¹ Naki tlə tlənda ɓat kakh ə khulafərta. wansukram i kwiɗi nawaktə ndukwataan sə yu khar'yan, tə paɗ kapa chalala sə khar'yan. ² Nggətlan kan tlu khənggaɗi, ɗokhtə wuruɓɗi, tla ne kə khweere, kənan kan khurat kumchət kum kum (1,000). ³ Məkkan anchə kə khur kwiɗi nawaktə ndukwataan sə yu, nggəlankan, tləraɗankan miyan kaɗ kə ɗar ində'yan. Chəchan kəɗuyu kətləm mani tə nggər ləm nafchi khesə paɗ, se ma mbər khuraɗi khaa kumchət kum kum (1,000) yu. Kərsə nda'an na fe kal ndə khaa wanmənchə tapkəɗa. ⁴ Naki ɗakwan kutrakcha. ɗəɗas ɗaran fe fəranda fe alkət chak mee. Naki sisingngənchi fe tlətlende fe ɓərata kətləm mba ndiktə kə ɓəra Yesu, paɗ kə ɓəra ndikti Farta. Manawandə tlukhənggaɗi ndu mirsingndiyan wa, paɗ karndəf kə tləndə yarat kə pangndəyanda ndu kə kheryanda. Nggərkandə tla'tə tə sisingndə fa chəkandə kutrakta tə Yesu khurach kumchət kum kum (1000). ⁵ Taktə məmatacha nggərwndə chət sisingndawa se təɓak khurachəɗi kumchət kum kum (1000)yu. Tlaya ne kə tərkan tla'ti məmatacha. ⁶ Tlə mbəs ən khar tə paɗ chəɗchəɗ nat tla ne khur tərkan tla'tə khur məmatacha. Mərtə i chep alkət'yansə ɗar nandawa. Nachandə nat kə pastocha i Farta tə i Yesu, paɗ nandə chət kutraktə tə ndi khurat kumchət kum kum (1000). ⁷ Ma təɓi khuraɗi kumchət kum kum (1000) yu, na fe kal khweer khaa khur pursuna'yan. ⁸ Nan chet kes kə ləm nafcha ə konggwal khesə foɗa - Gog tə magog kə nggomandach kətləm yanda. Nach tərtə yandə nat kəɗ chekwtə khawurta. ⁹ Nandə wetlə khaa nat khur khesi, kə taurandə məɗi khaa na fə fər kitcha, mərəɓɗi yakhtə fe. chə kəɗu, ɓak wat kakh khulafərta 'yandakan kaɗi. ¹⁰ Khweere tla ləmchə tanda, mək kə fe ndə kə khur kheɗɗitə kəstə wata, məɗi məktə fe tlu khənggaɗi tə annabi tə lektəɗi. Nandə ɓakhtə khaa witə tə farta nding kə fere. ¹¹ Naki kapa kheɗɗitə ɗakwan kutrakta tə tla ne ɗaran. khakha tə khulafərta pəɗində ə weniti'yan. Chək kəɗu mətsə nat ndə ɗətawa. ¹² Nənchə məmatacha - paktə nafcha tə fe nawaktə mandə'yandəsi - kit kit pangngən ɗakwan kutraktaan, paɗ inankə fe ɗelewer ta'an khaa. Innankə fe ɗelewer tə tla khaa - ɗelewer tə sisingnde. Chakankə fe mee məmatacha tə ɗəchəɗi yarandə fe khaa khur ɗelewer cha'an, kə ɗar ɗəchəɗi chət nda. ¹³ Khawurta fər kan kes məmatachaɗi khuran. Mərta tə pan fər kandə kes məmatachəɗi ne khur nanda, məmatacha'an chakan kə fe mee tanda keɗkeɗech tə ɗəchəɗi chət nda. ¹⁴ Mərta tə pan cham kə fe tandə kə khur kuɗimən wata. Tlaya ne kə mərtə i chep- kuɗimən wata. ¹⁵ Ma tləm nefsi mbəsawaktə fe khur ɗelewer tə sisingnan, mək kə fe ndi kə kuɗimən wata.