¹ Ene bunbunlun zegbe re bhi ilọnmọn na rẹ lolo eminlin rebhe nọn odọ munrẹ bhẹwẹ manlẹn. ² Beji ẹbholo ne ribhọ bhe ghele umunkele ni ẹlolo rẹ bhọ bi eni odibo rẹ taman manlẹn. ³ Ọda yẹ dia bhẹlo si mẹn ranmude mẹn hi manman guanotọ eminlin rebhe rẹ nin omunkele nimẹ yẹ gbẹn jeẹ be jọkhẹke itiofilusi nan rẹkpan nan. ⁴ Nuwẹ rẹ lẹn ọsaje nọn rrbhi eba luẹ wẹle. ⁵ Ẹghe ihẹrodi n'ojie si Ijudia, ohẹnosẹ nelinlin yi izakaraya nọn da bhi otọ Abijah, okhuo ọle Elizabẹti nọn ulin ri Erọni . ⁶ Ele eva da khia bhẹlo osẹnobulua, ele bha min okan, e'da yẹ rẹ bhuhi rẹkhan odosẹ. ⁷ Ele bha biẹ ranmude Ẹlizabẹti agan nọn bi eki yẹ manman wan re. ⁸ Izakaraya ki ribhi odalo osẹnobulua bheji oda lu ilọnmoga nọn sọle. Beja rẹ zẹ ohẹnlẹn nọn da lu ilọnmọn oga rọle. ⁹ Bhodẹ nan rẹ zohẹnlẹn,a da zọle mọn diọ bhẹkẹ uwa oga ri Ebealẹn dọ ha tuẹ oziya. ¹⁰ Enẹbholo rebhe ola ha nezọnmọn bholele bhẹghele nan rẹ tuẹ oziya. ¹¹ Bhimian, ẹhi ri osẹnobulua da hẹnlẹn re manlẹn, bhi ibodẹ obera ojukhuo oziya. ¹² Izakaraya ki daghọle ọkhọle zugua, ofẹn da ha mun ọnlẹn. ¹³ Ọni ẹhi da yọle Izakaraya, "Ẹjofẹn mun ẹn, ranmude aki henerọmọn nọ rẹ. Ẹlizabẹti nin okhuo ẹ dẹ bi ọmokpia. uki tiọle Ijọni ¹⁴ Uki ha mọn eghọnghọn bi ihubudu, ene bunbunlun ki ghere sa biọle. ¹⁵ Ọ dẹ kin okpọria bhẹlo osẹnobulua. Ọ ida ranyọn bi anyọn nọn wolo sunu bi ẹlinmin nọn khiale de vun ọle bhẹkẹle si inọnlẹn. ¹⁶ Imọn si Izrẹl ne bunbunlun ki fi wẹnẹ bu Ebealẹn bi osẹnobulua nọn sele. ¹⁷ Ọki zahu bi ọkhọle si Ẹlijah ha khian bhẹlo osẹnobulua, nọn fi ọkhọle Aba kie rẹ ji'mn bi ene mọn akan ehọ re owanlan rene khiale nan rẹ mun egbe khẹ Ebealẹn. ¹⁸ Izakaraya da yọn ẹhi bi da rẹ lẹn yẹ? Ranmude imẹn ki dọmanlẹn bi okhuo mẹn ki yẹ maman wanre. ¹⁹ Ọni ẹhi da tamanlẹn, "Imẹn hi igebulẹ, nọn mumdia bh'isira osẹnobulua. Ai j'emẹn dọ taman ẹn iju họnmọn esili nan. ²⁰ Ghe uki huẹnan, uda yẹ sabọ gunlan dọ rẹ sẹ ẹghele nin ọne minlin rẹ sunu ọnan hi ranmude uwẹ bha rẹ mẹn bhota, nọn da musẹ bh'ẹghe nọn kele." ²¹ Bh'inlan enẹbholo da khẹ Izakaraya. Ọda hanle ẹlolo ghe ọle bha kẹ dagbare bh'ẹkẹ uwa oga. ²² Ọle ki dagba re, ọ'bha sabọ nele talọ. Ele da dọ yer ghe ọi min imianlo bhẹkẹ ọnuwa oga. Ọle da ha robọ nele talo oda sẹyẹ huẹnan. ²³ Ẹdẹ oga nọn sle ki gba ọ da ha khin uwa nọn sọle. ²⁴ Aki gbera ọnẹghe