¹ L'umom, whudiga ume mu amajini,emene nwana me, uzh'umam mezhikaloshiyoni, āmu yo inatoni mu inuzokoni l'imaya, mu inwetadhiwhoni ugawe. ² Mu inwhetadhiwhoni ugawe, ubule bhu emojikeshini ulekpom me zhishoyoni, ugawhutọ bhu iwhetu li abha. ³ Mezhikaloshiyon kpom iye zhikakpo li mkpa amu mewheto, kpom Kalais unwulu l'ishi umeyeshiye zhi kpom ukpalawhu egwele ụka-ọ. ⁴ Kpom bhu ulabhe eli, mu utemabhela li eye gbuwe bhitọ kpu ukpawhe egwele ukale. ⁵ Kalaisi ulopiwe kepasi lị dhi madegede li madegedhe ibhọ; ⁶ mu ulopiwedhiwho ūnu madegede li ugwu madegede isee l'ubeneten. Otutubhe uzhibhe budu, otutu enyilebhe inyina. ⁷ Mulopiwō Jemishi, mu ọlopiwō bhelebhele emene uzhiya. ⁸ L'ukpozu bhelebhele ulopiwe me, zhikpomu unwo lo li-uwo ⁹ Iyedo, mobu nye uyakalikpobhe l'ele li emene uzhiya. Mewheshemune uwhu nyuzhu iyedoni memetashi chochi Ebilikpabi. ¹⁰ Mubuto, gonutu li omanu-ishi Ebilikpabi mobu-o iyem mob'om, m'ubudhiho bhu omanu ishi Ebilikpabi l'ime utadho ewe. Iy'ōbukpe, mekeshike kakpo bhelebhele bhe. Mashinekpe, ubọ me meme, iye me bu oman'ishi Ebilikpabi. ¹¹ Kpomubokpe, mububhe, mubujine me, ubukpom, bhu ye bha zhikala uzhi mu yọni iwhetoni. ¹² L'umom, ubukpom bhu ukalashibhe kpom bhu Kalais bhu ule li enwu, iyela udo mu emene l'ime yo ukabhe bhu ule-li-ẹnwu bhu-uzhẹẹ la? ¹³ Ubule kpom bhu ule-eli-ẹnwu zhẹẹ, ubune bhu bu Kalaisi utemabhelane li enwu; ¹⁴ ubujine bhu utemabhe Kalaisi l'enwu, uzhu ye utadhu ewe, uwhetu yọ utadhudhiwhu ewe. ¹⁵ Ya ubhudhihu kpom, bhu ye abu emene eka-ebe oyika basali Ebilikpabi, iyedoni, ye anuzo l'uka kpom bhu Ebilikpabi utema Kalaisi l'enwu. Mubutọkpom bhu utemala, li aubulekpom l'egede bhu utemabhe emene unwulubhe-onwulu l'enwu. ¹⁶ Ubule kpom bhu utemabhe emene 'nwulubhe. Onwulu l'enwu etemaa, uka temadhiwhobhene Kalaisi. ¹⁷ Ubulekpom bhu ka temabhe Kalaisi, uwhetu yo utadhu ewe, izhikedhiwhuni l'ime umeyeshi yo. ¹⁸ Ubulekpe, emenemu unyebhe inyina l'ime Kalaisi atadhukpodhiwhulebhe ewe. ¹⁹ Ubulekpom bhu anwekwawhutoni ubheshi-obu l'ime Kalaisi bu li budumu uwam neten, li bhelebhele emene, ugbanezhiye ukalikpobhe. ²⁰ Mubuto, l'umom, etemabhe Kalaisi l'enwu kpomu ukpulushi-unuzhu l'emene unyibhe inyina. ²¹ Kpomu enwu jọọ gonutu li onwunye, gonutudhiwho li onwunye mu uteli l'enwu ujadhiwhọọ. ²² Kpomubokpom, bhu l'ime Adamụ bhelebhele madegede