¹ Abhi a ke rhọ mẹ ona pfuse, mhi mẹ ighyhiukọ ane e mugha opfi enenene, ukhomhi ekẹ, khi e nwu akpekpe opfi enenene gbagbagba khi akpekpe oo ke gwe pfi kwu ukhomhi ekẹ, okwu, ali erhẹ kwu. ² Mhi ke mẹ khi aghyiukọ ọvhese ọ rhọ te obhoni ọwọli o te a lasele bhẹẹ, ọgwho ọ mhọli ishẹfẹ Ishinẹgba ni ọ nyele. Ọ sọọse gbalala nu eni ighyiukọ ngme ni a rhi imasha na khi e rhọ rhi ẹtsẹkẹ li ekẹ ali okwu. ³ ''Imhẹ vha pfuẹchẹ ekẹa wẹ khi okwu ali erhẹ nee, o kyia ni eyẹ ke rhi ishẹfẹ shi anukpo eni e kyili egamhẹ Ishinẹgba. ⁴ Mhi ke suọ khi a lolo eni a shi ẹfẹ: e kyili agbẹlẹ egbhọ igbe asha egbhọ esẹ igbe ali ene vhi elemhi Izulẹ: ⁵ Elemhi ẹdẹli Ijuda agbẹlẹ igbhọ igbe asha igbe ali eva li a shi ẹfẹ, ẹdẹli Irhubẹni agbẹlẹ egbhọ igbe asha igbe ali eva li a shi ẹfẹ, ẹdẹli Igadi agbẹlẹ egbhọ igbe asha igbe ali eva li a shi ẹfẹ. ⁶ Ẹdẹli Asha, agbẹlẹ egbhọ igbe asha igbe ali eva li a shi ẹfẹ, ẹdẹli Inaftali, agbẹlẹ egbhọ igbe asha igbe ali eva li a shi ẹfẹ, ẹdẹli Imanasẹli, agbẹlẹ egbhọ igbe asha igbe ali eva li a shi ẹfẹ. ⁷ Ẹdẹli Isamọni, agbẹlẹ egbhọ igbe asha igbe ali eva li a shi ẹfẹ, ẹdẹli Ilẹvi, agbẹlẹ egbhọ igbe asha igbe ali eva li a shi ẹfẹ, ẹdẹli Isaka agbẹlẹ egbhọ igbe ali eva li a shi ẹfẹ. ⁸ Ẹdẹli Izẹbuloni, agbẹlẹ egbhọ igbe asha igbe ali eva li a shi ẹfẹ, ẹdẹli Ijosẹfu agbẹlẹ egbhọ igbe asha igbe ali eva li a shi ẹfẹ, ẹdẹli Ibẹjami, agbẹlẹ egbhọ igbe asha igbe ali eva li a shi ẹfẹ. ⁹ Abhi a ke rhọ mẹ ena kwu mhi kee bino mhi ke mẹ akwete iọgbọ nebububu ni ọgbọ ọ vha dobẹ a lolo ni e te ẹvholi, ozele, agbọ ali irhuli ọdọdọda bhale enu oni eghyiele mugha ali ọni Ọmyi Ọke Ede epfopfo li e gaa rhọ kwhẹ e rhi evhyiamhi oji mhọli abo. ¹⁰ e ngme lasele gboo: ''Itsumhi o la obọ Ishinẹgba eyẹ ni ọ shitọ oni eghyiele, ali oni Omyi Oke!'' ¹¹ Eni ighyiukọ kwu e tono mugha gasẹ oni utekwu eghyiele ali eni ejọ ali eni elamhi ane, e tanọrhugwhu ekẹ e gbega ni Ishinẹgba, ¹² ee li ẹẹ li, Itse! ichichi, ikiki, ẹgbhẹ, uwegbe, ojima, izemhi ali afu e kyili uwi Ishinẹgba eyẹ ni ẹlẹnagbọagbọ apfish ẹlẹnagbọagbọ! Itse!'' ¹³ Ukhwumhọgwho eni ejọ ọ ke mhila mhẹ ogbọ, ''Egwho khi ena, ni e rhi ede epfopfo khwhẹ, obho e te bhẹ? ¹⁴ Mhi ke sọ ọli vhọ, ''Ọga, ghyiẹ li u yẹsẹ,'' ọ ke ẹẹ mhe, ''Ena khi eni e te ududumhi osue lasele. E she pfuẹ ede wẹa olia ọni Omyi Oke o rhẹ wẹ pfuasẹ. ¹⁵ Rharhi ona li e te nu oni utekwu eghyiele Ishinẹgba mugha, shi ota shi iyọsẹ li e rhọ gbega a nali elemhi apfẹ ọli. lẹ ni ọ shitọ oni utekwu eghyiele ọ la laa rhi iku ọli gwese wẹ. ¹⁶ Shi okyiamẹ shi okyiamhi o vha gwe laa gbe wẹ. Shi ovọ shi amẹ o vha gwe laa gbe wẹ, wẹ khi efọse. ¹⁷ Rharhi khi ọni Omyi Oke ni ọ la iteteva oni utekwu eghyiele li ọọ tsua wẹ kpe alo, ọọ la rhẹ wẹ je egbegbe okẹ ni oa na, ishọyọ Ishinẹgba ọ shishi wẹ ame evyiẹ kwu ni e la wẹ aloa.''