¹ L'umom iye kpatani otu ukamu ibhashoni li ubhabhe yọ: "Ubu iye manu-amanu kpom bhu ukoma bhu okpoto unyoma eka." ² Mubuwhoto l'ishili uwama ologa li iye bhala ewhele, uduke unwetu ununwe ya, a-ununwe unwetu ẹbhọ ya. ³ Ẹbhọ ume iye udhuna li nwenya ya li unakata, li eka neteniya a-ununwe umenidhiwhu izha kpeye. ⁴ Uboo ununwe unwetu ụtụka li bụdụ eli ya, ẹbhọ unwe utuka. Li eka neteniya, ebho unwedhiwhone utuka li budu eliya, ununwe ụbụ nyenwe. ⁵ Ekwatani eliyo gama bhu iwhedhi-ewhedhi dhuma ubhe ibheteni unu. Meni kpom l'ishili udhushi eliyo li ukpe-ekpeni. Ya bha gamale a-nikatajini, kpu emele mu ekpesu ugwe yọni umama gonitu li ugwe umoji eli yoni ẹka. ⁶ Mubuwhutokpom, mákani yon otu iyem kpom iye yo ekpebetuni li umeme, ubọ kpọm oloko. ⁷ Ubu umashime kpom bhu bhelebhele madegede bhu zhibhe kpọm me-zho. Mubuwhotokpom bhu nwunye-nwunye nwe ukeshi ya, aubuzoli li eka Ebilikpabi, onwunye unwe ũuji ukeshi, ãudonwunye unwejine udo uji. ⁸ Li emenemu emene ugwẹbhe ebhȯ mubu unuwe li emene ununwe-ukudhọ maka kpom meni uka uma bhu unazhitụbhe kpeye, kpom me mezho. ⁹ Ubujine bhu umojikedhobhe eli bhee, utbhe ununwe mubu ubhobhe ebho. Iyedoni umanu bhu bhe bhu unwebhe ununwe mubu ẹbhọ ka amu ọdụnwụlọbhe li ogwụ-inwe ya. ¹⁰ L'umom mene emene unwebhe ununwe mubu unwebhe ebho olokom, ubọ ne mene, buwhuto Nyenweye une, ununwe ele-ele li ẹbhọ ya ¹¹ (ubujilene bhu ulewho ele li ebho ya, unazhi li ugwe ụbhọ ẹbhọ, ọbujẹnẹ kpẹyẹ, ulakeshi izhaa ọzu), lijine ebho eche nwėniya èchí. ¹² Mubuwhoto li emene-ugwaliwho, makani bhe, - me maka ubo Nyenweye wo - kpom ubule bhu zhi nye nwe ununwe ézhè l'ime uwhetu, ubule bhu umashi ụnụnweya bhu ubekesha, nye ya eche la echi. ¹³ Ubule bu ununwe unwe ebho ézhè l'ime uwhetuu, ubule bhu umashi ebho ya l'ubekesha, ununwe ya ele li ebho ya. ¹⁴ Iyedo ebhomu ezhe l'ime uwhetu ya uzhiwho ise l'ishili nwenya, mubudhiwhokpom bhu unuwemu ezhe l'ime uwhetu ya uzhiwho ise l'ishili nyemu ya. ubulebhubokpe, umeledhe yo ezhibhe bu kpom iye dhụlụ-ȯdhụlụ, buwhuto l'egede bhe uzhiwhobhe isè. ¹⁵ Mubuwhotokpom, ubule bhu nyemu ezhe l'uwhetu ya ule-ele, sabheta mu ukazetu. Li unazhi uzhi kpẹyẹ, nyeya mubu ụkoma mubu unyoma edhi-ọwo unoje la. Ebilikpabi uwhugbede yeni bhu abedhini li uyodhu. ¹⁶ Iyedo imaji bu kpa la, ununwe, ubulebhu yo bhu edokpewe izhiyo? Mubune, imaji bu kpa la, unuke, ubule bhu yo bhu ẹdokpewẹ nweniyo? ¹⁷ Kpubujiwhone, kpomu Nyenweye unemawho, nyenye li uke aaya, nyenye ukadhe ìze zhi kpụ Ebilikpabi uwhu le ma. Om bu kpu makale bhu zhi li bhelebhele chochi. ¹⁸ Uzhi nyẹ uwhakpo ùmakpai mu ubha whetu who la? Nye ya uwudhiga ume zhe bhu uka wha ùma. Uzhi nye aka wha uma mu bha whetuwho la? Nye ya ewhe kpom bhu uwhabhe ya uma. ¹⁹ Iyẹdọ ùwhạ ụma li ugwe ụwha ụma ubõ ịyẹ-ịyẹ. Iyẹ ka bu ukpete li oloko Ebilikpabi. ²⁰ Nyenye unazhitu li unazhimu yawẹ uzho mu Ebilikpabi ubha whọla li uwhetu. ²¹ Ịbu nye-ulu li ubhen Ebilikpabi uwhọ yo la? Emekpashi eli yo. Ubule