unwulubhe-onwulu, yabu kpu uzhidhiwhule kpom bhu l'ime Kalaisi emebhe bu bhelebhele madegede muzhibhe ibudu. ²³ Mubuto, nyezhina li usolo ya: Kalaisi, nyebu ukpulushi-unuzu, li jine āumebhe emene zhibhe li Kalaisi muzhebhe ibudu l'ubhe yạwẹ ejọọ. ²⁴ Aa eke-ugwulu udhuma, oge yawe ogoni ele-eze obioma mu Ida, Ebilikpabi, oge yawe atashikpo bhelebhele ụchechi, bhelebhele ụtụ-uka, li ugbakpo. ²⁵ Iyedoni, yawe ezhi buli uchechi tutu ulugbokpo emene ẹgba ya li uzobhe uko l'ishi. ²⁶ Nye egba ukpozụ utashimawhobhe bu ẹnwu ²⁷ Iyedo, "Yawe ishikpole bhelebhele iye l'ukpudhu uko ya." Mubuwhuto kpom, kpomu uka bhu "yawe Eshishikpole bhelebhele iye," udo enye kpom bhu om ugwushikata nyemu ushishikpo bhelebhele iye l'ukpudhu ya. ²⁸ Eke bhelebhele iye uzhikpowhole l'ukpudhu ya, āa ugonubhe unwe yawe āa ushishibhe l'ukpudhu nyemu ushishikpo bhelebhele iye l'ukpudhu ya, kpu emele mu Ebilikpabi ubu bhelebhele li bhelebhelem. ²⁹ Mubune li udo-eka, ndẹ iye emene ya emebhe emene mu uwhobhe mini l'unuzoseni emene unwulubhe onwulu la? ubulekpom bhu emene nwulubhe-onwulu bhu utemabhebhe etemaṅine ṅine iye la udo mu uwhobhe mini l'ishilibhe la? ³⁰ Iyela udo ubulebhukpe mu ye azhio l'umekpeli zukpulu ubhe la? ³¹ Monwulu-onwulu bu bhelebhele eye! Om abha-eka kpumu ut'ide me l'ime yo āamenwe l'ime Kalaisi Jizoz Nyenweye. ³² Ibala me bu iyela, li kpu madegede ugwutule iyẹ, ubule bhu molushi eke-ono ulu li Epesos, ubule bhu utemabhe emene nwulebhe-onwulu li enwa ẹ la? "ngwa m'adhini m'anwuni, sele āanwuluni." ³³ Anagbo bhe yoni, "Ukpakata-bhiyo utashi bu agwa-uma." ³⁴ Ka nwe ugbe-egbe li eliyo. Be budu-umeyite. Ekazhe l'unu l'umekhedhi umeyeshi. Iyedoni eemene l'imeyo uzhibhe l'ishi li iye basali Ebilikpabi. Maka om ume yọni iwene. ³⁵ Mubuto, ōọnwunye ete bu kpom, "Ndekpu utemalebhe emene-nwululebhe-onwulu la, nde uji okp'eli bhe ejawebhe la?" ³⁶ Yo nye-ịshị! iye yo ikpashi l'ele unw'ike l'umeloshi li ugwe unwulu-onwuluụ. ³⁷ Iye yo ikpashi uboo uwhulu eli iyemu emeloshi who emeloshim, ubuto bu ịkpịlị iye. Unwike l'ụbụ uka, mubume udiji iye. ³⁸ Ebilikpabi ene a bu ọkpeli umashilema, ukpulushi ụbụwhutọ enwe bu ọkpeli ya. ³⁹ Bhelebhele eli ụbobhe ūujii. Iyobukpe, ọọkpeli ụbu ā-amadegede, audọ ọkpeli bu a-ọnọ, aụdọ okpeli ubu ā-unu, aụdọ bu ā-ụkpa ⁴⁰ Uzhibhẹ iyẹ bụbhe ịye-obioma li iye bụbhe iye uwa-adhim. butukpom igili