¹ Bhele bhele ogbo madegede ugbomaliobhe mu lawe bhe Jizos eka Paileti. ² Mu kabhe, nyem daikpe, "Awuweji meni uduye ulaye, ukabu iye dhuni Siza bu enebhela, bu yawe buya bu Kalaisi, Eze." ³ Mu Paileti tela, "Ibu eze emene Juu la?" Mu Jizos usala, "Yo ikakpe." ⁴ Mu Paileti kanie emene ishi osoeja li ogbo maduya, "Mo wuwejiem idakpe li eli nukem. ⁵ "Buwhuto uzhibhe li udoke bu, "Ume mu madegede shinwabhe adhi, ugakoshi Juda li uzhi iye, ubido buli Galilii tutu dhumakpo adhim." ⁶ Kpom Paileti nujio om, mu tekwa ubulebu unukem bu nye Galilii. ⁷ Kpom uba majio bu uzhili li ibem Helod uchio, mu lawe Jizos eka Helod, nyemu uzhidhihu li Jeluselem li ubeya. ⁸ Kpom Helod uwejie Jizos, obu toa, iyedo owhudhigamale uweji Jizos tutuni. Onujile iye basalia mu bheshio obu uweji iye unwodhawe enye eme. ⁹ Helodu Jizos ajuju li ibe akpa zhiliselise, buwhuto Jizos sala iye iye. ¹⁰ Emene ishi osoeja li emene ugba agba unuzoshibhe ike li umegidea. ¹¹ Helod li emene kapa uchiya ukpadhiwebhe Jizos umu mu nyedaweabhe ele, mu uyoshiebhela kapa dhu eso mu ulawela ozu eka Paileti. ¹² Iyedo Paileti li Helod ubulebbhe nwujie li eye ya, tutu uba dhumo eyeya madu ibom uzhibhe li ubheni egba. ¹³ Mu Paileti uhugbede emene ishi oseja li emene uchi echi li ogbo maduya, ¹⁴ Mu ukaniebhe, "Iyaweni meni unukem kpom kpom unuke uduye madu ichakpa, nyetuni, mo julema ajuju li ununu yo, nwejienmu idakpe li bhele bhele otu iyem ikani bu umeme. ¹⁵ Mane Helod uwejie, me uyawela ozu eka ye, nyetuni, uzhie kiye iye ugbu ukpeshia enwu ume. ¹⁶ Kpom ubuo kpe ma tabu ahuhu am sabhetea. ¹⁷ Kpu oloko ka, Paileti asabheteni emene Juu bu onye ikoli kpom udhiebhe ogwum. ¹⁸ Mu emeneya uchiobhe ikpu, "Gbuniye udukem mu isabhetebniye Balabasi!" ¹⁹ Balabasi bu nye ukpeshibhe ikoli li unupeishi li ugbu madu. ²⁰ Mu Paileti ukpomikejiebhe ekpo udo, ubu echiche ya li usabhete Jizos. ²¹ Buwhuto mu chiebhe ikpu, "Kpogboa li olu obe, kpogidea li olu obe." ²² Mu ukaniebhe augbuwe bito, "Ielado, nde iyebhiyo unukem mela? ²³ Buwhuto uwhebhe uzhili chikebhe ikpu, mu ukakedhibhe bu ukpogideabhe li olu obe. ²⁴ Ulibhe ume mu Paileti uwhetuo. Mu whetuoli umenibhe iye uwudhigabhe. ²⁵ Mu usabheto nyemu uwudhigabhe ushiebhe li ikoli li ununpuishi li ugbu madu. Mu uneabhe Jizos kpom ujim uwudhigabhe. ²⁷ Ogbo madu bueke, li unyoma obu otobhe ugbaniabhe ezhi uzhili uchizeabhe. ²⁸ Buwhuto uba yosalio ibem uzhiebhe, mu Jizos uko, "Ugbede Jeluselem, ekwaneni me ikwa, kwanini eliyo li umeledheyo. ²⁹ Iyedo nyetuni iyeya zhi ujiabhe kpu akabhe, ³⁰ "Uwokwani zhini emene ezhibhe li olu unwo li uwom obuo unwo li emam enebhe unwo." ³¹ Iyedoni umelebhe otu iyem li auushi shi li usaga, ndeke iye ada li ube ukpokali lebhe la? ³² Udo ukoma, umene iheleme madu ibo, udulakata bhe bu yali bhe adhi ugbu ogbu. ³³ Kpom udhumabhe adhim uwhubhe "Okpokolo-ishi," yabu adhi ukpogideabhe li obe, emene ihelemem onwunye li eka ikega udo li eka ibida. ³⁴ Mu dho, "Ida sabhetenibhe iyedoni umajiebhe iye uzhibhe lumebhe." Mu tabhe enyi-i li ukedhi kapaya. ³⁵ Madegede nusobhe uledhihe kpu emene uchi echi ukpodhiwabhe umu, ukabhe, "Nyem udokpewe udo emene, Nyeya udokpewe dhodhe eliya, ubulebhu ibu Kalaisi Ebilikpabi, nyem ulotuo." ³⁶ Emene kapa uchi ukpodhiwebhe umu, uzebhe mu uneabhe menye udhu uka. ³⁷ Muukabhe, "Ubulebhu ibu nye eze emene Juu dokpewe eliyo?" ³⁸ Uzhiye ubhashibhe li igbu olu ishiya, "Ombo eze emene Juu." ³⁹ Onwunye li emene bhiyom ukposhikatabhe ya li bhe ukpadhiwa umu, mu kania, "Ibuo Kalaisi ya ela? Dokpewe eliyo li ye." ⁴⁰ Buwhuto mu nyemu inenem, ugbobiela, mu uka, "Itune Ebilikpabi otuogwu iyedo ukpebhe yeni u-uji ike la? ⁴¹ Li egede udhukatanie ye li emelme ye. Buwhuto unukem ume iyebhiyo." ⁴² Mu ucho, "Jizos gbewejim li ubhe ikadadhe le ele eze yo." ⁴³ Mu Jizos usala, li egede ma kaniom bu yo, li tam ezhikeshime li ele-eze. ⁴⁴ L'ekelaya ogwu ube ogwule bhisu, mu igelenye uyikatao tutu ogwu ubhe ogwuo nazama-dhi. ⁴⁵ Kpom adhi gbelio, "Alum ugbishiobhe li udho ukpeni li ukema ekpe egwele udolalie adhi ibo. ⁴⁶ Mu Jizos uchio ikpu li uli bu eke, "Idame, me shishi uwame li ekayo." Kpom ukpoma ekpom mu unwuluo. ⁴⁷ Kpom nyemu unyijike emene kapa uchi unyetuo iyem udo, mu upadhiwe Ebilikpabi, mu uko, "Li egede ombu nye umeite." ⁴⁸ Ogbo madu unazhibhe li uledhi iye da, ukadhebhe ekpema bhe udashibhe ikpe. ⁴⁹ Buwhuto zukpulu madu majiabhe, li ogbo unyomam uchituobhela li Galilii, unuzobhe li okpe uto, mu uledhiobhe otu iyem. ⁵⁰ Uzhi unuke udhini Josepu, yawe zhi li emene ishi. Ubu jali madu meite emeite. ⁵¹ Unekem uwhe otu uzuzum ugbabhom li iyem umebhom. ubu nye Alamatiya, ula emene Juu, uzhi li uwudhiga ele eze Ebilikpabi. ⁵² Unukem uzekeshi Paileti, bu uneya uzu Jizos. ⁵³ Mu ubutuo la, mu ubhu bhashikpoa ukannyi-zozo, mu ulishela li ili-ugwu aka liebhe madu. ⁵⁴ Ombu eye umeke iyedo eye ukpeni uzhiho adhi ubido. ⁵⁵ Otu unyomam uchituobhe Jizos li Galilii uchizeabhe li umajoi ili ya li kpu ulitelema. ⁵⁶ Mu uyosaliobhe mu umekebhe ilo egbuma li bhushi ayashi li eli.Li eye ukpeni mu udebhe bhe eli kpu oloko kale.