¹ Li ukwe oyukwe eye unuzu li ugbakuni -ozu, muujabhe ili, umojiyabhe ilo-egbuma umekobhe. ² Mu uwejobhe bu igwum ugbobishobhe li ili bu agba-dhiemale bhema li ili. ³ Mu ukpudhiobhe li ime, buto uwejie bhe uzu Idanwe udho Jizos. ⁴ Mu ubuo kpo, kpom amjiebhe iye umedhi emedhi li unzhi ya, ekele neten ukoma ibo nuzobhe li ukwu eli bhe, kapabhe bidhi kpom nwokili nwokili. ⁵ Kpom unyomam otugwu uzhibhe li eli mu unyebhe enye li ele, mu ukanuebhe otu unyomam, "Iyeladomu iwudhigani nyezhi ibuduli ogbo emene unwulubhe onwulu la? ⁶ Uzhibhe li adhim, buto etemalebhema li enwu! Gbewejini kpu ukanile yoni li ubhem uzhio li Galilii. ⁷ Ukankpom, "Enebhe bu Unwo Madegede li eka emene bhiyo, aukpogideabhe li obe, li eye ugbuwe bhibo auteli li enwu." ⁸ Mu unyomam ugbewejiobhe uli-ekpoya. ⁹ Mu uyosaliobhe ozu mu kaniebhe dhi madu li o-omadu emene uzhiya li emene gwali. ¹⁰ Meli Magdalini, Joana, Meli ina Jemishi li udo ogbo unyoma uzhikeshebhe - bhe ukanibhe emene uzhiya otu iyem. ¹¹ Buhuto uzhim uzhini emene uzhiyha kpom okpokolo uka, uwhetuobhe iyem unyomam ukabhe. ¹² Amashie kpom uzhieya, Pita ubuzoli mu gbala lili, mu jikpuda mu nyeshie enyeshio enye li ime, mu nyetuo ukanim ubhubhashiebhela li eli. Mu Pita kadhie udhoya, mu ugbedhiho ujio-iye-da. ¹³ Nyetu, madu ibo li imebhe zhibhe li ukadhe li eye-ya ulamu udhinio Emayos, ukani utoya dhuma ugbate ise li udhma Jeluselem. ¹⁴ Uzhili udhodhi bhe zukpulu otu iyem udo. ¹⁵ Mu ubuo kpom bu kpom uzhie li udhodhiya mu jtabhe ajuju, mu Jizos jabhe uzedhu mu ukadhie keshie bhe. ¹⁶ Buto ukpunyobhe ekpelenibhe mu ugwebhe umaji nye ubu. ¹⁷ Mu Jizos kanibhe, "Idhodhienom bu uka iyela kpom ekadhedhienom la? Mu nuzobhe li adhiya upi samalie bhe. ¹⁸ Onwunye li imebhe, udhini Slopas, usala, "Yo neten li Jelusalem ubugbo nye amajie li iyeda li eye itom la? ¹⁹ Mu Jizos kaniebhe, "Olodo uji iye la?" Mu usabhela, Otu iye kpani Jizos nye Nazalet, nye amuma, ugbolo ya bu eke ma ekpopya lii ununu Ebilikpabi li madegede. ²⁰ Li kpu emene ishi osoejka li emenem uchiebhe ye ukpeshiabhe enwu mu ukpogidebhe li obe. ²¹ Buto ye agbe kpom meni ya odokpewe Izhileli. E-eh, ela usogba, om ugbuwe eye ito kpu otu iyem udabhe. ²² Buto ubotu unyoma li ogboye umebhe ma nwodhu enye, kpom uzhebhe ili li echi oyukwe. ²³ Kpom ewejiebhe uzu ya, mu uwejiebhe, ²⁴ ukabhe bu ukpumabhe ekpelenibhe mu uwejiebhe nye uzhi Ebilikpabi, mu ukaniebhe bu uzhi budu. ²⁵ Ubuto ukoma bhe li ye azhi uzhebhe iliya, mu wejiobhe kpom unyomaya kabhe ya. Buto uwejiebhela." Mu Jizos kaniebhe, "Oh ukoma-ishio li uwhedawe iye yo bu