bhu inwe uwedhini unwe eli yo, me mu inwe eli yo. ²² Iyedo nyenye uwhulebhe l'ime Nyenweye li ubhe ubu nye-ulu, nye ya bu nye eli-uwedhi Nyenweye, li ekaneteniya, nyemu unwe eli uwedhi mu ubha whọbhela l'ime Nyenweye, nye ya bu nye-ulu Kalaisi. ²³ Ugowebhe yoni li uwayi, kpomubokpe ebuneni madegede ulu. ²⁴ Emenenwana, li unazhi unuzhi nye ya uzhile li ubhem uwhọbhelela, nye ya unazhitu l'ime ... ²⁵ L'umom li ịyẹ basali unyoma-akamajebhe-ukoma, me nwemu iye ukaka buzole l'eka Nyenweye. Mubuwhoto, maka bu echiche me kpomu nye utukwashibhe obu gonitu li umanishi Nyenweye. ²⁶ Kpomubọkpe, megbe kpom gonitu kpu unazhi ugwele umanu-amanu, ùmànù-ámánú bhu ukoma ugwudhi li unazhi uzhi. ²⁷ Ununwe li yo zhini la? Ewudhiga uchia-echi. Ubujilene bhu ikato ununwe, ewudhiga utu ununwe. ²⁸ Mubuwhoto, ubule bhu itu ununwe, imẽ umeyeshii, ubule bhu unyoma amaje okoma bhu bhowho ebho, yawe umedhiwhone umeyeshii. Bụwhụtọ kpom emenemu uzhebhe li bube izhi li nwenyi unwebhe otụtụ umekpeli li uwam, a me mowudhiga meni gbanatuni. ²⁹ Mubuwhotokpom, emenenwana, ombu iye maka: ubhe zhi ikishi. Gonitu l'umom kaze l'ununu, emene nwebhe unuwe ụbebhe zeka bhu unwebhe ununwe. ³⁰ Emene ukwabhe ikwa ụmebhe zeka bhu ukwabhe ikwa, ã-emene utobhe obu ụmebhe zeka bhu utobhe obu, ã-emene ugutubhe iye umebhe zeka bhu unwebhe ịyè-ịyè, ³¹ a-emene udhibhe ibala uwam ugwebhe ume zeka bhu ozunikpolebhe. Iyedoni uwam li unazhim awejelani ogwùlù bu ogwụlụ. ³² Mowhudhiga meni nweni eliyo li agbezhi. Nyemu ọto ununwe ukadhigbo bu uka iye basali Nyenweye, kpu emelẹ mu obu utó Nyenweye li ụnu. ³³ Mubujone kpom bhu nyemu uto ununwe ugba bu agbezhi iye uwam, kpu emele mu obu uto nwenya li ụnu - ³⁴ budu ya unwe ukeke. Ununwemu obho ebhoo mu bụne ụnyoma-amaje-ukoma ugba bu agbezhi iye emeni Nyenweye, kpu ezhile ise li budu ya li uwa ya. Mubujene kpom bhu ununwemu uzho li ebho ugba bu agbezhi iye uwam, kpu emele mu obu uto izha li ụnu. ³⁵ Makanẹ kpom bu li umanu amanu yo, ubõ li udoya yọni ọzụ. Makom bu ịyẹ dhukata odhukata, kpu emele mu izhinimani Nyenweye li ugwu ụnwé ụkẹkè. ³⁶ Ubule bhu zhi nye gbe kpọm bhu unazhi bhu ya bhete ugbedem-akamaje-ukoma uka nhu atu otu bhu utugoshedhe odhi-eso - ubule bhu ugbedeya zhi l'ukalagadhiwho mubunjine kpọm bhu ugwewholebhe ututa umanodhè - yá we utuwha. Ya we mẽ umeyeshii. Ụtụtạbhe. ³⁷ Ubujine bhu yawe bhu unuzoke kpu ukpebhele li obu ya, ubo li unushi ọnùshì, buwhuto li umojike eli eka mu ukpebetu li obu ya bhu ugbede ya bhu unazhigedhe, ya we 'meke jọka. ³⁸ Kpọmbokpe, nyẹmu uto ugbede ya umeka jọka, yabu kpu nyemu uto ukpebe li ugwegedhe utu ununwe ya umewho a-ụka ụma. ³⁹ Ununwe unwe uwedhini li usabhete izha kpom izha uzhiwhoto budu. Mubuwhoto ubule bhu izha bhu onwulumale, ya we unwe uwedhini li uletu ebho umashilema l'ime Nyenweye neten. ⁴⁰ Mashinekpombokpeye, megbe kpom meni akana bu unwe obu eto ubule bhu ugwudhitu li unazhiya. Mamaji kpom meni me nwedhiwhu Uwaegwele Ebilikpabi