¹ L'ekeleya akpu ogbo madegede uzhibhe l'unazhi l'uku eli Jizos, l'ukpeshi ete l'uli-ekpom Ebilikpabi. l'ekelemu uzho l'unuzo l'uku ude mu uwhobhe Genisaleti. ² Mu uwejo ugbo bho uzhibhe l'udokpuya l'igbumu ude ugbo. Emene mu ugbobhe ukpam obuzelibhe lime bhe uzhibhe l'usatuwhu ijadhibhe. ³ Mu Jizos ukpodhu l'ime ugbo amu Simon. Mu ukunila ka lowekegba uwe, li uku mini l'adhi akanutu l'ele ewe. Mu unazho izhi mu uzhi ogbo madegede iye l'adhi ugboya. ⁴ ekelemu uba kakpowho, mu ukuno Sayimon, "Gonu ugbo mu idhumagba asagam uwe udhu l'mini mu iwushigba ijadhiyo l'ugbudhi ukpa. ⁵ Sayimon usakpom, "Idanwudho, ye otuleye eli abali abali l'iye kpani ugbudhi ukpam, aweji iyeye. Buwhuto kpom l'ishili iyemu ikom l'uli-ekpoyo, me muwushigbabu ijadhim. ⁶ " Kpom umegbobeniya mu uwhetabhe bhele bhele adhi ukpa-'kpa, abkpom bu ujikawhu ijadhibhe. ⁷ Mu kpokushnebhe uzhibhe l'udho uwhu bhu 'jabhe bumu ushikeshibhe eka. Muujabhe enyi udhili edhili. ⁸ Kpombokpe Sayimon Pita, ekelemu uwejo kpu iyeya uzhiwhole, mu udo l'ukpunuko Jizos, mu ukaniola, "Buzeli l'adhim mizhom iyedoni, mubu nye umeyeshi, Nyenweye. ⁹ " Iyedoni uwodha enye ushikabhe emenemu uzhikeshibhe l'adhiya l'utoma otu ukpaya amu ugonukpobhekpai. ¹⁰ Emene bubhe Jemish,Joni umeledhe Zebedii emene Sayimon bhe umashikabhe iye. Jizos ukuni Sayimom, "Yo eto otogwu, iyedoni gontuwho l'umomu yo ebuwhobu nye udoyawe madegede. ¹¹ " Ekemu ulomawhobhe ugbobhe unu-oshi, mu 'sabhete kpobhe iye mu uchize la. ¹² Mu 'dhumo eekele, eke uzhi l'ime ula ubu-eke uduke uyuluka l'uke asas uzhi l'adhiya ekelemu uwejo Jizos, mu uda l'ununuya mu udhiola, ukunila Nyenweye yo iwhele inwe ike li uzhi usamali. ¹³ Mu Jizos ugbeta ekaya mu ukpotola mu uko, me-whe ewhe zhi usamali. Ekeleneteni, mu uke asasaya ubuzele-'la l'eli. ¹⁴ Mu ukunakpom bu okune onwunye onwunye, butokpom ukunabhu ukazetu aya bu mu uze adhi utugwoshi eliya l'eka nye-ishi osoeja l'uso eja kpu omunala uwhusama eli ukale l'olokomu Mozhizhi, l'iye ukaloshibhe. ¹⁵ Buwhuto kpom ozuzu iye-umaya ukadhe okpe uto bhaka, l'ishili om mu igwe madegde ujayabhe uwadhi l'unuji uzhi-ezhiya l'unweta ugwo-ogwo eli idhe. ¹⁶ Buwhuto kpom, l'ubotu ekele udo eliya ladhi medegede uzhibhe l'ukadhe ime ukaya l'ukpe-ekpele. ¹⁷ Mu udhuma eeye, l'otu ugbowhu uzhi l'uzhidhi iye, l'adhiya emene Palisii l'emene uzhi oloko uzbhibhe l'unazhi l'adhiya otu buzelibhe l'bhele bhele ula uzhibhe l'Galilii l'Judiya lijine Jeluselem. ugbakpo Nyenweye uzhikeshama l'ugwo-ogwo. ¹⁸ L'ekeleya, otu ukoma ujabhe abuyabhe uduke l'ekpali nye akadhe-ize, mu uwudhigabhe ewhu-eka emebhe mu uyawabhe ime-mudho adhimu Jizos uzho mu ububhetabhe l'ununu ya. ¹⁹ Uwejebhe ewhu-eka ubugasha l'ime mudho makabu l'ishili ogbo madegede uzhibhe ladhiya, kpombokpe mu ukadhebhe adhi ukpodhu l'olu