¹ Naki yuwa khulafərta tə yuwa khakhaa, kətləm khulafərta tə khakhaa tla tərkanan mbərndə khaa, paɗ pa'u khawurtəs wa. ² Naki chəɗchəɗ tə mirɓe, yuwa Urushalima, tla ɓach kakh khulafərta məɗi Farta, takhəsta'an kəɗ perre kwasandə fe kətləm chəmata'an. ³ Səkki kapa ɓəratə məɗi ɗakwan kutraktaan ndat wa, "Ɗəpo! mət chokti Farta nachan məɗi nafcha, paɗ choktə tə tanda. Nachandə nat kə nafchəyan, paɗ Farta tə ində'yan nan nat tə tanda, paɗ nachan nat kə Fartə yanda. ⁴ Nan pətandə chək wun 'yamət kaɗ ə wenichəyanda, paɗ pa'u mərtə natsuwa, ndu səɓtə khure, ndu təta, ndu khatə fatawa. ɗəchəɗi chokh mbirkhaa. ⁵ Tla ne ɗar ɗakwan kutrakta'an ndakan wa, Ɗəpo! chani ɗəch kaɗ nat kə yuwata'an. "Ndakan wa," yaran tlaya kakha, kətləm ndikchəɗya əna fər kit paɗ ndəta'an," ⁶ Ndi kan wa, "Ɗəchəɗya chənda! Nggət ne kə alpha tə omega, tərkanan tə mecheta'an. Kəmɗi tla na kuchəmndəf'yan, ni fəran 'yem ɓa'al ə raka 'yeme i sisingnde. ⁷ Tla mbakhəncha nan mbəs ɗəchəɗya, paɗ ni nat kə Fartəyan, paɗ kən kə wa'inchi. ⁸ Nakan kəmɗi leche, tə fə kumi fər kitche, fə təkəməncha, fə ɓəlfacha tə fəlaucha, fə chət tar tlərfakcha tə fə tar ɗəkhacha, tə nat fə lekche, mət choktə yanda nachan nat khur kuɗimən kheɗɗitə kəstə wata. Tlenni mərtə i chepeta'an." ⁹ Artə khur fə tlənchəɗi muɗ yu ɓakan kəmɗənchi, tla na tə toso chə khar muɗ tippe tə ndukwa ɓakhchəɗi muɗ yu, ndakan wa, "Ɓo kəmɗiya, ni punu perre, nu wanchokhreta'an." ¹⁰ Tərkan nanchə pəɗakan tə nanchə khur semet kə kapa mbara nggwele, pənikan chəɗchəɗ tə mirɓe Urushalima ɓat kakh ə khulafərta məɗi Farta. ¹¹ Urushalima mandi Fartə fiyan, walwalkət'yan nachan kəɗ ɗekwen ne chəmndə fa, kəndenwa pəlara. ¹² Kapa mbara tlartə 'yansi tə mi kətənchə kum nggərsə chep, tə fə tlənchə kum nggərsə chep ə mi kətəncha'an. Ə mi kətəncha'an yari fe tləm kwatl wanchə Israila sə kum nggərsə chep. ¹³ Tə mət cheti farta mi kətənchəs makhkan, tə ɗaran mi kətənchəs makhkan, tə kanan, mi kətənchəs makhkan, paɗ tə mət khəmndi farta mi kətənchəs makhkan. ¹⁴ Tlarti mərɓan, renchə fe kum nggərsə chep, paɗ ə ɗar nanda tləmchəs i fə mba'aschə kum nggərsə chep i wanchokhreta'an. ¹⁵ Tla ndikchə tə nenchi fangngən kaɗat sə kharyan tla takhəs tə fe tə wan'ndəɓətla kətləm kə kaɗantə mərɓan, mi kətəncha'an tə tlarta'an. ¹⁶ Mərɓan, mbarat'yan tə khəpkət nat arta, konggalchə'yan foɗa. Kaɗan kan mərɓan tə fangngən kaɗata'an, mbarat'yan mel 12,000, (mbarat'yan, khəpkət 'yan tə njangkət'yan nat arta). ¹⁷ Kaɗan kan tlarta'an paɗ, khəpkət 'yan sartə kum tə kumchət foɗa nggərsə foda (144), Kaɗati nefe, (tla ne kə kaɗati tlə tləndə paɗ). ¹⁸ Tənanchə fe tlarta'an tə tipese mərɓan paɗ tə wan'ndəɓətla kəɗ sisingngən 'yeme. ¹⁹ Sartə tlarta'an paɗ, chəch fe tə kwastə ɗakwancha. Tərkanan yasfa, chepeta'an saffir, makhkanan agat, foɗata'an emeraid, ²⁰ ɗərmanan onis, mecheta'an sardiyus, muɗata'an kirisolat, foɗfoɗata'an neril, fenɗərmanan tofas, kumata'an kirisofaras, kumnggərsə artanan yakinta, kum nggərsə chepeta'an paɗ ametis. ²¹ Mi kətənchə kum nggərsə chep lu'u-lu'u chə kum nggərsə chep: Nat mi kətəncha'an chəch fe tə lu'u-lu'u arta. Mbanchi mərɓan kə wan'ndəɓətla kəɗ sisingngən 'yeme. ²² Nawi kətən sitə khur mərɓan wa, kətləm chənmən Farta tlə manda tə wanchokhreta'an ne kə kətən siti'yan. ²³ Mərɓan yakh wa farta ndu ndəra wa kətləm kə fəran ɗa'kətawa, kətləm mandi Farta wenenchə kaɗi, fitila yan paɗ wanchokhreta'an. ²⁴ Nafcha nachandə 'witə khur ɗakəti mərɓan. Kutərchi khesi nandə ɓat tə mandə 'yandə kə khuran. ²⁵ Mi kətənchiyan nə fe nggəlanchə fartawa, paɗ nətə nəs minni wa. ²⁶ Nandə ɓat tə mandə tə ndəta i nafcha kə khuran, ²⁷ paɗ ənsə nawakchə ndiichan ne tam ɗət kə khuran wa. Ndu nef tla chəch ɗəna khartəfata ndu tlə ləm fata ne yimkə khuran wa, se fe yarandə fe tləmchə nandə khur ɗelewer tə sisingnde.