nchiko nchiko li uwhetu iyem emene amuma ukabhe! ²⁶ Ubuo iye dhukata bu kalaisi ya bu udhuiuya li ishi otu iyem, mu ukpudhu li ime ebubeya ela? ²⁷ Gontuli Mozhizhi li zukpulu emene amuma, mu Jizos gbasamanie bhe otu iye ukotu yawe li ukpalahu ehwele. ²⁸ Kpom udhumabhe ugbono ula uzhiebhe li uze, mu Jizos umo kabu akadhe ze gba ununu. ²⁹ Buto mu kaniebhe, "Nazhikeshi ye, iyedo ube ila udhuma adhiya, adhi ugbeli dhihuom be egbeli." Kpom ubuto kpe, mu kpudhuo li unazhikeshi bhe. ³⁰ Mu ubuo kpom bu ubem unazhikeshi bhe li udhi bhidhi mu ugonio utanakani, mu uwhokwania mu ukema mu unebhe. ³¹ Mu ekpeleni bhe ukpumalio mu umajiebhela, mu utalio li enye bhe. ³² Mu ukanitabhe, "Azhilu ngbekwakedhili ekpmaye, kpom ugbonidhie ye ekpo li ichakpa, ubem ukpumaniye ukpalahu egwele? ³³ ubuzoliobhe li ezhiya mu uyabhe Jelusalem. Mu uwejiobhe dhimadu li omadu li uwadhi li emene zhikeshibhe bhe. ³⁴ Kpu uzhili ukagbe, Idanweudho etelile li enwu li egede, olokeshile Simon." ³⁵ Mu ubakaniobhe otu iyem li ichakpa li kpu umajibhe bu Jizos uzhiya li ubem ukema utanakani. ³⁶ Kpom ukabhe otu iyem, mu Jizos nuzo li ime ogbobhe mu ukpaniebhe, "Uyodhu zhini yoni." ³⁷ Buto eli hudhibhe ohudhi mu utuobhe otoguu, mu ugbebhe kpom bu awejiabu agbala. ³⁸ Mu Jizos kaniebhe, "Iyela-donmu enweni umekpa eli la? Iyelado mu ajuju uyuluo obuyo la? ³⁹ Nyetuni ekame li ukome, bu ubu mewe. kpotu meni eka mu inyetuni. Iyedo agbala nwe-nwe." ⁴⁰ Uba kpom ekpom, mu utugoshibhe ekaya li ukoya. ⁴¹ Uka whetudhihu bhene li ikshi obu eto, mu nwodhabhe enyhe. Mu Jizos kaniebhe, "Inweni e-iye udhi-edhi la? ⁴² Mu uneabhe ukpa umeshibhe emeshi. ⁴³ Mu goniela mu udhio li ununu-bhe. ⁴⁴ Mu ukaniebhe, "Ombu otu ekpom mop kponie yo li ubem me li yo azhio meni zukpuluiyem ugbabhe l;i li ime oloko Mozhizhi li emene amuma li ukpalahu obu uma emezokpo bu kpai." ⁴⁵ Mu umo mu obubhe gbamalio, kpagamu uwotabhe ukpalahu egwele. ⁴⁶ Mu ukaniebhe, "Ugbabhe kpom, bu Kalaisi bu odhu bu uya au teli li enwu li enwu li eye gbuwe bhito. ⁴⁷ Uyosali li usabheteni bhiyo uzhikalabhe li ewayha li uwali ogbo gontu li Jeluselem. ⁴⁸ Yo ibuni eka ibo otu ityem. ⁴⁹ Nyetuni, mo yigashini yoni bu iyem Idame uwhetuo. Buto nazhinili ulam inwetani ugbakpo buzoli olu." ⁵⁰ Mu Jizos Jizos duloshiebhe tutu dhuma ubono ula Betani. Mu ugbabuzo ekaya olu mu Uwokwaniebhe. ⁵¹ Mu ubuo kpom, kpom uzhie li uwokwanibhe, mu usabheeete bhe mu ubulabhela obioma. ⁵² Kpom ubuo kpe, mu ukpoweniebheela ishi li eli mu uyosaliebhe ozu Jeluselem li obu eto eke. ⁵³ Mu unazikedhiobhe li udho ukpeni, li upadhiwe Ebilikpabi.