¹ Ogemu Jizos ukakpo bhelebhele iye li ete ogbo emenemu uzhobhe ladhiya mu ukpudho l'ula uwhubhe Kapanom. ² Li ekeleya onwunye ukwali akwali li soja unwe ulu, uyi eso gbaka ulu uzhi li ilidhi uzhiwho li unu enwe. ³ Ekelemu nye ishi sojam unujo iye basa li Jizos, mu udugasho unukani emene Juu bu ukunebhe bu uja kpu agale mu ugwo unwudhoya. ⁴ Ekemu udhumabhe adhimu Jizos uzho, mu ukunabhe li ishuka mu ukabhe, ubu nye manu amnu li yo umena iyemu uwudhigao. ⁵ Iyedoni uwe ugwushi ladhi igbu aye uzhi ya ununyye udho ukpeni. ⁶ Mu emeneya li Jizos ubidobhe ukadhe, buwhuto kpom uzhibhe li ichakpa akpui nye ishi sojaya udugashigbale umu nwuja, bu ukunabhe bu emekpasheya eli lujakpo bhe udhoya, iyedoni buya bha 'dadhoma li Jizos udhumaniya udho. ⁷ Li ishilimu ubokpom bu mobomu nye uma ume me mu mako meni ubo iye dadhu adadhu bu ijakeshi me kagbo whuto li unuyo nwudhome enweta bu ugwo ogwo. ⁸ Mewewe mobu nye uzhi li adhi ugbakpo utu uka, aubukpom otu soja uzhibhe li ukpudume, nye mokunile kaze, aukaze, mokunile udo ja auja, unwoboyime me iyem emabukpeye. ⁹ Ekedmu Jizos ununjo ekpo zhikpeye, unwodha enyi mu uneshienye l'adhimu ogbo madu uzhibhe li uchiya mu uko, "Mokuniyo, maka wejemu uji uwhetu uzhikpom, mashi bu li Izhileli. ¹⁰ Ekemu emenmu udukgasho udhumabhe udho uwejibhe kpom bu nwudho nye soja enwetale ugwogwo. ¹¹ Kpom ekeleya ugamamo mu Jizos kaze ula uwhubhe Nein, mu emene uzhiya le eke ogbo madu uchikeshabhe. ¹² Kpom uja uzedhu, egbeleta ulaya, netu uduke ina umugboyaneteni onwulumale, uzhibhe li ubulawha ina bu ununwe ukudho, igiliye ogbo madu emene ula uzhikeshabhe li adhiya. ¹³ Ekemu Nyenweye uba wejola mu unwenela otuwishi mu ukunela, "Ekwa ikwa." ¹⁴ Mu ukazo olu mu ukpoto eka li iye ushimu umekekpobhe ubushebhe uzum uzhibhe li ubulaya emenemu dhu buladhabheya mu unuzobhe uwadhi mu uko, "Yo nwo ugboji mokuniyo buzeli." ¹⁵ Mu nye unwulu onwulu unazho ezhi mu ubido ukpo ekpo, mu Jizos ugonula mu unedho ina. ¹⁶ Mu otogwu uyulukabhe eli akpu ubidolebhe upadhiwe Ebilikpabi mu ukadhiwobhe olowelebhe eke nye amuma li imeye. Ebilikpabi enyitule emene aya. ¹⁷ Unukamu Jizos ozukoshimale ele Judiya uke li otu igbu uzho l asagaya. ¹⁸ Emene uzhi Joni ukunikpabhe bhele bhele ogbo otu iyemu. ¹⁹ Mu Joni uwho emene uzhiya madu ibo mu udugashobhe luweji Nyenweye mu ukunebhe, "Ibu nyem azholiunye enyeya ubujiwhunekpom bhu anye enye udonwunye la?" ²⁰ Ekemu udhumabhe uku eli JIzos, mu emene ukoma ukunabhe, "Joni nye uwushidhi mini udugashiye li uweji yo li utekwa ibu nyemu uzhio li uja ejamula? Mubujiwhone kpom, bu anye enye udonwunye la?" ²¹ Li ekeleya dhiwhu, mu ugwo otutu madegede elidhe uzhi lise lise li umekpeli buzeli li eka uwa bhiyo; atutu uwa enyetobhe adhi umebhe mu unyetubhe adhi. ²² Mu Jizos usaobhe, "Kanini Joni bhele bhele iyemu iwejoniom mu inujoniom. Emene enyekpo unyetubhe adhi, emene akadhe ize ukadhebhe ize, emene uke asasa unwetabhe ugwo ogwo, emene ete ukpoli unjibhe ete, emene unwulubhe onwulu utelibhe eteli, liwho emene ogboyi unujibhe uzhi umam. ²³ Nyemu uwhetuno me uzhini uwokwani." ²⁴ Ekemu emene uzhi Joni ukadhema whobhe, mu Jizos ukune ogbo emenemu uzhobhe l'adhiya iye bhasa li Joni, iye inyetuni l'ime ele iwhomu izoni. Ewe ikpuum uwele uzhigidho la? ²⁵ Maka iye idhe wejini l'asaga ukabu e-la la? U'duke uyeji ewelewe