¹ L'umom umeh bu l' eyee udhinwe kpu Jizos uzhile l'ukadhe l'gakoshi ikam ukpashibhe oka l'atutu ukpulu-ushi udhibhe edhi, emene uzhiya uwotuzebhe otu ukpulu-ushi ugonulibhe, aukomebhe l'eka audhibhe. ² Buwhuto kpom, emene Palisii ukabhe iyala udowho mu umebhe iye odhukata l'ume l'eye ude eli la? ³ L'usabhe mu Jizos uko, "ika gudhine iye Debid ume l'ekelemu inw ugola ya l'emene ogbo ogboya e la? Ukpudhubhe l'udho ⁴ ukpeni mu ugono bhidhimu egwele mu udhiobhe ya l'emene 'ya, l'ekele umujikpom bu ugamagbo nye osoeja bhu bu gbo nye udadhuni l'udhi bhidhi egwele ya." ⁵ Mu ukagbajo bu, "Unwo madegede bu Nyenwe eyee udhitu inwe." ⁶ L'udho eyee udhinwe, ukpudhu l'udho Ukpeni mu uzho otutu madegede iye l'adhiya. Uduke uzhi l'adhiya eka obhoni malema l'eli. ⁷ Emenemu ubhagbedebhe iye, l'Palisii uzhibe l'uku eli l'udukudhiwha enye bulebu ogwo onwunye eli l'eyee udhitu inwe, kpagale mu uwhetabhe iye obushabhe obushi. ⁸ BUwhuto kpom umaji iye uzhibhe l'ugbedhi l'unukumabhe mu ukune udukemu eka ewhela, "Buzeli mu inuzoke l'echinabo ogbo emenemu." Yabukpu udukeya unuzele. ⁹ Mu Jizos utebhe; "Me mowhudhiga ujukwa yoni kpom, l'bhu ubu iye bhiyo ludokpewe madegede l'eyee udhitu inwe mubu utashi atashi la?" L'ekeleya, mu ¹⁰ unyekedhiwho bhele bhele bhe enye, mu ukunio udukeya, "gbate ekayo." Mu nyeya ume kpeye, yabukpu unwetale ekaya ozu. ¹¹ Buwhuto kpom emeneya uyulukabhe l'uwudhu uma mu ukanitawhobhe iye l'uche iye emegidebhe Jizos. ¹² Ume l'awa ugaga uze olu ebhu adhi ukpe ekpele. Unweshike eyi li edhio li bhele bhele abali udhio Ebilikpabi. ¹³ uba dhuma eyee, mu uwhugbedho emene uzhiya, mu uloto dhi adu l'madu ibo emenemun uko bu udhinibhe nye udu. ¹⁴ Ewa emene uduya bubhe, Simon, (Pita), l'nwana ukoma Adulu, Jemishi, Joni, Pilipu, Batulomi, ¹⁵ Macho, Tomos, Jemishi nwo Apeyos, Simon (Zilotu). ¹⁶ Judasi nwo Jemishi li Judasi Isikaliotu, nye ibim. ¹⁷ Ekeleya mu Jizos ukpoda ele ya l'emene uzhiya mu unuzo l'ele ewe l'ime ogbo madegede igwe emene uzhiya mu igwe madu-ogbo ujayobhe ll'ibe Judiya li Jeluselem yal'igbu olimin Taya li Sidon. ¹⁸ Emene ujabhe l'ukpeshina ete l'unweta ugwo ogwo utu ukemu zhiebhe l'eli. Emene uwa bhiyo umekpashi eli unweta dhiwhu bhe ugwo ogwo. ¹⁹ Bhele bhele emenemu uzibhe l'adhiya ugbakebhe ukpo kpagale mu kputabhe eka l'eli iyedoni ugbakpo ugwo ogwo ulodha l'eli mu ugwojone bhele bhele bhe. ²⁰ Ekeleya mu nye emene uzhiya enye mu uko, "Uwokwani uzhiniyo emenemu idani uyo ele eze Ebilikpabi ub ayo. ²¹ Uwokwani 'zhini yo emene inwe 'zhi-l'ugwu enetebhe yoni ubu uwo. Uwokwani ubudhiwhu ayo emenemu izhoni l'ukwa ikwa makabu yo emudhini 'bu umu. ²² Uwokwani bu ayo l'ekele nwo madegede uso lebhe yo oso mu ulodhi lebhe yo mu ukpadhi ebhe yoni umu mu umeshi lebhe yoni mu ukani lebhe yoni bhele bhele uji uka bhiyo l'ishili me. ²³ Padhi apadhi l'ogbo eye uzhikpeye iyedoni yo inweta bu egede uwudhi ugwo l'ime obioma, maka yabu kpu emene idakani l'inakani bhe umenyi lebhe emene amuma ogeya. ²⁴ Buwhuto kpom okolomu-unuuzhini yo, nyemu unwenwe, makabu yo enabhete male umanu amanu yo l'elem. ²⁵ Umekpa eli zhini yo nyemu uwo uyulumao, inwe ogwu yo bu ogwu l'ekele zhil'ununu. ²⁶ Ogwolowo uzhini yo l'ekemu bhele bhele madu ukpobhe ekpo 'manu amanu