nin, okhuo ọle Ẹlizabẹti da haman, ọda rẹkonuki isẹn. Ọle da yọle ²⁵ "Ọnan osẹnobulua lu ninmẹn nọn da rẹlo ọhẹ ghe mẹn rẹkhọle ri imẹn bhegbe re." ²⁶ Bhuki nọnzehan Osẹnobulua da ji ẹhi Igebule ha khin Igalili bhotọ Inazarẹti. ²⁷ Bu ọmanmẹn nọn bha sẹ hẹgẹn nan tiọle Imeli nọn ribhi isi okpẹa nan tiọle Ijosẹfu nọn yi uẹnlẹn si Idevidi. ²⁸ Ọ da bu ọle re yọle, "Ituẹle, uwẹ nọn manman min ọhẹ. Ebealẹn nẹ ẹ dia," ²⁹ Ọ da hanlẹn ilolo ọta sọle, ọki da ha riale batie egbọnotuẹ nan. ³⁰ Ọni ẹhi da tamanlẹn, Ẹji ofẹn munẹn Imeli ranmude uwẹ min ọhẹ bhi obọ si osẹnobulua. ³¹ Ghe uwẹ dẹ hamami uki bi ọmokpẹa. Uki tiọle Ijesu. ³² Ọki kin okpọria a ki yẹ ha tiọle ọmọn si ọnọn maman yokhun ne. Ebialẹn ni Osẹnobulua ki ri ejele si Idevidi nọn biele de nalẹn. ³³ Ọki le ejele bhi uwa si Ijecọbu ẹdẹdẹmẹdẹ, ai da min ufomin si ejele sọle. ³⁴ Imeli da yọ n'ẹhi, imẹn bha sẹ lẹn okpẹa bọnan ki rẹ sunu yẹ? ³⁵ Ọni ẹhi da yọle Ẹlimin nn khiale ki luẹ re, ahu ọnọ k'okhun ki sa ruẹ. Ọnọn khiale nuwẹ da biẹ aki ha tiọle ọmọn si Osẹnobulua. ³⁶ Ghe, obhio ẹ Ẹlizabẹti ri egbe ọmanlẹn ha haman, uki nọzi ehan ki ra, okhuo na rẹ ha tiọle agan. ³⁷ Emilin izibhọ ni Osẹnobulua isabọ lu. ³⁸ Imeli da yiọle "Ghe mẹ ọmkamẹn obọ si Ebealẹn" Jọ ha ye bhe egbe mẹn bi uhọnmuje nọ sẹ. Ọni ẹhi da kpanọ. ³⁹ Imeli da kpanọ ẹjẹje bhọni ẹgheni, ọda ha khin ẹbho oke na tiọle Ijudia. ⁴⁰ Ọ da ha diọ bhi uwa si Izakaraya ọ da tui Ẹlizabẹti. ⁴¹ Ẹlizabẹti ki họn utuẹmin si Imeli, ọmọn nọn riọle bhẹkẹle da sanlan Ẹlimin nọn khiale da hẹnlẹn ọle. ⁴² Ọ da se rọ yiọle, Erọnmọn ọsẹ bh'ẹwẹ ikhuo, erọnmọn ọsi ikpẹ nọn rie bhẹkẹle. ⁴³ Ba ki da miẹn yẹ inẹ, Ebialẹnmẹn da bu mẹ re? ⁴⁴ Dọ ghe, mẹn họn usulu otuẹ nọn sẹ, ọmọn nọn rimẹn bh'ẹkẹle da sanlan ha ghọnghọn. ⁴⁵ Erọnmọn ọsi okhuo nọn rẹbhi omunsẹ uhọnmọn ni Ebialẹn je bu ọle. ⁴⁶ Imeli dale, ọkhọle mẹn gẹn elinlin osi Ebialẹn. ⁴⁷ Bi ọkhọle mẹn yẹ ghọnghọn ni Osẹnobulua ni Ebialẹnmẹn. ⁴⁸ Ọle daghe usi kẹotọ si ọmanmẹn sọle. Yẹ ghe, rẹ n'ejaye nan ulin agbọn rebhe ki ha tie mẹn ọ nan nerọnmọn nan. ⁴⁹ Ọnan maman kpọnọ lu eminlin nọn kpọnọle ni imẹn, elinlin ọle ukhiamin. ⁵⁰ Orẹ human si ọle na bhi agboze nan sẹ bhi agboze bhọ se ne nẹ ofẹn ọle. ⁵¹ Ọ rahu obọ sọle malẹn, ọle zaghelea ene hian bhegbe ⁵² Ọ ne imin ije ruẹn bhi ijele, ọ yẹ si ene ribhi