unkanyi? Nyetuni emene uhyejibhe ukanyi ugbu aya l'emene ubedhibhe ebube unyii l'unwu uzhibhe bu l'udho nye eze. ²⁶ Buwhuto kpom, yo izhini udhuweji olodo uji iye l'asasga la? Nye amuma la? Ishi uka me mokuni yo iye uka nye amuma. ²⁷ Omu bu nye mu ubhanadhibheya, nyetu, mo 'dugashibu nye olo li ununuyo. Nye emeke ichakpa tut mu yo iba ja. ²⁸ Mo kuni yo, li bhele bhele madegede unyoma umu, uzhie nye uka Joni, mu ubuwhuto kpom bhu nye mu uyakalikpobhe l'eli l'ime ele ezemu Ebilikpabi akamadhiwhuledhe Joni. ²⁹ Ekemu bhele bhele bhe unujebhe iyeya ushikatabhe emene unabhe owayi mu ukaloshibhe bu Ebilikpabi bu nye ume. ³⁰ Buwhuto kpom emene Palisii li emene umaji iye kpani oloko uchiwobhe iye Ebilikpaabi ubuluche li iye kpani elibhe, iyedoni Joni uka uwshibhe mini. ³¹ Ndeke iye me meweke li umashikata emene ogemu azhomu la? Uzhibhe kpom iyala la? ³² Uzhibhe kpom umeledhe umedhibhe ogologu l'ime aya, aunazhibhe ezhi mu uwhuta dhiwhubhe onwunye onwunye, mu ukadhiwhubhe, nwana ugbaninie ubo, mu egweni ute elebhe, agwushi obu nye unwulu onwulu Ikwanine ikwa-a. ³³ Joni, owushidhi mini uja udhie bhidhi, unwone menye, aukabhe bhu ubu uwabhiyo. ³⁴ Nwo madegede ejale udhi bhidhi, unwudhiwhu menye, ikanikpom nyetu udukem udhilaga bhidhi, unwugbo gaya l'menye, nwujie emene unadhigame owayi l'emene umeyeshi. ³⁵ Buwhuto kpom eyo bu iye bhele bhele umeledheya ukakebhe bu umanu amanu. ³⁶ Ekeleneteni, yabukpu onwenye li emene Palisii udhiayashi Jizos bu ja bu mu udhikeshiya bhidhi. Ekemu Jizos ukpudhumawho lime uho nye Palisii, uzho li unazhi udhiwho bhidhi. ³⁷ Nyetu uzhi ununwe l'ime ula adhiya ubu nye umeyshi. Ekemu uwejo kpom bu uzhiwho li udho nye Palisii li dhiwhu bhidhi, mu ulowe ilo ugbu aya uwhubhe bhu bu alabasta. ³⁸ Mu unuzola li ozu li uku uko, mu ukwadhiwho ikwa, ishibilikwa uchidadha bu li uko, mu ugonu ukaze ishiya mu ukomawela mu uzolaunu li uko mu utela oga ugbu aya egbuma. ³⁹ L'ekelemu nye Palisii ukuna bu ju udhoya uwejo iyemu, mu ugbe iye l'unukumaya l'ukadhiwhu ubulibu uduke bu nye amuma abamajile uji madu unwe ukpota eka l'eli ubamaji bu ubu nye umeyeshi. ⁴⁰ Mu Jizos usala, "Simo mewe iye maka mene mo kuniyo, mu uko ka, nye uzhi ezhi, ⁴¹ Jizos uko, "Onwune ugbadhishidhi owayi unwe nye umojabhe ugo madu ibo, nwune umajabhu pam ibo l'dhi, nyemu usoshila umoja bu ugwu pam, li pam isu. ⁴² L'ekelemu owhudhodhabhe ugom, mu usabheteni madu ibo. l'ime madu iboya nwuna aka ugwusha la? ⁴³ Simon usa, "Bu ya gbekpom bu obobu nye ugoya uka ubu eke ya." Jizos usa kpom, Yo ekpebitale ikpeya. ⁴⁴ Mu Jizos uyosalio ununweya mu ukunela, "Simon iweji ununwem, mokpudu li udho yo," Ineme mini usama uko, ununwem ogonule mini ishibilikwaya asamaleme uko, okomalema l'ukaze ishiya. ⁴⁵ Yo imiome udhu, gontu li ekelemu mejao unuwem aka ukushe uzume unu l'uko." ⁴⁶ Yo iteme oga l'ishi, gama kwa bu unuwnem ugono ilo oga egbu'ma l'uteme l'uko. ⁴⁷ Mu Jizos ukano Simon, l'ishili agwam umeyeshiya inwele usabheteni iyedoni unwe ugwshi ubueke. Makabu nyemu ugwushiya uzho ntiko enweta gbo bu usabhetenintiko dhiwhu. ⁴⁸ Mu Jizos ukano ununwem, "Umeyeshi yo enwele usabheteni." ⁴⁹ Emenemu uzhobhe li tebuluya mu utukadhi-obhe kpom, "Bu Jizos uka-ubudhi nnina asabhetenidhi umeyishi la? ⁵⁰ Mu Jizos ukano unweya, "Uwhetu yo odokpewe le yo." Kazewho l'ime uyodhu."