¹ L'umom, iye balasi unabgede iye-ushikejewe emene egwe Ebilikpabi eka: kpomu makano, emene chochi Galasha bhu umebhe, ya bu kpu yoni emedhuwhule ni. ² Li eye-unuzhu l'ugbakunozu, nyezhina ebhe bu iye li ugbonu kpu eka ya'zhule. Meni kpeye kp'emele njale mu igwẹni ugbadhigagba iye. ³ Ndumale, emene yoni ilotuleni, menebhe bu ukpalawhu aka-emenebhẹ ubhule, āndushibhe l'ulawe iye unene yoni Jelusalẹm. ⁴ Ubule bhu udhukata bhu mezedhiwhu, bheé lime azewho bu uuze ⁵ Mabadhu bu abadhu anweji yoni li angalẹ Masidona. Iyedo ma galaga bu Masidona. ⁶ Ubuto, manazhike yoni bu iyela lila, ubutojine, ā ma nazhi tutu okidhika gwulukpo, kpemele mu yoni ishikejimeni eka l'igazeme, adhi-adhi makazhewhutọ. ⁷ Iyedoni, uboo umashime l'ubadhu gbowhuto abadhu l'uweji yoni. Iyedo mebheshi obu meni matashi bu ubhe nwotukó l'unazhikeshi yọni, ubule bhu obu umashi Nyenweye. ⁸ Mubutokpom, manazhi bu li Episọs tutu udhuma ogwu pentikọsi. ⁹ Iyedo ogwumanilèbhẹ me aakwu, mu ubutukpom bhu emene ẹgba utubhe ogbo. ¹⁰ L'umom, eke Timoti jale, ewheni bhu unwe otogwu l'unazhikeshiyoni, ya we zhilume ugbolo Nyenweye kpom mezho lume. ¹¹ Ewheni bhu onwunye-nwunye bhu nyedawa-ele. Shikejiani eka m'ukazhe l'uyodhu, kp'emele m'uja adhim mezhọ. ¹² L'umom l'iye ubasali nwanayeni-aukoma Apolos, majashia-ike kpomu bhu'bha weji yoni enye, ya li emene-nwana yeni. Mubunekpom bhu umashe ya ṇine-ṇine l'uja l'umomuu. Kpu-kpubuto, eja bu l'ubhe ulukatale. ¹³ Nyeshikeni enye, nuzoshinike l'uwetu, meni kpomu ukoma, keshinike. ¹⁴ Bhelebhele iye imeleni, meni li ugwushi. ¹⁵ Imajini emene-udho Stepanas, kpom bhu ubu bhe ukpulu-ushi unuzu ulo li Achaya, li jine kpom bhu bhe ulowebhe elibhe li unyeshike emene egwele Ebilikpabi enye. L'umom maja yọni, emene-nwaname, ¹⁶ yaweni eliyo ele l'adhi-emene zhibhe kpeye zhibhe, li jine nyenye ushiwhutọ eka l'ugbolo ya, m'umekeshe ye ugbolo ¹⁷ Moto-obu l'ujeja Stepanas, Potunatos, li Akayikos. Bhe umebiewho bhe kpomuyọni ezheni l'adhiyaa. ¹⁸ Iyedoni, bhe temabhe uwa me li uwa yọni. Kpomu bọkpe, gbushini emene uzhibhe kpe uji. ¹⁹ Otu chochi uzhibhe li Eshiya utekpobhe yọni abidhi. Akwila li Pilisila utebhe yoni abidhi li Nyenweye, bhe li emene chochi mu kpebhe li udhobhe. ²⁰ Bhelebhele emene-nwana yeni utekpobhe yọni abidhi. Tetani abidhi li uwhotuta eli'zhi Egwele. ²¹ Me, Polu, mabha iyem l'ekame. ²² Ubule bhu onwunye ugwushe Nyewe-ogwushi, ogwo-ọwọ uzhini nye ya. Nyenweye, ja! ²³ Umanu-ishi Nyenweye Jizos uzhini yọni. ²⁴ Ugwushi me uzhini bhelebhele yọni l'ime Kalais Jizos.