¹ Li umom ube udhi ogwu utanakani owuo owu zhiho uzedhu, amu uhubhe ugabhishi. ² Emene ishi osoeja li emene ugbabhe ogba zhibhe li uwudhiga uji emebhe mu ugbubhe Jizos, utunibhe emene madegede otugwu. ³ Mu ekensu kpudhuo li ime Judasi, nyem uhubhe Iskaliot, onwunye lime dhi madu li madu ibom. ⁴ Mu Judasi uzekeshio ishi osoeja li emene ishi kapa mu udhodhiebhe kpu edhedhiebhe Jizos. ⁵ Mu ekpema tobhe mu uwhetuobhe unea owayi. ⁶ Mu uwhetuo mu uwudhigao kpu odhukata mu ushishibhe li eka adhi ogbo madu ezhie. ⁷ Mu udhumo eyemu udhi ogwu utanakani owuo owu, amu ugbobhe akpalama li usoeja. ⁸ Kpom ubuo kpe mu Jizos udushio Pita liJoni mu ukanikebhe, "Zeni mu mekeni yeni bhidhi ogwu ugabishi, kpagale mu adhini. ⁹ Mu tekwabhe, nde adhi iwudhiga bu ye adhe mekela? ¹⁰ Mu usabhem "Nyetuni ukpudhuto li ime ula, unuke uduji izogo ozuji yoni buli adhiya.Chilani tutu dhuma udhom okpudhuo ya. ¹¹ Kanieni nye nwe udho, "Nye uzhi ezhi kani yo," Nde ime udho emene ize, adhim me li emene uzhime adhi ogwu ugabishi la? ¹² Utugoshiyoni bu ime udho umekekpobhe li udholu mekeni iye li adhiya." ¹³ Mu ukadhobhe, mu uwejiobhe zukpulu iye kpom ujim ukanie bhje. Mu umeke bhidhi ,ogwu ugabishi. ¹⁴ Kpom ubuya dhimo mu ya ;li emne uzhiya nazhiobhe ezhi. ¹⁵ Mu ukaniebhe, "Obuma iyebu umashime lime li yo li udhi ogwu ugabishi mu me nba dhu uya. ¹⁶ Makaniom bu yo, "Ndeke me dhiedhem udo tutu m-mezo ele eze Ebilikpabi." ¹⁷ Mu Jizos gonio egege mu uba teo mike, mu uko, gonin om mu ikedhini." ¹⁸ Iyedo makaniyo, ndeke mu nwodhem menye ukpulu ushi binim udo tutu ele eze Ebilikpabi uja. ¹⁹ "Mu ugonio utanakani, kpom utetuo mika, mu ukemala, mu uneobhe, mu uko, "Ombu elime amu unebhe li ishi yo, meni om li ugbaweji me." ²⁰ Mu ugonuegeya li eka nete ya kpom udhimabhe bhidhi ela, mu uko, "Egegem bu edhi owo uwu li ubala me, amu uwosalio liishili yo." ²¹ Buwhuto kpom nyeshini enye. Ekanyem edhegbo me uzhikeshi me li adhim li udhi bhidhim. ²² Unwo Madegede akadhe kpom ujim ubeniebhe la. Buwhuto ogolowo ushini nyemu emo mu udhegbobhe. ²³ Mu emene uzhiya ukadhio bhe nnina li ime ogbo ye eme iye zhi kpom. ²⁴ Mu ugwugwo edhi lo li imebhe iye kpani nnina li ime bhe akankpoli bhe. ²⁵ Mu ukaniebhe, "Emene eze Jentali utinibhe emene abhe eme iye uma. ²⁶ Buwhuto ezhie kpe li ime yo, iye obukpe, nyem ukakpolibhe ubu nyem ubo umeledhe, nyemu uzhikalikpo linkpa ubu nye bu nwoboyi. ²⁷ Iyedo nde nyhe kala, nyemu umashio li tabulu sa nyem uzhie kpom nwoboyi la? Ubuo nyem unazhie li tabulu ela? Amashie kpom uzhieya, lime ogboto niezhi kpom nwudho. ²⁸ Buwhuto me li yo azhidhiom li bhele bhele umama me. ²⁹ Mu gbeyoni meni nyeshikeni ele eze, kpom ujim idame ugbeme li nyeshike eleze. ³⁰ Kpaga mu idhini mu inwuni li olu tabulu li ele eze me, mu yo imashini li ekpe egwele mu ikpeni dhi ekkpe ibom Izhileli ikpe. ³¹ Simon, Simon, maji kpom bu ekwensu wudhiga buya nweta yo, kpagale mu yo kpom oka. ³² Buwuhto me kpeni malem yo ukpeni, kpagale mu uwhetu gwe uda. Ubhe iyosalile ozu, kpashi umu nwanayo eli ike." ³³ Pita ukaniela, "Idanwudho me Jikele, ubu ikoli ubuome enwu ubu me liyo. ³⁴ Mu JIzos sala, "Makniyo , Pita, unu ndeke akalo ikwa li tamu ekedhileme ikake buya majema me nye ubu ekele ito." ³⁵ Mu Jizos kaniebhe, "bhem modushieyo asaga me neyoni owayi ekpa iye ewuludhigani li okolo uko, buto ushi iye koshiyoni la ? "Mu usabhe ubuo iye iye." ³⁶ Mu ukaniobhe, "Buwhuto li umom nye nwele owayi ugona, likata ekpa