¹ Abhi ọni Omyi Oke ọ ke rhọ maghyiẹ oni ẹnwu ozishila, aleghyie kwu o li tọmhi-tọmhi elemhi ukhyikhyi ọkwulọkwu ogwho. ² Mhi ke mẹ eni eghyiukọ oshila ni e nu Ishinẹgba mugha, a rhi irharharhu ni ọgbọgbọgbọ. ³ Aghyiukọ ọvhese ọ ke bhale, ọ nwu atasa igolu ni itulale e vọ mhọ obọ, e nu ọta mugha, A rhi itulale ni e bububu nali ishọyọ ọ rhọ rhẹ wẹ fofo gboghyiẹ olema eni e myiesuọ vhi ọta igolu odalo oni utekwu. ⁴ Eni ewọli oni itulale, gboghyiẹ olema eni e myiesuọ, o te obọ eni ighyiukọ li tututu bhuli Ishinẹgba. ⁵ Ọni aghyiukọ ọ rhue oni atasa itulale oyọ ọ te ọta wẹ erhẹ vọsẹ ọ gbagbagba. ọ pfi ọli je ukhomhi ekẹ, idudumhi ikphala rhẹmhi e kee vanọ, e tono, inyamhinya e li gbeagbea, ekẹ o kwunolono. ⁶ Eni ighyiukọ oshila ni e nwuno ekphẹli Ishila mhọli obọ e nwuno wẹ egbe lẹẹ kee kphele. ⁷ Ọni aghyiukọ ni ikyatsolo ọ kphele okphẹ, ikpamhi iyese e bhẹ, erhẹ e kwugbe ọlia. A pfino wẹ kpiale ekẹ ishọyọ opfi esẹ ukhomhi ekẹ khi o toa, opfi esẹ erhẹ e tosẹ wẹa, ebui ni e kwu myiẹmyiẹmyiẹ e gaa toa. ⁸ Ọni aghyiukọ ọzava ọọ kphele okphẹ ọli, ẹtseke ni o liabhi ududumhi okpha ni erhẹ lẹẹ to a pfi ọli lo okwu. Ikhyiẹkhyiẹmhi esẹ vhi oni okwu o mela ọlia, ⁹ Asha esẹ vhi elamhi ni e la okwu e gwhuloa, asha esẹ vhi eni ekọ okẹ e gwhọghọa. ¹⁰ Eghyiukọ ọzasẹ ọọ ke kphele 0kphẹ ọli, ududumhi atata o te idamhida de kpiale, oo gẹẹ nyanyanya abhi ufulọ ni ọa gẹẹ, o gẹẹ kwu ekẹ ali ekẹ ni e te irhui na ẹẹ lasele. ¹¹ Eva ọni atata lẹ khi ọkhwẹ orhẹ. ikhyiẹkhyiẹmhi esẹ oni okwu o mela ekwhẹa, o rhi agbọ nebu gwhuloa. rhọ te ikpa amẹ ni ee yala. ¹² Aghyiukọ ọzane ọ kphele okphẹ, ikhyiẹkhyiẹmhi esẹ oni ọwọli o mela ubilia shi itata ali ukyi. opfesẹ oni ovọ o bi ebilia; shi opfesẹ vhi ẹliyọsẹ ali ẹlogota e vha gwe mhọli ufulọ. ¹³ Mhi kee bino, mhi sokwu ughoso ni ọọ fiala iteteva idamhida, ọ rhi urhuli ni o zezeze nyalu, ‘’Epfua! Epfua! epfua, lẹ khi uwi eni e nyele ukhomhi eke, rharhi okphẹ ni eni ighyiukọ asẹ e lẹẹ kphele.''