¹ Innankə wanchokhreta'an muɗatə ɗelwer ta'an khaa, ngaskə khulafərtə seet minti kumchət makhkan. ² Naki fə tlənchəɗi Fartə muɗ tlarchə pangnan Fartəyu fərandach fe mbo'omənchə muɗ. ³ Ɓak nowun tlə tləndi Farta tə toso khar tə kwastə əna sətə khuran kit pangn bagadi. Chankə fe kwastə əna səta'an sə kafyan kətləm kə sisə kə wumanchə tə siti fə fərkitcha ə ɗar kwastə bagadi ə pangn ɗakwan kutrakta'an. ⁴ Inne i kwastə əna səta'an tə siti fə fərkitchəɗi tlakan kafərta kə pangn Farta ə khari tlə tlənɗi Fartəyu. ⁵ Tlə tlənɗi Fartəyu tərkan toso təɗi tə əna kwastə sitəɗi khuran yu ndiiɗankan tə wata ə ɗar bagadi təɗi. Məkkan kakh kə khur khesi, chat tla'kə yaandə 'yere, kapa ɓərata, wilwiɗtə 'yere tə yira'ti khakha fa. ⁶ Fə tlənchi Fartəɗi muɗ tə mbo'omənchə khar yu takhəskandəf kə pende. ⁷ Tla tərkanan pənkan ɗiptəyan, ɓak ratlata tə wata wimkhaa tə fere. Mik kə fe kakh kə khur khesi, artə khur makhkan i khesi i kan kaɗi, artə khur makhkan i ɗəfcha ikandə kaɗi, paɗ nat ndau usuncha ikandə kaɗi. ⁸ Chepete tlə tlənan penkan ɗiptəyan, ən kəɗ kapa nggwele tla ne kəstə tə wata mək kə fe kakh kə khur khawurta. Artə khur makhkan i khawurta'an chəkan kə fere. ⁹ Artə khur makhkan i ɗəchəɗi tə sisingndəf khur khawurta'an məmatakanda, artə khur makhkan i jirki tə 'yamcha səɓkandə kaɗi. ¹⁰ Makhkan tlə tlənan penkan ɗiptiyan, kapa wan'ndəra khəmkan kakh ə khulafərta, finkan wata kəɗ tikese kə ɗar artə khur makhkan i kuficha tə tle 'yamcha. ¹¹ Tləm wan'ndəriyanwa ɗəftə wanɗiya. Artə khur makhkan i 'yamcha chəkandə kaɗ ɗəkhɗəkh, paɗ nafchjə ka'an məmatakandə tə ɗəkhɗəkhtə 'yaman. ¹² Fwaɗɗatə tlə tlənan penkan ɗiptiyan, artə khur makhkan i farta tləfankə fe, artə khur makhkan i ndər kəɗu, artə khur makhkan i wan'ndərichə kəɗu paɗ. Artə khur makhkan yandə nat chəkandə kaɗ simsim. Artə khur makhkan i farta tə wita ɗa'kətsəwa. ¹³ Ɗəpaki khaa, səkki təwakti tla ne mbərtəkhaa khurɗəfi tə khulafərta, nakan 'yat tə kapa ɓərata, "Ai, ai,ai, kəmɗi fe ne khur khesi, kətləm təti ɗiptəɗi na fə tlənchəɗi Fartə makhkan pendə yu.