udho kpu agale mu udopetabhe l'ele l'ugata l'iyemu mu udopedhebhele l'ununu Jizos. ²⁰ Kpom uwejo uwhetubhe, mu Jizos uko, "uduke, umeyeshiyo enwetale asabhedheni. ²¹ Emenemu ubhabhe iye ubhabha l'emene Palisii mu ujushobhe ajuju l'uka, "Nyem ubu nnina ukpodhi ekpo ugbabuze okpeli olu?" Nnina enwe-ike l'usabheteni umeyish 'gama Ebilikpabi. ²² Mubokpom, Jizos uweji l'unukumaya iyemu ugbebheya, mu usabhe, "Umekpala mu yo ijudhiwhoni ajuju zhikpom, l'ime unukuma yo la?" ²³ Elamu uka unwe uwela l'uka'ka, umeyeshi yo enwele usabheteni l'jine l'uka nuzo mu ikadhe ize? ²⁴ Mu uzhikpu imajileni kpom bu nwo madegede unwe ugbakpo l'olu uwa l'usabheteni umeyishi. Me makani yo buzeli, gbatu ekpali yo mu ikaze udho yo." ²⁵ L'ekelentni mu udukeya unuzo l'ununu bhe mu ugbato ekpeliya mu ukazeo udhoya mu upadhiweo Ebilikpabi. ²⁶ Bhele bhele madegede uwodhabhe enye mu bhe utubuzobhe Ebilikpabi olu. Bhe Uyulukabhe l'otugwu, mu ukadhiwhobhe ye awejile iye uzhi ise tam. ²⁷ Kpom ogbo otu iyemu umekpo who mu Jizos ubuzeliwho l'adhiya mu uwejo onwunye unagbededhi owayi ewaya bu Libayi l'unazhi l'ime ulu adhi mu unatudhibhe owayi, mu ukanela "Chiyamu. ²⁸ "abu kpu Libayi unuzole mu 'chizela, usabhetekpo bhele bhele iye l'adhiya l'ekaneteniya. ²⁹ Ekeleya mu Libayi ukpajo Jizos nye-ize. L'adhiya emene ogboya unatudhibhe owayi utubhe ogbo l'gbajine udo emene uzhidhiwhubhe ladhimu uzhiobhe l'udhikeshibhe bhidhiya. ³⁰ Buwhuto kpom emene Palisii l'emene ubhagbedebhe iye ukunibhe emene uzhi Kalaisi l'uwudhuma, bu umekpala mu yo idhi keshiwhoni emene unagbededhibhe owayi l'emene bhiyo bhidhi la? ³¹ Jizos sabhe, "Emene eli ukwali uwudhibhe nye ugwo-ogwo; 'gamawgbo bu emene udadhibhe eli. ³² Me mejamu adhi uba whu emene uma, meja bu adhi uwhu emene umeyishi mu uyosalibhe." ³³ Mu ukaniobhe, emene uzhi Joni ubotu ekele unazhibhe l'ubu unu l'ukpe ekpele, emene uzhi Palisii umedhiwhubhe kpe. Buwhuto emne uzi yo udhibhe bhidhi l'unwu onwu. ³⁴ Jizos ukunibhe uzhi nnina emene ujakeshibhe nye utu ununwe mu ububhe unu l'eke nyemu utu ununwemu uzhikeji bhe l'adhiya la? ³⁵ Buwhuto kpom eyee uzhi l'ununun uzhi l'uja kpu anamibhe nye mu uto ununwemu l'adhi uzhibhe l'ekele 'zhikpeye, ogbo eyeeya obubhe bu unu . ³⁶ L'ekeleya dhiwhu mu Jizos uluo elulu, "Onwunye-onwunye udokato ibe-ukani l'ugbokwu l'kapa uwu. Nye nye obula umewhuto kpe, utasheya bu kapa uwum, uzhe nye ukeshi ukani ukani l'awhulu uwu, mubu awhulu uwu l'ukeshi l'a-uwuu. ³⁷ Onwunye onwunye ushishe menye uwu l'ime alilo ukani. Nye 'melekpeye menye uwum agbakpobu alilo amenye ya uwosalikpo l'ele, aliloya atadhubu atadhu. ³⁸ Butokpom, menye uwu eshishabhe bu l'ime alilo uzhigedhe l'uwuya. ³⁹ Onwunye onwunye unwokpo menye ukani mu uwudhiga auwu-u, iyedoni akabu kpom, "Menyemu ukaniya uka amu uwumu."