¹ Naki nowun kapa tlə tləndi Fartə ɓat kakh ə khulafərta. Nachan khur khusamba ə ɗar indəyan ndalkurtəsi. Chimendiyan kəɗ farta, sarchiyan kəɗ tlartə wata. ² Wan ɗelwer sə chep kharyan kə innan, paɗ ɗəfkan sartə kharsəm'yan kə ɗar khawurta, sartə kaku'yan paɗ kə ɗar khakhaa. ³ Khwakan tə kapa ɓərata kəɗ təti chini. khwakan, ya'andə 'yarchə muɗ ndikandə tə ɓərachə yanda. ⁴ Ndik kə yaandə 'yarchəɗi muɗ yu, nduk kə yari, sək ki ɓəratə khulafərtə ndatwa, "kəsu khar kə wuɓta'an ɗənɗi mbatə yaandə 'yarɗ mu yu, kə yeren wa." ⁵ Naki tlə tləndə kit ə ɗar khawurtə tə khakhaa yu tla'antə khar kharsəm yan kafərta. ⁶ Yakan ən mi tə tla ne tə sisingndəf kə fere. tla chəch khulafərta tə ɗəchəɗi nat khuran, tə khesi tə ɗəchəɗi nat ne khuran, tə khawurta tə ɗəchəɗi nat ne khuran, paɗ ndak tlə tlənan wa, "Pa'u təla fatsə paɗwa." ⁷ Nakan fartəɗi natənnduk nduk kə pen muɗatə tlə tləndi ɗiptiyan, fartə'ini na wuɓtə ɗəchi Fartə ndiit khaa, kəɗ ɗənɗi mba'andən mafach'yan Annabawacha." ⁸ Ɓəratəɗi səkti khulafərtə yu nggərkan ndiktə tə nanchi, "Ɗu təru ɗelwer təɗi innandə fe khaa khari tlə tlənɗi ne kit ɗar khawurtə tə khakha yu." ⁹ Ɗəki kəmɗi tlə tlənan, ndanki wa kə fəri wan ɗelwer ta'an. Ndikan wa, "Təru ɗelwer ta'an kə kengnən. Nan chandə khuryo ɗəkhɗəkh, khur meeyo paɗ nan nat nepnep kəɗ ɗaya." ¹⁰ Tərki ɗelwer təɗi khari tlə tlənan, kangngangki. Chəkan nepnep khur mee inchi kəɗ ɗaya. Kərsə kangnga ndəchi khurinchi chikan ɗəkhɗəkh. ¹¹ Ndikə yowun wa, "wa'at kə nggirin mba ən kə ɓəra nafchə kaan, tə khakhicha, tə michche samən-samən tə kutərcha.