iye uwudhiga. Nye enwe opia ishi edu udhegbo kapaya mu ugotu nnine. ³⁷ Mu kani yo, otu iyem ugbbhe ukpani me ozuta kpombokpai, ugwushiabhe li emeni ebhebheloko. Iyedo iyem ukabhe basa li me emezukpo bukpai. ³⁸ Mu ukabhe, "Idanwudho nyetu! Ombu opia ishi echio ibo uzhili adhim." Mu ukaniebhe ozutamale." ³⁹ Mu Jizos kadheo, kpom umedhio, mu ukdho olu ebhu Olibu, mu ene uzhiya chize bhela. ⁴⁰ Kpom udhumabhe, mu ukaniebhe, "Kpeni kpaga mu igweni uda li ime umama. ⁴¹ Mu usabhetebhe mu ukaze ununu ntiko, mu jishio ukpunuko mu ukpeo ukpeni. ⁴² Mu uko, "Ida ubule bhu bu uche yo, nama egegem li adhi mezhi. Amashie kpom uzhiom, obuo uche me buwhuto uche yo umezo." ⁴³ Mu nyhe uzhi buzo li obioma ulokeshiela, mu ukaite la obu." ⁴⁴ Kpomu uzhio li agbehi, mu ukpo ukpeni ke-ike mu ugwoulo li eliya uzhi utedo kpom ukpo ubala li ele. ⁴⁵ Kpom ubuolo li ukpeni, mu zekeshio emene uzhiya mu nyetuo bu uzhi nyibhe inyina iyedo uzhi li ugbabhe agbezhi. ⁴⁶ Mu tekwabhe, "Iyelado mu inyini inyina la? Buzolini mu ikepeni, mu igweni ukpudhu li umama. ⁴⁷ Kpom ushie li ukadhiya, nyetu, ogbo madu ololebhe, Judasi bhe, onwunye li dhimadu li madu ibom, uduibhe mu ukadhe ukwu eli Jizos mu umoa unu. ⁴⁸ Buwhuto Jizos kania, "Judasi igoni umo unu mu idhedhiwe Unwo Madegede la? ⁴⁹ Kpom emenem uzhibhe liadhim Jizos ushie nyetuobhe iye zhili uda, mu ukabhe, "Idaneudho, agoni opia ishili echi mu luwe ulu la? ⁵⁰ Mu onwunye li imebhe ukebie nwudho nye ishi osoeja ete ikega. ⁵¹ Mu Jizos ko, "Amanule!" Mu kpotuola eka li etaya mu gwola. ⁵² Mu Jizos kanie emene unukanim ujabhe adhi umotua, "Ijani kabu emotuni nye ugbu, opia ishi schi li ikishi ushi yo? Ubhem mezhikeshio yoni li udho ukeni zukpulu eye, imotudhomeni. ⁵³ Buwhuto, ombu ubheyo li ugbakpo igelenyi. ⁵⁴ Kpom umotuobhe la, mu udoletuobhela mu ulawabhe udo nye ishi osoeja. Buwhuto Pilate uchelabhe li uzu li opko uto. ⁵⁵ Kpom ubishebhe echi li echi elezhi, muunazhiebhe ezhi, Pita nazhi li ime ogbo bhe. ⁵⁶ Nwudho unyoma nnine unyetuo la kpu zhi li unwatu echi mu nyea enye mu uko, "Unukem zhikeshi dhihu ma." ⁵⁷ Buwhuto Pita kedhi ikake mu uko, "Ununwe, ma majie ma." ⁵⁸ Unwo ube ntiko ba gamo, udo nwunye wejela mu kania, "Ibudhihu onwunye li imebhe." MuPita ko, "Unuke, mobuom." ⁵⁹ Eka gbaka ogwu ubhe uba shikoshijo nnine, udo unke akanijilema, "Li egede unukem uzhikedhi dhihuma, iyedo ubu nye Galilii." ⁶⁰ Buwhuto mu Pita ko, "Unuke nmajiemu iye izhi l'uka li uka? Li ezhiya kpom uzhie li ukpo ekpoya mu unu lo ikwa. ⁶¹ Kpom uyosalio, mu Idanwudhoa nye pita enye, mu Pita gbewejio unu ekpom Idanwudho kaniela ; bu unu abalo ikwa li tam bu ekedhiwe maleya ikake ekele ito kpom bu ya majiemame. ⁶² Mu pita lo asaga mu kwa ikwa metuali eli. ⁶³ Mu emenem unwijikebhe Jizos ukpadhiwebhe umu mu koabhe iye. ⁶⁴ Mu ugoniebhe iye mu ukpupidhiebhe upi mu ukaniabhe, "Bu amuma! Nde nyemu ukoyo iye la? ⁶⁵ Ukabhe otutu iye li umegide Jizos, utashiabhe ewa. ⁶⁶ Kpom adhi ubolio, mu emene unukani uzugbanibhe, bhe li emene ishi osoeja li emene gbabhe iye. Mu dulabhe eka emene ishi uchi echi. ⁶⁷ Mu ukabhe, "Ubule bhu ibu Kalaisi ya, kaniye." Buwhuto mu ukaniebhe nkaniyoni, ndeke ewheni. ⁶⁸ Me ntikwale yo, ndeke esani. ⁶⁹ Buwhuto gontu li umom kadheze, Unwo Madegede anazhi bu ezhi li eka ugbakpo Ebilikpabi. ⁷⁰ Mu zukpule bhe kabhe, "Ubule kpe ibu Unwo Ebilikpabi la?" Yo ikani bu mo bom." ⁷¹ Mu ukabhe, "Nde iye awudhigani nye ekaibo la? Iyedo yewe anujitule li unya."