¹ Abhi ena kwu e ke rhọ dọsẹ a lẹ mhi ke ẹẹ khi mhia bino, mhi rhọ mẹ khi obunode o gweghyiea vhi elemhi idane. Uruli na mhi kyiatsolo suọ rhẹmhi o ngme abhi okphẹ, ọọ li, ''Shele vhi ana, mhi laa rhọ khasẹ ẹ emeni a laa mẹ ni ena e ke dọsẹ a lẹ.'' ² Ayayayọ mhi la elemhi ayẹmhẹ Ishinẹgba, mhi mẹ utekwu eghyiele vhi idane, khi ọgbọ ọ shitọ vhọ. ³ Ọni ọgbọ ni ọ shitọ vhọ ọ liabhi ẹchẹ opfopfo ni oo gẹẹ abhi ughegbe ali ẹchẹ igolu. ọnyaji o gasẹ oli a lẹ. Oni ọnyaji o liabhi ẹchẹ ni oa gẹẹ ni o liabhi ebe orhẹ. ⁴ Eghyiele uye ali ene ee gasẹ oni eghyhie a lẹ. Eni itekwu eghyie eyọ ejọ uye ali ane e shitọ vhọ, e rhi ede epfopfo kwhẹ, e rhi arhu eghyiele igolu gwese ukhomhi. ⁵ Oni eghyiele inyamhinya e te vhọ ẹẹ li gbeagbea, ikphala e vanọ. ikpa Ishila e la odalo oni eghyiele gẹẹ, eni ikpa e kyili iyẹmhẹ ishila Ishinẹgba. ⁶ Okwu o li la asha ni oni utekwu eghyie o la, o chẹma kyiẹlẹ. Ẹstẹkẹ ane ni a ma ni e nyele e li la ayọ, e zẹ ikpalo shi oshimhi ali alo. ⁷ Ọni ẹlamhi akọ rhẹmhi ọ liabhi ọdumhi, ọni ẹlamhi akọ ọzava ọ liabhi ena ọni ọzasẹ ọ zẹ alo ọgbọ, ọni ọzane ọ liabhi ughoso ni ọa pfiala. ⁸ Eni elamhi ako ananane ni e nyele e zẹ ipfua esesa, esesea, ikpalo e vọ wẹ egbe, egwho e la oleda e gwho e la olọkẹ. Shi ota shi iyọsẹ e vha pfuesuọa rhẹmhi ea li ẹẹ, ipfuasẹ, ipfuasẹ, ipfuasẹ lẹ khi uwi Ishinẹgba ni Ọmhọli, ni ọ mhasẹ a ni ẹtsẹkẹ kwu, ni ọ kpọ la, ni ọ la nena, ni ọ gwe laa bhẹ.'' ⁹ Erhẹghẹ kwu ni eni elamhi eyọ e rhọ rhi ikiki, ojima, ali uwegbe a ni ọni ọ shitọ oni eghyiele oyọ, ọni ọ nyele ẹlẹnagbọagbọ, ¹⁰ Eni ejọ uye ali ane eyọ e tanọrhugwhu ni ọni ọ shitọ oni utekwu eghyie. E nyẹsẹ ukhọmhi nali ni ọ nyele ẹlẹnagbọagbọ, e pfini irhu ni e gwese kwu adalo oni utekwu eghyie, eẹ li, ¹¹ U tẹ, Ọnọmhuẹyẹ ali Ishinagba eyẹ, khi u rhọ myiẹ ikiki, ojima, ali izemhi. Rharhi khi u ma ẹtsẹkẹ kwu, izemhi ẹ li e rhọ nyele, ni a rhọ ma wẹ.''