¹ L'umom, iye kpatani bhidhi usoshibhe li eja unoshi: Ye amaji kpom bhu bhelebhele yen bhu amajini iye. Umajiye ubuwe bu ishî buto ugwushi umebuzo bu emebuzo. ² Ubule bhu zhi nye gbe kpom bhu yamaji iye amaji, nye ya kamajine ̣kpu udhunilema li umaji. ³ Mubutokpom ubule bhu zhi nye gwushi Ebilikpabi ogwushi, bu nye Ebilikpabi maji. ⁴ Kpomubokpe, iye kpatani udhi bhidhi usoshibhe li eja unoshi: Ye amajini kpom bhu unoshi ubo ịyẹ-ịyẹ li uwamu, mubudhiwhokpom bhu uzhikwa li uwam bu ẹ Ebilikpabi neten. ⁵ Iyedo ubunekpom bhu otumu uwhobhe iye-ukpeni bhu uzhibhem, li eligwe mu bujine li uwam(ubujine egede kpom bhu "iye-ukpeni" utu-ogbo li "idanwhudho" utu-ogbo uzhibhem), ⁶ Mashikpomuzheya, l'iye uzhikwa bu Ẹ Ebilikpabi neten, Ubu ida, amu bhelebhele iye ubuzolebhe l'ima ya, Nyemu ye abe budu l'ishiliya, lijinẹ ō-ọ Nyenweye Jizos Kalaisi, Nyemu bhelebhele iye uzhebhe gonitu li ya, li dhiwhụ gonitu li ya mu ye azhidhiwhọ. ⁷ Kpubujiwholene, umajiyem uzhikpoli bhelebhele madegede. Kamubokpe, é-ẹmene l'ubhe gaga ukpenibhe unoshi, audhibhe bhidhiya zekwa bhụ bu iye ososhinibhe unoshi li eja. L'unazhiya aime-uwabhe ụdhụgbọli ịyẹdọ ukwale akwali-i. ⁸ Butukpom ùbó bhidhi ódóyawe ye ununu Ebilikpabi. Uyọni ukame li a-ye ubulekpom bhu adheni, mubuwhone bhu umạnụ kawho li a-ye bune kpom bhu adhiwhọni-edhii. ⁹ Buwhuto, tukpa eli kpu emele mu eli-ụwhėdị yo ugwe ume mu nye akwalidho-akwali uwhotu li udada. ¹⁰ Iyedo, ukabulekpom bhu onwunye uweji yo, zhikpom nye umajidho-amajidho, kpu izhile li udhi bhidhi li udho unoshi. Ndeke ime-uwa ya amu akwalikpodho edhimawhọ iye usoshinebhe unoshi li eja li ụgwewhọ uwoli-owoli ē la? ¹¹ Kpomubokpe, gonitu li umaji-amaji iye unoshi bu li egede, nyemu akwalidho-akwali l'uwhetuu, nwana yo-nyemu Kalaisi unwulo l'ishi ya atadhulẹ ewe. ¹² Kpomubokpe, eke imeyeshi le emenenwana yo mu imedhuma ime-uwabhe amu akwaligbodho-akwali, imeshie ya bu Kalaisi. ¹³ Kpomubokpe, ubule bhu ũji bhidhi bhu eme bu nwaname mũ udada, eke medhiedhe udoo, kpu emele mu ngwe ụdoshi nwaname li udada.