otọ okhunlun. ⁵³ Eni ohanmẹn agbe ọle rebale nele khọn, ene fele ọle jele robobọ ha rie. ⁵⁴ Ọ robọ kpa Izreli ni ibhokhan sọle, bi orẹhuman jele. ⁵⁵ (Beji ọle tama aba manlẹn) man Ebrahamu bi imin ọlẹn ẹdẹdẹ mẹdẹ ⁵⁶ Imeli da gbi uki ea bhi uwa si Ẹlizabẹti ọda fike re bhu uwa sọle. ⁵⁷ Ẹghe ubiemin ki sẹ, Ẹlizabẹti da bi ọmọn okpẹa. ⁵⁸ Ene ko nyẹnlẹn bi ibhiọle da họn ghe Ebialẹn r'okpu izẹ human ji ọle debale ha ghọnghọn. ⁵⁹ Ikpẹdẹ ọzelẹlẹn eda dọ ruẹ ọnọmọn. Ele rẹ da tiọle "Izakaraya" bi elinlin si abale. ⁶⁰ Inọnlẹn da yọ heye, Ijọni a da ha tiọle. ⁶¹ Eda tamanlẹn, "ọria ribhi ẹwẹle ibhioe na ka tiọle ọni elinlin na khẹ" ⁶² E da robọ kọle man aba le, ba da ha tie ọnọmọn ⁶³ Ọ da yele ne re eba rẹ gbenebe nalẹn, ọda gbẹn Ijọni elinlin ọnọnmọn. Ọ da han ele rebhe ẹlolo. ⁶⁴ Bhobọ bhobọ ukpolamẹn sọle da talan. Ọ da ha gunlan ha gẹn Osẹnobulua. ⁶⁵ Ofẹn da la mun ẹbholo ribhi ejele ye. Eni emilin nan da wewe ni agba otọ ni rebhe bhoke Ijudia. ⁶⁶ Ene họn ọn'ẹmọn nan da rọya bh'ọkhọle, ele da ha khẹ ebi ọnọmọn da kiẹn? Obọ si Osenobulua da ha ri ọnọmọn bhegbe. ⁶⁷ Elimin nọn khia;e da hẹn abale Izakaraya ọda si akhasẹ yiọle ⁶⁸ Gẹn elinlin Ebialẹn, Osẹnobulua si Izrẹl, ọdọ robọ kpa bi imẹnfan sẹbholo nọ sọle. ⁶⁹ Ọ rikhuanlẹn omiẹnfan jimalẹn bhẹkẹ uwa nọn si idevidi nokhan lẹn. ⁷⁰ Be jẹ runun ene sa akhasẹ ne khiale tale bheghele nn gbera vun. ⁷¹ Imiẹnfan bhobọ eyinlan man bi obọ ene bha hu ẹmọnlẹn man. ⁷² Ọdẹ luọnan nọn rẹ man irẹhuman ọsi aba manlẹn, bi uyere si akovẹn nọn khiale sọle. ⁷³ Ihẹnlẹn nọ ni Ebrahamu ni aba manlẹn vẹn. ⁷⁴ Ọle vin ihẹnlẹn nọn sẹ ri amiẹnfan manlẹn bh'obi eyinlan man, ni man bẹ yẹ rofẹn ha ga le. ⁷⁵ Bhẹkẹ ikpe fua bi iluemin nọsẹn bhẹdẹ agbọn sẹ man rebhe. ⁷⁶ Ẹhẹn, uwẹ, ọmọẹ=n, aki tu bha ene fi akhasẹ sọnọ yokhun nẹ, ramunole uwẹ dẹ kalo ni Ebialẹn d rodẹi nọnsẹn, rẹ mun ẹbholo egbe khẹ uvade sọle. ⁷⁷ Re rowanlan imiẹnfan nẹ ẹbholo sọle, bhi orẹ hunman emin ebe sele. ⁷⁸ Ọna dẹ sunu ramunole ẹkẹle ẹjẹje orẹhuman si Osẹnobulua si manlẹn, ranmude ọnan ovonẹlẹn ki na bhokhunlun rekpa manlẹn. ⁷⁹ Nọ rẹ refua ji ene dotọa bhẹkẹ ebiuki bi adudu si uju. Ọki lu ọnan rẹ dia oẹ nọn sẹman r odẹ ofu bhegbe. ⁸⁰ Ọnọmọn da wanlan re ye dọ kin ọnọ wolo bhẹkẹ ẹlinmin bi ọda ha ribhi ẹkẹ egbo dọ rẹ sẹ ẹdẹ nọn rẹ regba man bhi Izrẹl.