l'iye kpani yo akpu emene ukanibhe umenilebhe emene amuma oyika awaya. ²⁷ Buwhuto kpom me mokuniyo emenemu izhoni l'ukpe ete gwushini nye ubheni egba yo, meninyi emene usobhe yonioso iye uma. ²⁸ Wokwaninyi emene ugobhe yo owo, emene emekenie bheyo joka kpenibheni ekpele. ²⁹ Nye nye ulole yoni eka l'agba chishina ibemu ugwaleya. Bulebu uzhi nye unatu yo kapa nekakpoa ata mu inya anyaya dhiwhu. ³⁰ Nedhe nye nye obula udhiole yo iye. Bulebu uzhidhiwhu nye ugonu iye yo mu ulawetuma ekunila bu unosaya ozu. ³¹ Kpu odo iwudhigale bu ubha menibheya emeni, yo menidhi whu ibeyo kpeye. ³² Ubulebu igwushigbo bu emenem ugwushebeyo, nde iye ubadhu niyo la?Emene umeyeshi ugwushigbobhe bu emene ugwushiebhe. ³³ Ubulebu imeni gbo iye uma bu emene umenibheyo nde iye ubadhuniyo la? Emene umeyeshi umenidhiwhubhe kpe. ³⁴ Ubulebu igbadhishigbo owayi bu emene imaji kpom bhu owhnwosabhe ya bu ozu, iye la ubadhuni yo la? Mashi budhiwhu mene umeyeshi ugbadhibhe bu emene umeyeshi kpu agale mu unwetabhe owoyibhe ozu ³⁵ Buwhuto kpom, gwushi emene ubheni egba yo, meni bhe iye uma. Gbadhibhe owayi l'ugwe unye enye iye iye. Uwhudhi ugwo yo obubu eke, ebudhiwhubu nwo nyemu ukakpolibhe. iyedoni yawe ume uma l'adhi emene amjibhe kpu utedhi meka l'emene bhiyo uzhibhe. ³⁶ Nwe otuwizhi kpom ujimu idayo unweo otuwizhi. ³⁷ Yo ekpe onwunye onwunye ikpe mu ugwe yo ukpe ikpe. Ekogbo kpu agale mu ugwebhe yo ukogbo okogbo. Sabheteni nwana yo bhiyo mu usabhetebibhe yo bhiyo. ³⁸ Nedhi kpu agale mu unedhi whubhe yo, aubu eke apadabu l'ele, aushikoshabhe, tutu upadamawhu yabukpu enelebhe yo. Kpu imenile nye'we, yabu kpu emenilebhe yo." ³⁹ Ekeleya mu ulushinebhe elulu, "Unwe uwe l'nye ekpeleni ukpoli l'udu nye ekpeleni usa ba-ba-ba la? Ubulebu ubuwho kpeye, ndeke emene ibomu adagadhobhe l'ime udhu e-la? ⁴⁰ Nw'udho uka Idanw'udho, Buwhuto kpom nye ukpakelebhe joka ezhio bu kpomu idanw'udhoya." ⁴¹ Umekpala mu yo inyetowho unwo ibe-iyemu uzhio l'ekpeleni udonwunye, l'ekele ubukpom bu yo inyetujene abasamu ayo ela? ⁴² Ndekpu yo ekajilene bu nwana chishi mu nname unw'iye l'ekpeleni l'ekele budhiwhu kpom bu ikishi-ugbala iye uzhidhiwhu yo l'ekpeleni la? Yo nye eke uwhenwa! L'unuzu bido-a l'unama ayo, mu iba namawhola amu nwanayo. ⁴³ Makabu uzhie egede ushi unwu anwu utadhu atadhu, mawhone ushi bhiyo l'unwu egede anwu-u. Umaji ushi nye ubu bu gontu l'anwuya. ⁴⁴ Makabu madegede uwoto anwu ushi unwe ine l'ushi unwe ilu-u, mubuwhone bu uzhi nye ututu alodu l'ime uya ukpopio-o. ⁴⁵ Nye uma l'ime unukuma umaya ulowebu iye uma, yabukpu uzhidhiwhule l'nye bhiyo l'ime unukuma bhiyoya ulowebu iye bhiyo. Iyedoni bu zhikpu unukumaya uzhile mu ukpola l'unu. ⁴⁶ Umekpala mu yo iwhonime, 'Idanw'udho, Idanw'udho,' l'ekele ubukpom bu yo imeni iye me maka e-la? ⁴⁷ Nye nye obula ujakeshileme, mu unujile uli-ekpo me mu uyilema eso, mowudhiga ukuniyo kpu nyeya uzhile. ⁴⁸ Nyeya uzhikpom udukemu unuo udho mu ugwugashola l'igwu ukwali akwali. Ekelemu iji l'apaka mini unuola ndeke ezhigidhe ezhigidhi, iyedoniunukeabhe joka. ⁴⁹ Buwhuto kpom nyemu unujikpowho uli-ekpo me mu ugwe umewetuo ogbolo uzhikpomu nyemu un'udho l'olu uza ubuluma l'ugwe ugwugashe l'ime ele, ekelemu apaka mini iji unuola obudama bu l'ele, autadhuma saisai."