¹ Kərsə ɗəchiini sək ki ɓəratə kəɗ ɓərati nafchə kaan ə khulafərtə ndat wa, "Halleluya, kəɓikaɗi, manda, tə alkət, choki kə i Fartə'yamən. ² Chakmee'yan i kit tə ndeta'an, kətləm chakantə mee kapa ɓəɓimanɗi tla səɓanchə khessə kaɗ tə fəlaukət'yan. Nggəranchəsi kə kənau feri mafach'yan tla tlərandən kaɗ tə ində'yan. ³ Ndik kandə i chepeta'an, "Halleluya! tla' inne fiyan nding kə fere. ⁴ Paktə nafchəɗ kumchət chep nggərsə foɗa yu tə ɗəchəɗi tə sisingnchəf foda yu, chamkandə kurumchə khaa manan kandə Farta tla ne ɗas ɗar ɗakwan kutrakta'an. Nakandə ndat wa, "Kə chok kəɗu, Halleluya!" ⁵ Chat ɓak ɓəratə kes fi ɗakwan kutrakta'an ndat wa, "Manaman Fartəyamən,nggun nat mafach'yan, nggun fe tlə lekenche nat fe nawaktə mandə yandə si tə fe nawaktə alkət'yandə si." ⁶ Sək ki ɓəratə kəɗ ɓərati yaka nggomən nafcha, kəɗ təti raka kapa 'yamcha, kəɗ kapa yandə 'yere ndat wa, "Halleluya! Kətləm Fartə kutire, Fartə tla chəch kutraktə kə ɗar chək wuni. ⁷ Səkam kə səkmən mbənfa kə chəmən kheɗɗitə khure kə fərmən manda, kətləm Farfə kakh tə kan i wanchokhreta'an ɓi, perrə'yan paɗ takhəs fa. ⁸ Fəran fe mbanda kə cham kapach kheɗiɗe tla ndiichan." (kətləm ən kheɗiɗe i tar kakəta i nafchə fe ne chəɗchəɗ). ⁹ Ndikə tlə tlənanwa, "yaran tlaya: Fə mbəs ɗəch khar fe 'yafe kə mət kən reti wanchokhreta'an." Nggərkan nditəwa, "Tlaya kit tə ndikti Farta." ¹⁰ Chamki kurumchə khaa nggəta pangngən sarchəyan kətləm kə manani, nakan ndikan wa, "kə chin ɗənni wa Nggət mafat kəɗ cha tə wanmanchəwa fe kəschə mba'ti Fartə khar kə ɗar Yesu. Manan Farta, kətləm kəs mba'ti Fartə khar kə ɗar Yesu, nda'an ne kə semeti mba'ti annabawacha." ¹¹ Naki khulafərtə inkhaa, ɗəpakisi mbəssanchi kə kheɗi tə pirse. Tla ne inan tləman wa tlə kit tə nde. Tlə chakchan me i kit paɗ tlə yanchan. ¹² Wenichiyan kəɗ kəstə wata, paɗ ə indəyan ləɓokər kutrakchəs kaan. Tləmansi kə yarata'an fi fat'yan tla sən waktə chək wuni se mətlan tə indəyan. ¹³ Mətlan tə kapat fə tla yiɓtə fe kə khur fere, paɗ tlə 'yach fe tləman wa ndikti Farta. ¹⁴ Sotachi khulafərta tandə para ndi ɗar kheɗɗitə pərəssa, məkndə kapach ləfərfər, paɗ kheɗiɗe, patsə fiyandawa. ¹⁵ Tlə nachamən tlutə ɓat kes khur mee'yan tla tlə chatltən nafchi khesə si, paɗ kə chət kutraktə kə ɗar nandə tə fangngən wan'ndəɓətla. Tlə rəɓanchan mət yim innabi tə kapa khuptə khuri Fartə tlə manda. ¹⁶ Tləmsi kə yarataan fi kapat'yan tə ɗar fəɗatyan: Kutiri kutərcha, tə Farti farcha." ¹⁷ Naki tlə tləndi Fartə kit khur farta. 'yakan ɗəngchəɗi ne tla'tə tə ɗaran yu nat tə kapa ɓərata, Ɓama, nggomam kə mət arta kətləm kapa khombati Farta. ¹⁸ Ɓama kə kangwun tlu fati kutərcha, tə tlu fati paktə fə yaancha, tə tlu fati paktə nafcha, paɗ tə tlu pərəssa tə fe ɗaran, tə tlu fati nafchə nat, mafacha tə fe nawakchə kə mafacha, fe nawakchə kə kaa nafcha tə fe ne 'kwa'kwa." ¹⁹ Naki tlukhənggiɗi tə kutərchi khesi tə sotach'yanda. Nakandə nggomnda kətləm kə 'yan'ndə tla ne ɗar pərəssɗi tə sotach 'yan. ²⁰ Tlukhənggi'yan nggətlan kə fe, tə mətlan, annabi tə lektəɗi tla chəch sakcha'an kə weniti'yan. Tə sakcha'an tə'inni ləmndən fe tləch yarati tlukhənggaɗi tə fe mananchə mirsingndiyan. wa'ndə chamkə fe tandə kə khur kapa kheɗɗitə kəstə wata tə sisingndə fa. ²¹ Takcha'an təkandak fe khaa tə tlutəɗi ɓach kes khur mee i tla ne ɗar pərəsɗi. Ɗəngchə nat khəɓang kandə məmata fach yanda.