¹ Nak fe kapa sakta'an ə khulafərta: nunef məkkan kapa farta, ndər paɗ ə kan sarchəyan, fatə ind wandərichə kum nggərsə chep ə ində'yan. ² Waa khur'yan, paɗ mətlan tət khatə nggətta, khur ɓakhtə khaa i nggətta. ³ Nak fe yowun sakta'an ə khulafərta: Ɗəpo! kapa ngatə səɓtə tlukhənggə si tə inchə muɗ tə mbo'omənchə kum, paɗ ləɓokər ktrakchə inchəɗan muɗ yu. ⁴ Ndis'yan pətantə artə khur makhkan i wandərichə kakh ə khulafərta, chamkan tandə kakh kə khur khesi. Səɓtə tluugge ini tlarkan khaa pangn nuɗi ne nduk nggəttə yu, kətləm ma nggiti kə ɓəlantə wanan. ⁵ Nggətkan khəeswaa, tla ne chət kutraktə kə ɗar khakhichə nat tə fangn wan'ndəɓətla. Tlənak fe wanan'yan kəmɗi Farta tə ɗakwan kutraktiyan, ⁶ Nunafan rakakan kə khur usine, məɗi takhsandə Fartə mət khaa kətləm mətlan ma'na fe ɗəpa anchə khar kə məndə 1,260. ⁷ Nakan yandəs khulafərta. Mikailu tə fə tlənchəyan yankandə tə səɓtə tlukhənggaɗi tə fə tlənchə'yan paɗ yankandətandə paɗ. ⁸ Səɓtə tlu khənggaɗi alkətyansə kə səmantə yanan wa. kətləm nda'an pa'u mətsə khulafərtə kətləm ndə tə fə tlənchiyan wa. ⁹ Səɓtə tlukhənggaɗi - ɗokhtə wuruɓɗi na tləman wa khwe'ere tla ləmchə khesə nat - mək kə fe ndə kakh kə khur khesi, fə tlənchiyan paɗ chamkə fe tandə kakh təɗi. ¹⁰ Səkki kapa ɓəratə ə khulafərta: "Nakanya ɓi kəɓi kaɗi, alkəta, tə kutrakti chənmən tə alkəti Kristi. Kətləm tla tlə ne pata ndə wanmanchəmən məkan fe kaɗ kə khur khesi, mətlan təɗi tlə ne patandat pangn Farta, witə tə farta. ¹¹ Mbəranchandə khaa təmɗi feri wanchokhreta'an tə paɗ tə mba ndiktiyanda, kətləm yakhwandə sisingn chiyandawa, chək kə mərnda. ¹² Kətləm nda'an mbənam fata ngun khulafərcha, paɗ nat fe ne choktə khurwun. Ai i khesi tə khawurta kətləm khwe'ere pəɗi kə khurwun. Səɓ khuryan kaɗ kaan, kətləm sənwa pa'chə wanmənchəyan tap kəɗa. ¹³ Sənkə səɓtə tlukhənggaɗi wa mək fe anchə kakh kə khur khesi, rəkkan nuɗi ngəchə khəswaa yu. ¹⁴ Nunafan fərankə fe pəpakhchə chep i kapa tuwakti kətləm kə tla'a kəmɗi takhsandə fe khaa kətləm mətlan ə khur usine. Minni na fe ɗəpa ndi kə wanmənchə tap kəɗa, tə wanməncha, tə chaktə mənda - ə məɗ nawaktə wurɓan si. ¹⁵ Wurɓan chəkhankan 'yem kaɗ ə khur mee'yan kəɗ kufa, kətləm kə ɓə tə 'yeme tla ne tərandə nuɗi. ¹⁶ khakha kəsankan nuɗi si. Khakha innan kan mee khaa sankan 'yam kufiɗi chəkhandə səɓtə tlukhənggaɗi kakh khur mee'yan yu. ¹⁷ Səɓtə tlukhənggaɗi khupkə khuryan kə ɓəra nunafan, pəɗakan nat yandə tə nggitkektiyan, fe tlə fərchə kit kə ndikti Farta, paɗ tandə chəp tə ɗəchəɗi mba'tə fe kə ɗar Yesu khar. ¹⁸ Tlarkə səɓtə tlukhənggnata'an khaa ə ɗar choktə ə mi khawurta.