukpe, eda ha khin uwa. Ijesu da debhi Ijerusalẹm abale bi inọnlẹn bha lẹn. ⁴⁴ Enan ha mọnlẹn bhọ ọkhọle nọn sele họ rẹkhan ulogho ne re koko vae, irọ erẹ khian bhọ ọnukpẹdẹ. Eni ehi da ha guanọ bhẹwẹ enerẹkoko yo bi ọshọ nọn sele. ⁴⁵ Ẹghe ne khirẹmiẹn ebha miọnlẹn, ekhi da gbo kike ha khin Ijerusalẹm enan do ha gua nọle. ⁴⁶ Bhẹkẹ ikpẹdẹ ea enan dọ minọlẹn bhi uwa oga nọn khua nọn si osẹnobulua, ọda do tua bhi ẹwẹ ene manebe, ọda kale ehọ nọn ele ọta. ⁴⁷ Eneribhi enin rebhe nea kale eho ọda han ele ilolo bhe ebọẹ re ha dẹn ebele ata bi ebọ re ha rẹ ewaniẹn bhe nọn ota rebhe. ⁴⁸ Ẹghe ne khi rẹ daghọle, ọda khan ele ilolo. Inọnlẹn da tamanlẹn,"Ọmọn, buwẹ kida rinan lu man ebhi yẹ? Abaẹ bi mẹn eji man bhasẹ guanọẹ na ọi ribhọ." ⁴⁹ Ọda taman ele, "Bezele nin bha da guanọ mẹn? Bha lẹn mẹn olẹ lu iwẹnan nọn sẹ Aba mẹn? ⁵⁰ Ọkpanọn ebha lẹn ebọ ri ọta nọn tale ta. ⁵¹ Ọda de ba ele ha khin uwa bhi Inazarẹt re ehọ bhi ebele tamanlẹn. Inọnlẹn da fẹkẹ ne enebhin nan gbano bhi ọkhọle. ⁵² Ijesu da ha wuanre bhẹkẹ ilẹnmin,bhe egbe bi imẹnlolo bho ọbhọ nọn si osẹnobulua bi ẹbholo.