¹ Ye anweta uzhi kpom bhu ewhele bhu zhi l'ime ogbo yọ, uji ewhele emene uwam usobhene-oso: Āubukpom bhu ūduke bhu unawe nweni-idā. ² Izhini li ubuke ishi! kamubokpe ibha zhini bọ li agbezhi, kpu emele mu inamani nyemu ume iyẹ yạ l'ime ogbo yọ ē la? ³ Ubune kpomu ewejemeni enye l'ime ogbo yọ, uwạ me zhi l'ime yọ. Ma dashimalem nyemu umọ iye ya idakpe zeka kpom bhu mẹzhi li adhiya. ⁴ Eke yọni izugbanileni li ewa Nyenweye Jizos li jine kpomu uwame uzho l'ime yọ, li ugbakpo Nyenweye Jizos. ⁵ Kwateni uduke ys li eka ekpesu li ụtạshị ugbo ọkpẹli ya, kpu emele mu uwa ya unweta udokpewe li eye ikpe Nyenweye. ⁶ Ude-ide yọ umanọ-amanuu. Imajeni kpom bhu awụwo nwotuko bhu ọwhuwemale whulu ukpo bhidhi ē la? ⁷ Sama yọni ùkanì awuwo li eli kpu emele mu ibuni iye-uwu-umekewe bhidhi, aka gwashebhe awuwo, amu yoni iboni l'egede. Iyedo Kalaisi zhikpomu ugagamu ụgagbọbhe li shi yen, osogbomalebhema li eja. ⁸ Kpombokpe, adhiwhoni ogwu ya, li ugwe ugonu awuwo ukanim aubu awuwo agwa bhiyo li ụye. Kamu-obokpe, adhiwhoni ogwu ya bhidhi akagwashebhe awuwo aubu ugwe-utuga-uka lị ishuka. ⁹ Ma bhashi l'ime ukpa la whun mabhane yọni kpom meni emene ewhole li yo ekpakatani ukpa. ¹⁰ Li ewheka makom bò emene ewhele uzhitubhe li uwam wo, mubune emene ukaluwome, mubune emene egenege, mubune emene kperibhe-unoshi wo, iyedo mu emene zhikpom yo ibha gwewhoni umekata ịyẹ ebuzolimawhoni bu li uwom. ¹¹ Buwhuto l'umom ma bhani yoni kpom meni ekpakesheni nye-nye ubuwhuto kpom bhu awhuni nwana l'ime Kalaisi buwhuto ubedhi budu ewhele, mubu nye ka bhu ukali uwo ya, mubune nye kpeni unoshi, mubune nye nweunu, mubune nye-mẹnyẹ, mubune nye-egenege. Nye zhi kpeye li yọ edhikatanine bhidhi. ¹² Nde kpu me zheshishile eli me ukpe emene ọbọbhe emene chochi ikpe la? kamabokpe, ubo yọ ekpeni emene uzhibhe l'ime chochi ikpe ẹ la? ¹³ Mu buwhutọ, Ebilikpabi ukpe emene uzhibhẹ li asaga ikpe. "Namani nyebhiyọ ya l'ime ogbo yọ."