¹ Fərikə fe chəkulkule kə chi tersə kəɗ fangn kaɗa əna, ndikə fe wa, "Tla'u kə keɗeen kətən siti Farta tə bagadi tə fe tlə mananchə Farta ə khuran. ² Keɗeen khakhiɗi ne ə khesi kətənan wa, kətləm fəran fe nafchəɗi tlə manawakchə Farta. Nandə wi'yandə chəɗchəɗ tə mərɓan ndər kumchət foda nggərsə chep. ³ Ni fərandə fe chep tləmba'chi ndiktinchi mbanda kə nandə mbata kə mə ndə 1,260 tə səɓtə kapachfa." ⁴ fə mba ndikchi ini fen ne kə ɗəftə zaitun chep tə mət tlarti pətəlla chep fə tlarchə pangngən farta i khesi. ⁵ Ma 'yach nefsəkə chanda əna, na wat ɓat kes khur mee yanda kə ɓəlantə fə inmərchəyanda. Nat tla yakhchəs kə chanda əna, nach fe ɓəlandə tə mbən'ini. ⁶ Fə mbachə'ini alkət yandəsi kə nggəlandə khulafərta mani 'yer ɓata nat fartəɗi mba'tənda. Alkətyandəsi kə təɓrandə 'yem khaa kə fere, tə paɗ kə ɓandə tə wetə ɓakhtəɗi nat yakhtəndəs kə khur khesi fartəɗi yakhtənda. ⁷ Ma tə ɓandə mbatə yanda, ɗəparaɗi ɓach kes khur kwiɗi nawaktə sərta'an səyu, nan yan tanda. Nan mbakhən tanda kə ɓəlandachi. ⁸ Məmatacha'an nachandə nat nduknduk khur mbancha ə khur kapa mərɓan (tla na fe ya sakta'anwa Saduma tə Masar) məɗi kukwandə fe Fartəyanda. ⁹ Məndə makhkan tə chakta'an fowun khur chəkwun nafcha, ngətkekche, micha tə khakhicha nandə na fach yanda. Nandə yakh kə səfe tandə kə khu kwiya wa. ¹⁰ Fe ne khur khesi nandə sək mbəndəfa tə tanda. Nandə tlənan ɗəch ra'an ɓa'al kətləm Annabi chəɗi chep ɓakhanchə fe ne khur khesiyu. ¹¹ Kərsə məndə makhkan tə chakta'an, yiptə sisisngndə məɗi Farta, nan yimandat kafa, paɗ nandə tlartə kə ɗar sarchəyanda. Kapa lekəte nan khəmandə fe nach tanda. ¹² Nandə sək kapa ɓərata ə khulafərta ndandat wa, " Ɓam kəmɗiya!" kanandə pəɗat kə khulafərta khur khusambaa, fə inmərchiyandə kə nandə na tanda. ¹³ Fartə'ini na kapa yira'tə khakhaa nat si, paɗ artə khur kum i mərɓan nan fokhtə khaa. Nafchə 7,000 nandə məmatata ə khur yira'ti khakhi ini, paɗ fe khəra'chə nandə rəɓtəf kaan, kə fərandə mandə Farta tla ne khulafərta. ¹⁴ Chepetə ɓakhta mbərkhaa. Ɗəpo! ma ¹⁵ Muɗatə tlə tlənan penkan ɗiptiyan, kapa ɓərachə ndikandə ə khulafərtə ndatwa, " Mandi khesi chikə mandi chənmən tə Kristi yan. Nan chət kutraktə nding kə fere." ¹⁶ Paktə nafchəɗi kumchət chep ngərsə foɗa ɗəɗas ɗar ɗakwan kutrakchəyandə pangn fartəyu chamndə kurumchə khaa ɗar chimən chiyanda. Manankandə Farta. ¹⁷ Ndakandə wa, " chuchə ən usoko Farta chən ən tlə manda, tla nesi nakanya tə tla nesə chokh, kətləm tirin kapa mandiyo, paɗ tirin kan chət kutrakta. ¹⁸ Nafchi khesi khup khurchəyanda, chək kəɗu ɓi səɓtə khuryo. Ɓi fartəɗi na fe chokan chakmee məmatach si tə paɗ fartəɗi natu fəran kənawan mafachyo Annabawacha, fe ne kə fə fər kitcha tə fe kwaranchə tləmwa, fe ne kə wancha tə fe ne kə paktacha. Ɓi fartata'an yo natu təkandə fe kaɗ ne təkandə khesi kaɗi." ¹⁹ Kətən siti Farta inkan khaa ə khulafərta, nak fe akwati tə ɗənɗi mba'andən nafchəyan chokh khur kətən sita'anyan. Wilwiɗ tə ɗakət si tə paktə ɓəracha, tə yaandə 'yere, tə yirati khakha fa tə kapa rənni 'yere tə ratlata.