¹ Li me, emenenwana, mọ kpọnẹmụ yọni ekpo kpom emene uzhibhe l'ime imọọ, kamubokpo, mo kponi yọ kpom emene uzhibhe li okpeli upata, kpom umeledhe nwọtụkọ li Kalaisi. ² Mene yon mini-ẹma, ubọọ bhidhi-utadhi, iyedo ika jikelenelanii; mashine l'umom ika jikeleni nē. ³ Iyẹdo, izhidhiwhuton li ọkpẹli-upata. Kpomu ụsọta-ọsọta li ukodhita-ógbó uzhiọ l'ime ogbo yọ, ibeniya 'bo kpom emene uzhibhe li okpeli-upata ē la lijine imeniya bọọ kpu ụtọ-ọtụ madegede kalẹ ē la.? ⁴ L'eke ōọnwunye zhi li uka "Mẹ chịze bu Pọlụ," audo nwaṅe ka "Me chize bu Apọlosi," iboniya bọ emene zhibhe li ọkpẹli ē la? ⁵ Apọlos bu ṅina la? Pọlu bu ṅina la? Emene-uzhimu iwhetoni gonitu li uzhibhe, zhi kpom Nyenweye unedhio bhe ugbolo nyenye li āạya. ⁶ Me makpashi-akpashi mu Ạpọlọsi useshi mini, mu Ebilikpabi umeo mu iyẹ ụzọdhụo. ⁷ Kpomubokpe, nye kpashi-akpashi li nye seshi mini ubobhe íyẹ-íyẹ. Buwhuto Ebilikpabi ume mu ịyẹ ụzhodhuo. ⁸ L'umom nye kpashi-akpashi li nye seshi mini bubhe ṅine, nwụnye nwụnye anatu bu uwhugó gonitu kpu eka ugbolo ya uzhilẹ. ⁹ Iyedọ ye abu emene amekeshi Ebilikpabi ugbolo. Ibuni ịkạ Ebilikpabi, ụdhó Ebilikpabi. ¹⁰ Gonitu li umanu-ishi Ebilikpabi une mẹ kpom nye-oka umaji unu udhọ, mo wulem udhọ mu ud'onwunye onubuzowele ma. Buwhutokpom nyezhina utukpa eli li umaji kpu ûnụle aaya. ¹¹ Iyedo uzedhe udonwunye owu udho zhibha isee li amu unwumabhe-owumam, āubụ, Jizos Kalaisi. ¹² L'umom nye gonule uwayi-ode, uwayi-usa, igwu-gbuaga, ushi, ewe-kpokpo, mubune ikaka-i kpu mu unuwele udo li uwul'udho ya, ¹³ eka-ugbolo ya ọlọ bu uwe. Iyedo eye ya olowea bu uwe. ọlodhinhu bu uwe gonitu li ẹchi. Echị ya odokwa bu umanu-amanu eka-ugbolo nyezhina umele. ¹⁴ Nye ubgoloya atadho li echi, enweta bu uwhu-ụgọ; ¹⁵ Buwhuto, nye ugbolo ya udukpolikpole li echi, nye ya akadhe bu ẹk'ewe, mu buwhoto kpom, nye ya enweta bu udokpewe zhikpomu nye ugbakpeli li ẹchị . ¹⁶ Imajini kpom bu ibuni úlú-ukpeni Ebilikpabi li jine kpom bhu Uw'egwele Ebilikpabi bhu bê l'ime yọ la? ¹⁷ Nye utashile úlú-ukpeni Ebilikpabi, a Ebilikpabi utashi nye ya. Iyedo úlú-ukpeni Ebilikpabi uzhi egwele, ya bu kpu yọni izhidhiwhuleni. ¹⁸ Ezhiẹ nye 'nagbo eliya. Ubule bhu zhi l'ime yo nye gbe kpom b'amaji eyo uwam, nye ya umewẹ ya "nye-ishi" muzhi kpu umajile eyo. ¹⁹ Iyedo umaji eyo uwam ubuni Ebilikpabi uda-ishi. Iyedo abhamalebhema "Umotu emene eke-umajiye li egenege bhe." ²⁰ Mu bhagbajebhe "Nyenweye maji kpom bhu uzhizhi-ezhizhi emene eke-umajiye utadhu ewe." ²¹ Kpomubokpe, ōnwunye-nwunye edewe madegede ide. Bhelebhele iye bu a yoni, ²² ubuwho Pọlu o, mu buwhone Ạpolos, mu bune Sepasi, mu bụne uwam, mubune budu, mu bune ẹnwu, mu bune iye zhi-ezhi l'ụmom, mu bune iye zhi l'ụnụnụ, bhelebhele iye bu a yoni, ²³ yo jine ibuni āKalaisi, Kalaisi bujine a Ebikpalabi.