iyẹ ọbioma bu ụdọ uji, āaigili iye uwa-adhim ubu ụdọ uji. ⁴¹ Uzhi igili ubu aelanwu, āụdọ igili ubu āadigwe, āụdọ igili ubu akpudhede. Iyedoni, ōọkpudhede uzhi ise l'adhi ụdọ ọkpudhede uzhi gonuti li igili ya. ⁴² Yabu kpu uteli li enwu emene-nwulubhe-onwulu uzhile. Iye ukpashibhe-akpashi ubu-iye utadhu-atadhu, āiyemu ụlowewhobe-ọlowe utadhodhe-atadhuu. ⁴³ Ukpashiabhe bu li unyepẹ; utemawhoabhe bu li igili. Ukpashiabhe bu li uyạ; utemawhoabhe bu li ugbakpo. ⁴⁴ Ukpashiabhe ụbụ okpeli-upata; utemawhoabhe bu li unazhi iye ewejebhe li enyeẹ. ⁴⁵ Kpọmu ụbudhiwhu kpẹ, a bhamalebhe ma, "Mu Adamu ukoma-unuzum buwho uwazhibudu." Mu Adamu mu ugbowe-ogbowem ubuwho uwa-une-budu. ⁴⁶ Butokpom, amu enyetọbhe l'enye ujaá l'unuzu, āuja l'uzu bu aokpeli-upata, muụ amu enyetọbhe li enyem uhba jawho. ⁴⁷ Nye unuzum bu nye uwa-adhim, ukpuwabhe bu upata. Nyemu ugbuwe bhibom ubuzoli bu l'ọbioma. ⁴⁸ Kpomu nyemu ukpuwebhe upata uzho, ya bu kpu emenemu ukpubhe li upata ụzhi lebhe, lidhiwhu, kpomu nyemu ujayọ li obioma uzhio, ya bu kpu emenemu ubuzolebhe li obioma uzhilebhe. ⁴⁹ L'umom, kpom yeni ayodhigan unwulu nye upatam, yabu kpu ayojidhiwhuleni obioma uzhilebhe. ⁵⁰ L'umom, ombu iye maka, umunwana me, kpombhu okpeli-upata li ubala unwike l'ube l'eleze Ebilikpabi. Ubone kpom bhu iye ụtadhu-atadhụ bhu ebekeshi bu iye atadho-atadhụụ. ⁵¹ Nyetu! Mokuni yoni bu iye woli-owoli: Bhelebhele yeni eke anyikponi inyi naa, mubuto, bhelebhele yeni agbamawoni bu agbamanwo. ⁵² Agbamawhobhe yeni bu l'ubhe neten, li udhabe ekpeni neten, li a ekpo ọdu ụkpọzu ya kpowhutọne. Iyedo, odu ya ókpọ bu ọkpọ, āa utemabhe emene unweule-onwulu l'ugwe-utadhu-atadhu, aa ugbanwobhe yeni. ⁵³ Iyedo, okpeli utadhum ọyọtụ bu iye atadho-atadhuu, āa okpeli-upatam uyota ugwe-unwu-lu-onwulu. ⁵⁴ Eke okpeli utadhum uyotumawhole ugwe-utadhu-atadhu, mu ọkpeli ẹnwum uyotumawhọle ugwẹ-unwula-onwulu, l'eke ya, aa ekpo ya uja amu ubha kpom " Edhegalẹbhẹ enwuli umegbo-emegbo." ⁵⁵ "Enwu, nde la umegbo-emegbo yo la? Enwu, nde iye igbadhiwe la?" ⁵⁶ Iye enwu ugbadhiwe bu umeyeshi, ugbakpo umeyeshi bu oloko. ⁵⁷ Ukela uzhini Ebilikpabi, nyemu uneye umegbo gonutu li Nyenweye Jizoz Kalaisi! ⁵⁸ Kpomu bokpe, emene-nwanamogwu-ogwushi, nuzoshinike l'ugwe uzhigi-ezhigi. Zhimaadhini li ime ugbolo Nyenweye, iyedoni imajini kpom bhu ugbolo yo l'ime Nyenweye utadhọ ewee.